20.10.2026 | 19:34
Հողերի օտարում, շահերի բախում և 30 տարվա պաշտոնավարում․ ովքեր են Կոտայքի համայնքներում հավակնում իշխանության
Ադրբեջանի և Հայաստանի միջև ռազմական էսկալացիա չկա․ առևտրատնտեսական կապերը զարգանում են․ Ալիևի ներկայացուցիչ
Քաղաքականություն
03.09.2026 | 11:44
Վաշինգտոնյան գագաթնաժողովից ի վեր մենք փաստացի ապրում ենք խաղաղության պայմաններում։ Ադրբեջանի և Հայաստանի միջև ռազմական էսկալացիա չկա։
Ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանի նախագահ Իլհամ Ալիևի հատուկ հանձնարարություններով ներկայացուցիչ Էլչին Ամիրբեկովը՝ Բաքվում «Քաղաքների վերականգնման համար հումանիտար ականազերծում. անվտանգ բնակավայրերի համար գերազանցության չափանիշների սահմանում» թեմայով ականազերծման IV միջազգային համաժողովի ընթացքում։
Նրա խոսքով՝ կառավարությունների և հասարակությունների միջև երկխոսությունը շարունակվել է, սկսվել են առևտրատնտեսական կապեր, զարգանում են փոխկապակցվածության և հաղորդակցությունների ոլորտներում իրականացվող նախագծերը։
«Միևնույն ժամանակ մեր հասարակություններից ակնկալվում է, որ նրանք հայացքն ուղղեն դեպի այլ ապագա։ Սա իսկապես պատմական հնարավորություն է։ Խաղաղությունը ստեղծվում է ոչ միայն քաղաքական համաձայնագրերով։ Խաղաղությունը պետք է տեսանելի և շոշափելի դառնա տեղում՝ մարդկանց առօրյա կյանքում։ Իսկ Ադրբեջանում խաղաղությունը շոշափելի դարձնելու ճանապարհին ամենամեծ խոչընդոտներից մեկը հենց գետնի տակ է գտնվում։ 2020 թվականի վերջերից ի վեր Ադրբեջանում ականների զոհ է դարձել 437 մարդ՝ կա՛մ զոհվել են, կա՛մ վիրավորվել»,- նշել է Էլչին Ամիրբեկովը։
Ըստ նրա դա հասարակությանը հիշեցնում է, թե պատերազմը դեռ ամբողջությամբ չի մնացել անցյալում, և դա անխուսափելիորեն բացասաբար է ազդում կարգավորման գործընթացի նկատմամբ հասարակական վստահության վրա։
Թարգմանությունը՝ Էմմա Չոբանյանի
