Ուկրաինան կրկին հարձակվել է Wildberries-ի վրա․ հարվածներ են հասցվել Վոլգոգրադի և Թաթարստանի պահեստներին

Ուկրաինական անօդաչու թռչող սարքի հարձակման հետևանքով հրդեհ է առաջացել Վոլգոգրադի Wildberries-ի լոգիստիկ  օբյեկտում, հայտնել է ընկերությունը: Նախնական տեղեկություններով՝ աշխատակիցները չեն  տուժել, գրում է Meduza-ն։

Վոլգոգրադի մարզի նահանգապետ Անդրեյ Բոչարովը հայտնել է, որ Վոլգոգրադի և մարզի վրա ուկրաինական  ԱԹՍ-ների հարձակման հետևանքով վիրավորվել է հինգ մարդ: Վոլգոգրադում վնասվել է բնակելի շենք և մասնավոր տուն: Հրդեհներ են բռնկվել քաղաքի հարավում գտնվող վառելիքաէներգետիկ համալիրում, ինչպես նաև պահեստներում:Նա  չի նշել, թե ում են դրանք պատկանում:

Astra-ն, վկայակոչելով ականատեսների լուսանկարնեն ու տեսանյութերը, հաղորդում է, որ Վոլգոգրադում «Լուկօյլ-Վոլգոգրադնեֆտեպերերաբոտկա» նավթավերամշակման գործարանը, հնարավոր է, հարձակման է ենթարկվել Ուկրաինայի կողմից։

Ուկրաինական անօդաչու սարքերը հարձակվել են նաև Թաթարստանի Զելենոդոլսկ քաղաքում գտնվող Wildberries-ի մեկ այլ պահեստի վրա։ Տարածված տեսանյութերում պահեստի տարածքում ծուխ է երևում։ Wildberries-ը հայտարարել է, որ Զելենոդոլսկի պահեստը «նորմալ աշխատում է»։ Ընկերությունը չի նշել՝ արդյո՞ք այն հարձակման է ենթարկվել։

Ուկրաինական լրատվամիջոցները նաև տեսանյութ են տարածել, որտեղ երևում է, թե ինչպես է անօդաչու թռչող սարքը պայթում Ozon-ի պահեստի մոտ։ Ենթադրաբար, տեսանյութը նկարահանվել է Զելենոդոլսկում։ 116.ru-ն նշում է, որ Զելենոդոլսկի Wildberries-ի և Ozon-ի լոգիստիկ կենտրոնները գտնվում են նույն արդյունաբերական տարածքում։

Զելենոդոլսկի քաղաքապետ Միխայիլ Աֆանասևը հայտարարել է, որ ՀՕՊ ուժերը հետ են մղել լոգիստիկ կենտրոնի վրա անօդաչու թռչող սարքերի հարձակումները։

Ռուսաստանի Պաշտպանության նախարարությունը հայտնել է, որ Բելգորոդի, Բրյանսկի, Վորոնեժի, Վոլգոգրադի, Կուրսկի, Ռոստովի և Տուլայի մարզերի, ինչպես նաև Կրասնոդարի երկրամասի, Դաղստանի, Թաթարստանի, բռնակցված Ղրիմի,  Ազովի ու Սև ծովերի ջրերի վրա խոցվել է ուկրաինական 371 անօդաչու թռչող սարք։

Թարգմանությունը՝ Էմմա  Չոբանյանի