Ռոմանոս Պետրոսյանը ՀԷՑ-ից ինչքան աշխատավարձ է ստացել

ՀԷՑ ժամանակավոր կառավարիչ Ռոմանոս Պետրոսյանը Factor TV-ին տված հարցազրույցում խուսափեց հնչեցնել ՀԷՑ-ում իր աշխատավարձի չափը՝ միայն նշելով, որ մամուլում շրջանառվող «5-6 մլն դրամը» «չափազանցված» է։

Factor.am-ն ուսումնասիրել է Կոռուպցիայի կանխարգելման հանձնաժողով՝ որպես «Քաղաքացիական պայմանագիր» կուսակցության ղեկավար կազմի անդամ, և Կենտրոնական ընտրական հանձնաժողով՝ որպես հունիսի 7-ի ընտրություններում պատգամավորության թեկնածու Ռոմանոս Պետրոսյանի ներկայացրած գույքի և եկամուտների հայտարարագրերն ու պարզել, թե նա ամսական ինչքան աշխատավարձ է ստացել ՀԷՑ-ից։

ԿԿՀ հայտարարագրում նշված է, որ ՀԷՑ-ի ժամանակավոր կառավարչի պաշտոնը Պետրոսյանը ստանձնել է 2025 թվականի հուլիսի 11-ին, և մինչև 2025-ի դեկտեմբերի 31-ը ստացել է 25 մլն 981 հազար 722 դրամ աշխատավարձ։ ԿԸՀ-ի հայտարարագրում հաշվետու ժամկետը մինչև 2026-ի ապրիլի 1-ն է, ըստ այդմ՝ 2025-ի հուլիսի 11-ից մինչև 2026-ի ապրիլի 1-ը Պետրոսյանը ՀԷՑ-ից ստացել է 37 մլն 622 հազար 563 դրամ։ Ստացվում է, որ Ռոմանոս Պետրոսյանի աշխատավարձը ՀԷՑ-ում ամսական մոտ 4,3 մլն դրամ է։

Նկատենք, որ Հայաստանի Պետական վերահսկողական ծառայության ղեկավարի պաշտոնում 2025 թվականի հունվար-մայիսին Պետրոսյանն ամսական ստացել է մոտ 1․7 մլն դրամ աշխատավարձ։ Այսինքն՝ ՀԷՑ-ում, ՊՎԾ-ի համեմատ, նրա եկամուտն ավելացել է մոտ 2,5 անգամ։

Ստացվում է, որ ՀԷՑ-ի ժամանակավոր կառավարչի պաշտոնում Ռոմանոս Պետրոսյանի աշխատավարձի՝ մամուլում շրջանառվող «5-6 մլն դրամ» թիվն իրականությանը չի համապատասխանում։ Նա ստանում է ամսական շուրջ 4,3 մլն դրամ աշխատավարձ։

Գայանե Խաչատրյան