Ռուսաստանը ստիպված է պաշտպանել իր շուկան․ Օվերչուկը՝ Հայաստանի հետ առևտրի մասին

Ռուսաստանն այսօր ստիպված է պաշտպանել իր շուկան։ Երկիրը Հայաստանի իր գործընկերներին առաջարկում է համատեղ աշխատել այդ ուղղությամբ, «Վեստի» տեղեկատվական ծառայությանը տված հարցազրույցում հայտնել է ՌԴ փոխվարչապետ Ալեքսեյ Օվերչուկը։

Նա այդպես է պատասխանել լրագրողի հարցին, թե արդյոք հաջողությամբ են պսակվել Հայաստանի՝ այլ շուկաներ վերակողմնորոշվելու փորձերը։

«Ըստ ամենայնի՝ ոչ։ Նրանց, իհարկե, որոշակի փոքր օգնություն ցուցաբերվել է, սակայն դա որևէ համեմատության մեջ չի մտնում այն մեծ և սովորական շուկայի հետ, որը Ռուսաստանի շուկան է նրանց համար։ Եվ մենք էլ սովոր ենք այդ արտադրանքին»,- ասել է Օվերչուկը։

Նշենք, որ սեպտեմբերի 1-ին ՌԴ նախագահ Վլադիմիր Պուտինի հետ հանդիպման ժամանակ վարչապետ Նիկոլ Փաշինյանը խոսել է ԵԱՏՄ-ից Հայաստանի դուրս գալու և ընտրություն կատարելու պահանջների մասին։

«Որևէ խախտում չենք հայտնաբերել այն պարտավորությունների, որոնք Հայաստանն ունի Ռուսաստանի Դաշնության և Եվրասիական տնտեսական միության նկատմամբ, որովհետև նաև Եվրասիական տնտեսական միության մասին պայմանագրում ուղղակիորեն ասված է, թե ինչպես պետք է գործել, եթե երկիրը որոշում է դուրս գալ Եվրասիական տնտեսական միությունից։

Ի դեպ, այնտեղ չկա այնպիսի կարգավորում, ըստ որի՝ անդամ պետությանը կարելի է հեռացնել կազմակերպությունից։ Այսինքն՝ այնտեղ նախատեսված է, որ եթե երկիրը որոշում է դուրս գալ Եվրասիական տնտեսական միությունից, ապա պետք է այդ մասին նախապես՝ վեց ամիս առաջ, տեղեկացնի գործընկերներին։ Կարծում եմ՝ մենք այս իրավիճակին պետք է նայենք հենց այս տեսանկյունից։

Այս պահի դրությամբ մենք մեր գործընկերներին չենք տեղեկացրել, որ պատրաստվում ենք դուրս գալ Եվրասիական տնտեսական միությունից։ Կարծում եմ՝ մենք պետք է հենվենք հենց այս փաստի վրա, որովհետև այս առնչությամբ հանրաքվեի հարցը շատ է քննարկվել»,-նշել է Փաշինյանը։

Պուտինը շարունակել է պնդել, որ մեկ այլ տնտեսական կազմակերպությանն անդամակցության ընթացակարգի մեկնարկի մասին օրենքի ընդունումը, ըստ էության, նշանակում է ԵԱՏՄ-ից դուրս գալու մասին հայտարարություն, որովհետև այնտեղ և այստեղ միաժամանակ գտնվելն անհամատեղելի է․ «Ահա այս է խնդիրը»։