Քաղաքականություն
04.12.2018 | 16:53
«Մենք» դաշինքն իր քարոզարշավն այսօր անցկացնում էր Երևանի Նոր Նորք վարչական շրջանում։
Դաշինքի պատգամավորի թեկնածու Արամ Սարգսյանը քաղաքացիների հետ զրուցեց գործազրկության և աշխատատեղերի խնդրի մասին։
Ըստ Սարգսյանի՝ դրանց լուծման համար իրենք առաջարկում են տնտեսական ճիշտ լոկոմոտիվ ստեղծել։
«Միշտ մարդկանց համոզել են, թե Հայաստանն աղքատ է, չունի նավթ ու գազ, բայց դա այդպես չէ, ՀՀ-ն ունի գիտնականներ, կրթվել սիրող երիտասարդություն, ունի ջրային ու ընդերքի լուրջ ռեսուրսներ, հանքարդյունաբերությունը պետք է մետալուրգիայի վերածել, և դրանք կապելով ռադիոտեխնիկային ու տիեզերքին, կարելի է տեղից պոկել տնտեսական լոկոմոտիվը։ Մենք շատ էլ հարուստ ժողովուրդ ենք»,- ասաց Սարգսյանը։
Արամ Սարգսյանն առանձնացրեց նաև Զինված ուժերում առկա խնդիրը։
Վերջինս խոսքով՝ «Մենք» դաշինքը խորհրդարանում հայտնվելու դեպքում կառաջարկի, որպեսզի բանակում լինի 20 հազար պայմանագրային զինծառայող, որոնք կլինեն առաջնագծում, ժամկետային զինծառայողները ետ կբերվեն, իսկ դրա համար անհրաժեշտ է 240 մլն դոլար։
Ի թիվս այլ խնդիրների՝ Սարգսյանը խոսեց նաև առողջապահության ոլորտի մասին և ներկայացրեց իրենց դաշինքի առաջարկը. «Մենք առաջարկում ենք ներդնել առողջապահության ապահովագրություն։ Ի՞նչն է ավելի կարևոր՝ մարդու կյա՞նքը, թե՞ մեքենան, ինչո՞ւ են առաջինը ավտոմեքենան ապահովագրում»։
