21.10.2026 | 23:30
Էրդողանն ու Ալիևը հեռախոսազրույց են ունեցել՝ Բաքվի կողմից Անկարայի նկատմամբ կոշտ քայլերի ֆոնին
Կալանավորը հացադուլի 51-րդ օրը դադարեցրել է այն․ նրա խափանման միջոց կալանքը փոխվել է
Հասարակություն
02.07.2026 | 16:05
«Նուբարաշեն» ՔԿՀ-ում մայիսի 11-ից հացադուլ հայտարարած կալանավոր Հայկ Ստեփանյանը երեկ՝ 51-րդ օրը դադարեցրել է այն։ Կոտայքի մարզի ընդհանուր իրավասության դատարանի դատավոր Արշակ Հարությունյանը, ուսումնասիրելով կալանավորի առողջական վիճակի վերաբերյալ փաստաթղթերը, կրկին քննել է Ստեփանյանի խափանման միջոց կալանքի հարցը և որոշում է կայացրել այն փոխարինել վարչական հսկողությամբ։ Այս մասին Factor TV-ի հետ զրույցում ասաց նրա պաշտպան Դավիթ Թովմասյանը, հավելելով, որ դատարանի որոշումից հետո Ստեփանյանը հացադուլը դադարեցնելու մասին է հայտարարել։
Հիշեցնենք՝ օրեր առաջ Factor TV-ն մանրամասն անդրադարձել էր Ստեփանյանի գործին և հացադուլ հայտարարելու պատճառների մասին։ Նա ամբաստանյալի աթոռին է հայտնվել տեղեկատվական կամ հաղորդակցական տեխնոլոգիաներն օգտագործելով ֆիզիկական ներգործության և խուլիգանության հոդվածների հատկանիշներով։ Ի սկզբանե չի ընդունել առաջադրված մեղադրանքը, բայց հացադուլի դիմել է ոչ միայն այս, այլև անչափահաս երեխաներին տեսնելու հնարավորությունից զրկված լինելու պատճառով․ ավելի քան կես տարի է նրանք խնամքի կենտրոնում են։
Մայիսի 11-ին Ստեփանյանը հացադուլ էր հայտարարել, ինչի հետևանքով առողջական լուրջ խնդիրներ էին առաջացել։ ՔԿՀ-ներում դիտորդական առաքելություն իրականացնող խմբի անդամ Զարուհի Հովհաննիսյանը Factor TV-ի հետ զրույցում նկարագրել էր կալանավորի այն վիճակը, որն իրենք ականատես են եղել հացադուլի 45-րդ օրը։
«Կալանավորը հացադուլ է հայտարարել մայիսի 10-ին։ Առողջական վիճակը ծայրահեղ է գնահատվում․ քաշի զգալի և գիտակցության ժամանակավոր կորուստներ կան, որովհետև երբ խոսում է՝ դրվագային է միտքը, հիշողության խանգարումներ կան։ Ահազանգել է, որ ուշագնացության վիճակում է եղել, ընկել է, հնարավոր է նաև որոշակի խնդիրներ լինեն այդ ընկնելու և հարվածի հետևանքով, որը մինչև վերջ, կարծես թե, հետազոտված չէ»։
Ռոզա Վարդանյան
