«Տանկային բիաթլոնի» առաջին՝ «Անհատական մրցավազք» փուլի ընթացքում ՀՀ ԶՈւ տանկային երեք անձնակազմերը դեղին ներկված տանկերով կմրցեն հուլիսի 30-ին, օգոստոսի 4-ին և 6-ին: Հուլիսի 24-ին կայացել է վիճակահանությունը: Այս մասին հայտնում է «Ռազմինֆո»–ն:
Տանկերի մրցավազքին մասնակցում են 19 երկրի թիմեր, այդ թվում՝ Ադրբեջանի, Իրանի, Տաջիկստանի, Ղազախստանի, Բելառուսի, Ռուսաստանի և Չինաստանի:
Ադրբեջանցի տանկիստները մրցելու են հուլիսի 29-ին, 31-ին և օգոստոսի 5-ին, Քուվեյթի, Մոնղոլիայի և Չինաստանի թիմերի հետ:
Իրանի թիմի մրցակիցներն են Ղազախստանի, Զիմբաբվեի և Բելառուսի հավաքականները:
Այս տարի, բացի երեք երկրների հավաքականներից, մնացած բոլոր երկրների տանկիստները կմրցեն Ռուսաստանի տրամադրած Տ-72Բ տանկերով: Սա պայմանավորված է նրանով, որ այս տանկերն առկա են մասնակից բոլոր երկրների սպառազինություններում: Այդ նպատակով պատրաստվել է 70 տանկ: Վիճակահանությունից հետո թիմերը ստանում են չորսական տանկ:
Սեփական տանկերով կմրցեն Բելառուսի, Հնդկաստանի և Չինաստանի թիմերը: Բելառուսը ներկայանալու է իր իսկ արդիականացրած Տ-72 տանկով, Չինաստանի թիմը՝ սեփական արտադրության Type 96B-ով, Հնդկաստանը՝ Ռուսաստանի արտոնագրով արտադրած Տ-90 տանկով:
Երկրներից յուրաքանչյուրը ներկայացրել է չորսական տանկային անձնակազմ, որոնցից երեքը՝ հիմնական, մեկը՝ պահեստային, բոլորը միասին կազմում են 12 մարդ: Անձնակազմի մեջ է մտնում նաև ընդհանուր հրամանատարը, 2 մարզիչ, տեխնիկական սպասարկման բաժնի 6 մասնագետ:
Հայաստանցի տանկիստներն մրցույթին մասնակցում են 5-րդ անգամ: 2014-ին Հայաստանի տանկիստների թիմը գրավել է «Տանկային բիաթլոնի» երկրորդ տեղը և որպես մրցանակ ստացել Տ-90Ս տանկ, որն էլ Հայաստան է տեղափոխվել 2016թ. ապրիլին:
Առավել մանրամասն՝ սկզբնաղբյուր կայքում:
