06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
ՊԵԿ-ը 78.4 մլն դրամի չվճարված հարկ է բացահայտել Ծառուկյանի «Մուլտի Ռեստ Հաուս» հյուրանոցում
Հասարակություն
31.07.2026 | 13:07
ՊԵԿ-ը Ծաղկաձորում գործող հյուրանոցային և հանրային սննդի ծառայություններ մատուցող ընկերությունում բացահայտել է շուրջ 78.4 մլն դրամի չվճարված հարկեր և վճարներ՝ աշխատավարձերի ու իրացման շրջանառության թերհայտարարագրման հետևանքով։ ՊԵԿ-ի հրապարակած տեսանյութից երևում է, որ խոսքը Գագիկ Ծառուկյանին պատկանող «Մուլտի Ռեստ Հաուս» հյուրանոցային համալիրի մասին է։
«ՊԵԿ Հետաքննության և օպերատիվ հետախուզության վարչություն օպերատիվ տեղեկություններ էին ստացվել այն մասին, որ Ծաղկաձոր քաղաքում հյուրանոցային ծառայությունների և հանրային սննդի մատուցման գործունեություն իրականացնող ընկերությունը թաքցնում է վճարման ենթակա հարկերի իրական ծավալները: Հարկեր չվճարելու նպատակով ՊԵԿ ներկայացվող եկամտային հարկի և սոցիալական վճարի ամսական, ինչպես նաև ավելացված արժեքի հարկի և ակցիզային հարկի միասնական հաշվարկներում, ընկերության կողմից, մտցվում են խեղաթյուրված տվյալներ՝ աշխատողների վարձատրությանն ուղղվող միջոցների իրական չափերի, ինչպես նաև իրացման իրական շրջանառության վերաբերյալ։
Ձեռնարկված ծավալուն օպերատիվ-հետախուզական միջոցառումների ընթացքում պարզվել է, որ ընկերությունը 2023-2026 թվականների ընթացքում հարկային մարմին ներկայացվող հարկման համար հիմք հանդիսացող հաշվարկներում աշխատողների վարձատրությանն ուղղվող միջոցների և իրացման շրջանառության վերաբերյալ առերևույթ խեղաթյուրված տվյալներ մտցնելու՝ իրական չափերը չնշելու միջոցով չի հաշվարկել և չի վճարել ընդհանուր շուրջ 78,4 մլն ՀՀ դրամի հարկեր և վճարներ։
Մասնավորապես, ընկերության կողմից 2023-2026 թվականների ընթացքում հարկային մարմին ներկայացված եկամտային հարկի և սոցիալական վճարի ամսական հաշվարկներում աշխատողների վարձատրությանն ուղղվող միջոցները նշվել է շուրջ 190,2 մլն ՀՀ դրամ, մինչդեռ ստացված տեղեկություններով՝ նույն ժամանակահատվածում այն կազմել է ավելի քան 340,4 մլն ՀՀ դրամ։
Բացի այդ պարզվել է, որ 2026 թվականի հունվարի 1-ից մինչև 2026 թվականի հունիսի 15-ն ընկած ժամանակահատվածում ընկերության կողմից հանրային սննդի ծառայությունների մատուցման իրական շրջանառությունը կազմել է շուրջ 237,5 մլն ՀՀ դրամ, մինչդեռ ընկերության ֆիսկալային հասույթը նույն ժամանակահատվածում կազմել է մոտ 136,5 մլն դրամ։
Օպերատիվ-հետախուզական միջոցառումների արդյունքում ՀՀ քրեական օրենսգրքի համապատասխան հոդվածով նախատեսված առերևույթ հանցանքի վերաբերյալ հաղորդում է ներկայացվել ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ նախաձեռնվել է քրեական վարույթ։
Պետական եկամուտների կոմիտեն բոլոր հարկ վճարողներին հորդորում է զերծ մնալ տնտեսական գործարքները սահմանված կարգով չփաստաթղթավորման դեպքերից, և այդ նպատակով ՊԵԿ հետաքննության և օպերատիվ հետախուզության վարչությունը հետևողական է լինելու տնտեսական գործունեության վերաբերյալ կազմվող հաշվարկային փաստաթղթերում արտացոլված տվյալների իրական հանգամանքները պարզելու հարցում»,- ասված է ՊԵԿ-ի տարածած հաղորդագրությունում։
Հիշեցնենք, որ Գագիկ Ծառուկյանն այս պահին կալանքի տակ է մեկ այլ քրեական վարույթի շրջանակում։ Քննչական կոմիտեն նրան մեղադրում է 2022-2024 թվականներին առանձնապես խոշոր չափերով խարդախություն և փողերի լվացում կազմակերպելու մեջ։ Ըստ քննության վարկածի՝ խոսքը շուրջ 8.1 մլրդ դրամ արժողությամբ գույքի հափշտակության մասին է։ Ծառուկյանը հուլիսի 6-ին ձերբակալվել է, իսկ հուլիսի 7-ին դատարանը նրա նկատմամբ երկամսյա կալանք է կիրառել։ Նա մեղադրանքը չի ընդունում։
ՊԵԿ-ի այս հաղորդագրությունում Ծառուկյանի անունը չի նշվում, և առայժմ չի հաղորդվել, որ հյուրանոցի հարկային վարույթը կապված է նրա նկատմամբ քննվող մյուս քրեական գործի հետ։
