Թրամփը կասկածի տակ է դրել Ուկրաինային Patriot-ի արտադրության արտոնագրի փոխանցումը

Financial Times-ին տված հեռախոսային հարցազրույցում ԱՄՆ նախագահ Դոնալդ Թրամփը հայտարարել է, որ «համոզված չէ»՝ արդյո՞ք թույլ կտա Ուկրաինային հրթիռներ արտադրել Patriot հակաօդային պաշտպանության համակարգերի համար:

«Մենք ուսումնասիրում ենք դա»,- ասել է նա, գրում է BBC-ի ռուսական ծառայությունը։

Patriot հրթիռներ արտադրելու արտոնագիր տրամադրելու խոստումը հնչել էր հուլիսի սկզբին Թրամփի և Ուկրաինայի նախագահ Վլադիմիր Զելենսկիի միջև Թուրքիայում ՆԱՏՕ-ի գագաթնաժողովի շրջանակում կայացած հանդիպման ժամանակ: Թրամփը և Զելենսկին այս հարցը քննարկել էին նաև երեքշաբթի Վաշինգտոնում կայացած հանդիպման ժամանակ։ Այս մասին հայտնել էր Ուկրաինայի նախագահը, որի համար Patriot-ի զինամթերքը կրիտիկական նշանակություն ունի և անհրաժեշտ է՝ ռուսական բալիստիկ հրթիռային հարվածների աճող հաճախականությանը հակազդելու համար:

«Սրանք բացառիկ զենքեր են, և մենք պետք է մի փոքր զգույշ լինենք այն հարցում, թե ում ենք արտոնագիր տալիս։ Մենք իրականում արտոնագիր չենք տալիս սարքավորումների համար»,- ասել է Թրամփը FT-ին։

Զելենսկին ԱՄՆ նախագահի հետ իր վերջին հանդիպումը բնորոշել էր «լավ» և ասել, որ քննարկել են «Patriot զենիթային հրթիռների արտադրությունը և մի քանի այլ գաղափարներ»։

«Թրամփն ընդունել է մեզ արտոնագրեր տրամադրելու առաջարկը»,- հայտարարել էր Ուկրաինայի նախագահը։

Patriot համակարգերը կենսական նշանակություն ունեն Կիևին և այլ քաղաքներին ուղղված ռուսական բալիստիկ հրթիռները որսալու համար: Լրատվամիջոցը նշում է, որ Թրամփին համոզելը՝ քննարկել Կիևին այդ հրթիռները արտադրելու թույլտվություն տալու հարցը, Զելենսկիի համար նշանակալի նվաճում էր։

Թրամփը FT-ին ասել է նաև, որ իր հատուկ բանագնացներ Սթիվ Ուիթկոֆը և Ջարեդ Քուշներն առաջիկա օրերին կայցելեն Ուկրաինա։ Սա նրանց առաջին այցը կլինի Կիև՝ Մոսկվայում Ռուսաստանի նախագահ Վլադիմիր Պուտինի հետ մի քանի հանդիպումներից հետո։

«Պարզ ասած՝ մենք ուզում ենք, որ Ուկրաինայում Ռուսաստանի հետ պատերազմն ավարտվի։ Ես հրթիռներ չեմ ուզում: Մեզ խաղաղություն է պետք»,- ասել է ԱՄՆ նախագահը։