Ինչո՞ւ էր Արեգա Հովսեփյանը Ղարաբաղի համար այդ դժվար ժամանակահատվածում ապրում Երևանում․ Հարությունյան․ ՏԵՍԱՆՅՈՒԹ

Խորհրդարանական հարցուպատասխանի ընթացքում բանավեճ ծավալվեց պատգամավոր Արայիկ Հարությունյանի և ԱԺ Եվրաինտեգրման հանձնաժողովի նախագահի պաշտոնում թեկնածու առաջադրված Արեգա Հովսեփյանի միջև՝ կապված 2022 թ. Պրահայի հայտարարության և Հովսեփյանի՝ նախկինում ունեցած պետական աշխատանքի հետ:

Հարությունյանը հարցրեց ինչպես է Հովսեփյանի վերաբերվում 2022 թ. հոկտեմբերի 6-ի Պրահայի քառակողմ հայտարարությանը, որով Հայաստանը և Ադրբեջանը հաստատել են իրենց հանձնառությունը Ալմաթիի հռչակագրին և միմյանց տարածքային ամբողջականության ճանաչմանը:

Արձագանքելով՝ Արեգա Հովսեփյանը նշեց, որ ճանաչում է իր հայրենիքն ու ծննդավայրը, որտեղ գտնվում են իր հոր և նախնիների գերեզմանները: Նա տարակուսանք հայտնեց նման հարցադրման նպատակահարմարության վերաբերյալ. «Ի՞նչ է զգում հայը, երբ որ նման հարցադրում է անում արցախցուն… ի՞նչ նպատակով է նա դա հարցնում՝ ցավացնելո՞ւ»:

Մյուս հարցը վերաբերում էր Հովսեփյանի աշխատանքին Արտաքին գործերի նախարարությունում (ԱԳՆ): Հարությունյանը հետաքրքրվեց, թե ինչու է նա շարունակել մնալ համակարգում մինչև 2023 թ. օգոստոս և ինչու է այդ ընթացքում ապրել Երևանում, այլ ոչ թե Արցախում:

Ի պատասխան՝ Հովսեփյանը ասաց, որ աշխատանքից ազատման առաջին դիմումը գրել է դեռևս 2020 թ. նոյեմբերի 10-ին, իսկ 2021 թ. ընտրություններից հետո, երբ գործող իշխանությունը չհեռացավ, ինքը գնացել է երեխայի խնամքի արձակուրդի և 2021-ից 2023 թթ. փաստացի չի աշխատել նախարարությունում:

Հովսեփյանը հավելեց, որ վերջնական դիմումը գրել է 2023-ին՝ դեռևս արձակուրդում գտնվելու ժամանակ: Երևանում բնակվելու վերաբերյալ դիտարկմանը Հովսեփյանն արձագանքեց հարցով՝ արդյոք ակնկալվում էր, որ ինքը պետք է մնար Արցախում և զոհվեր: ԱԺ փոխնախագահ Վահագն Ալեքսանյանը արձագանքեց, որ խոսքը զուտ ապրելու մասին էր։

Մանրամասները՝ տեսանյութում։

Եվգենյա Համբարձումյան