Քաղաքականություն
06.08.2026 | 13:00Կառավարության հերթական նիստում վարչապետ Նիկոլ Փաշինյանը նշեց, որ ապօրինի գույքի վերադարձի գործընթացում կան մի քանի մեխանիզմներ՝ ապօրինի ծագում ունեցող գույքի բռնագանձում, պետական և համայնքային շահերի պաշտպանության գործընթացներ, ինչպես նաև քրեական գործերի շրջանակում կայացված դատական ակտեր։
Նրա խոսքով՝ կան նաև դեպքեր, երբ գույքը համայնքներին վերադարձվում է բանակցությունների միջոցով, սակայն դրանք ամբողջությամբ չեն հաշվառվում։
«Այգիներ կան, որ բանակցելով վերադարձվել են, այնտեղ ներդրումներ են արվել, բայց մեր ոչ մի հաշվետվության, ոչ մի հաշվառման մեջ չի երևում։ Էս էլ է պետք անել»,- ասաց վարչապետը։
Փաշինյանն ընդգծեց, որ վերադարձված գույքերի հետ կապված անհրաժեշտ է մշակել կառավարման հստակ մեխանիզմներ, քանի որ դրանց ծավալները մեծանում են։
Խոսելով խոշոր ձեռնարկությունների վերադարձի մասին՝ վարչապետը նշեց, որ դրանց վերաբերյալ մոտեցումները տարբեր կլինեն։
«ՀԷՑ-ի պարագայում մենք հայեցակարգային մակարդակում կողմնորոշվել ենք՝ դա լինելու է պետական սեփականություն, որը հանձնվելու է հավատարմագրված կառավարման»,- նշեց Փաշինյանը։
Միևնույն ժամանակ վարչապետը նշեց, որ արտադրական ձեռնարկությունները, որոնք կարող են վերադարձվել պետությանը, նպատակահարմար չէ պահել կառավարության անմիջական կառավարման ներքո։
«Դա մենք պետք է թափանցիկ մրցույթներով մասնավորեցնենք։ Իհարկե, կառավարության որոշակի՝ տնօրենների խորհրդում տեղ ունենալու համար ինչ-որ բաժնեմաս մենք կարողանանք պահել»,- ընդգծեց նա։
Նա հավելեց, որ առաջիկայում կառավարությունը պետք է դասակարգի վերադարձվող գույքերը և որոշի դրանց հետագա օգտագործման կամ կառավարման ձևերը։
Փաշինյանը նաև հայտարարեց, որ 2026-2031 թվականներին նախատեսվում է տարբեր մեխանիզմներով Հայաստանի Հանրապետությանը և համայնքներին վերադարձնել շուրջ 2 միլիարդ դոլարի ապօրինի գույք։
Մանրամասները՝ տեսանյութում։
Արփի Հակոբյան
