Փաշինյանը Ծառուկյանին օլիգարխ կոչեց, մինչդեռ ասում էր՝ խոշոր սեփականատեր է․ բիզնեսը չպիտի լինի իշխանության մեջ․ Լևոն Բարսեղյան․ ՏԵՍԱՆՅՈՒԹ

«Ասպարեզ» ակումբի խորհրդի նախագահ Լևոն Բարսեղյանի համոզմամբ՝ իշխանության կողմից հայտարարված «քրեաօլիգարխիայի ապամոնտաժման» գործընթացը կրում է հատվածական բնույթ և չի կարող արդյունավետ լինել առանց համակարգային դատաիրավական բարեփոխումների։ Նրա կարծիքով՝ գործող իշխանությունը ութ տարի շարունակ չի կարողացել ստեղծել արդարադատության անկախ և արդյունավետ մեխանիզմ, ինչի հետևանքով ցանկացած քրեական գործ կարող է հանրության շրջանում կասկածի տեղիք տալ։

«Ինչ-որ արվում է կամ ինչ-որ ներկայացվում է որպես քրեաօլիգարխիայի ապամոնտաժում, լավագույն սցենարի դեպքում արվում է կեսից։ Եթե չունես դատաիրավական արդար, արդյունավետ աշխատող մեխանիզմ, և ձեռնարկում ես նման գործողություններ, դրանք կարող են արդյունավետ լինել, կարող են անարդյունավետ լինել, բայց անարդար լինելու կասկածի հետքը շարունակ մնալու է հանրության շրջանում»,- նշեց Բարսեղյանը։

Նա ընդգծեց, որ իշխանությունը նախընտրել է կետային միջամտությունները՝ համակարգային լուծումների փոխարեն։ «Ես կնախընտրեի, որ ութ տարի առաջ պարոն Փաշինյանը սկսեր իր խոստումն իրականացնել՝ դատաիրավական համակարգը բարեփոխեր, և այդ համակարգը կարողանար արդյունավետ, արդարադատություն իրականացնել իր բոլոր օղակներով՝ ոստիկանություն, դատախազություն, քննչական մարմիններ և իհարկե՝ դատարաններ»։

Անդրադառնալով Գագիկ Ծառուկյանի դեմ հարուցված քրեական գործին՝ Բարսեղյանը այսպիսի կարծիք հայտնեց ներկայացված մեղադրանքների և դրանց քաղաքական ենթատեքստի առնչությամբ։ «Դժվար եմ պատկերացնում, որ այդքան հարստություն ունեցող մարդը 21 միլիոն դոլարի կողոպտելու բանի գնա։ Գաղափար չունեմ, կարող է՝ դա էլ կա, չեմ կարող ասել»։

Նրա կարծիքով, իշխանությունը, թիրախավորելով առանձին գործիչների, անտեսում է ավելի խորքային և համակարգային հանցագործությունները։ «Ինչու՞ Քոչարյանի 200 միլիարդ դոլար գնահատվող, ապօրինի համարվող գույքի վերադարձի առաջխաղացում չկա։ Մարտի 1-ի գործի ձգձգումները մինչև ո՞ւր կարող են շարունակվել, մինչև վաղեմության բոլոր հնարավոր ժամկետները անհաղթահարելի դառնան»։

Բարսեղյանի դիտարկմամբ՝ իշխանության այս մոտեցումը բխում է նախկին իշխանավորների «ռևանշի ռիսկը» թերագնահատելուց․ «Ինձ թվում է, որ Փաշինյանը թերագնահատել էր նախկին իշխանավորների ռևանշի ռիսկը։ Իրեն թվում էր, չգիտեմ ինչու էր թվում… որ եթե ինքը համբերատար կամ ներողամտորեն է վերաբերվում, խաթրաշահ է, սիրալիր, բարության դիրքերից է հանդես գալիս, բոլորն ասելու են՝ «Վա՜յ, ապրի արևդ, այս ինչ լուսավոր առաջնորդ է, այսքան վատ-վատ բաներ ենք արել, բերեք այլևս չանենք»։

Բանախոսը նաև մատնանշեց իշխանության հակասական դիրքորոշումը խորհրդարան անցած ընդդիմության նկատմամբ։ Մի կողմից, ըստ Փաշինյանի, ընդդիմության օգտին տրված բոլոր քվեներն ընտրակաշառքի արդյունք են, մյուս կողմից՝ իշխանությունը հաշտ է նրանց հետ նույն խորհրդարանում գտնվելու փաստի հետ։

«Իշխանությունը, փաստորեն, հաշտ է խորհրդարանում իր պնդմամբ իշխանության զավթման փորձ արած քաղաքական ուժի կամ ուժերի ներկայության հետ։ Փաստացի այդպես է։ Քաղաքացիական պայմանագիրը չի դիմել Սահմանադրական դատարան՝ ընտրությունների արդյունքները անվավեր հայտարարելու և վերաքվեարկություն նշանակելու պահանջով։ Միևնույն ժամանակ, Փաշինյանն ասում է, որ նրանց օգտին, ով քվե է տվել, բոլորը՝ 100 տոկոսով, ընտրակաշառքով են տվել։ Բա ինչու՞ եք հաշտ, որ 41 հոգի պիտի ընտրակաշառքով զբաղեցնի պատգամավորական տեղեր։ Սա անարդար է»,- ասաց նա։

Ամփոփելով՝ Բարսեղյանը կրկին շեշտեց, որ առանց դատավորների զտման (վեթինգի) և արդարադատության համակարգի իրական բարեփոխման, որը խոստացվել էր դեռ ութ տարի առաջ, «քրեաօլիգարխիայի» դեմ պայքարը մնալու է կիսատ և անարդյունավետ։

Հարցազրույցն ամբողջությամբ՝ տեսանյութում։

Ռոբերտ Անանյան