Ուրսուլա ֆոն դեր Լայենը գալիս է լուրջ ծրագրով՝ աջակցելու ՀՀ-ին․ ՌԴ-ն հակահայկական է՝ սահմանափակումներ մտցրեց․ Ստեփան Գրիգորյան․ ՏԵՍԱՆՅՈՒԹ

Քաղաքագետ Ստեփան Գրիգորյանը Factor TV-ի եթերում վերլուծել է Ռուսաստանի կողմից Հայաստանի դեմ կիրառվող տնտեսական սահմանափակումների ֆոնին Եվրոպական հանձնաժողովի նախագահ Ուրսուլա ֆոն դեր Լայենի՝ Երևան սպասվող այցի նշանակությունը։ Նրա խոսքով՝ Եվրամիության այս քայլը ուղղակի աջակցություն է Հայաստանին, իսկ Ռուսաստանի ճնշումները պայմանավորված են ոչ թե Հայաստանի արտաքին քաղաքականությամբ, այլ երկրի ներսում գործող ռուսամետ ուժերի առկայությամբ։

«Ինքը գալիս է աջակցելու։ Ինչի՞ մասին է խոսքը։ Հիմա Ռուսաստանը փակեց իր շուկան մեր ապրանքների առջև, ու առաջին հերթին՝ գյուղատնտեսական ապրանքների առջև։ Հիմա այդ ապրանքը պետք է փորձենք ծախել այլ շուկաներում։ Վերջ։ Պետք չի լարվել, պետք չի նեղանալ։ Ռուսաստանը, Պուտինը հակահայկական քաղաքականություն է վարում երկար ժամանակ»,- նշեց նա։

Քաղաքագետը առանձնացրեց Եվրամիությունից սպասվող աջակցության երեք հիմնական ուղղությունները.

Շուկայի բացում. «Առաջինը՝ շուկան բացել։ Օրինակ՝ հանել այդ տուրքերը, մաքսատուրքերը մեր ապրանքների վրա, որ մեր ապրանքը, որը համապատասխանում է եվրոպական ստանդարտներին, մտնի շուկա՝ առանց լրացուցիչ մաքսատուրքերի»։

Ստանդարտներին համապատասխանեցում. «Երկրորդ ուղղությունը՝ աջակցել արագ, որ մի մասը մեր ապրանքների համապատասխանեցնենք եվրոպական ստանդարտներին»։

Ֆինանսական աջակցություն. «Եվ երրորդը, ուղղակի ֆինանսական աջակցություն տալ մեր գյուղատնտեսությանը, մեր ֆերմերներին։ …Որ այդ մեր ֆերմերները դիմանան այս անցումային փուլին»։

Բացի այդ, նրա խոսքով, կլինի նաև չորրորդ կարևոր բաղադրիչ՝ կապված տարածաշրջանային ապաշրջափակման հետ, որի շրջանակներում ԵՄ-ն միլիարդավոր դոլարների հասնող աջակցություն կցուցաբերի Հայաստանին և Ադրբեջանին։

Ի պատասխան այն հարցին, թե ինչու է Հայաստանը գնում Ռուսաստանի հետ հարաբերությունների սրման ռիսկին, Ստեփան Գրիգորյանը զուգահեռներ անցկացրեց Ղազախստանի և Ադրբեջանի հետ։

«Դուք գիտե՞ք, որ Ղազախստանը օրերս ստորագրեց Եվրամիության հետ 10 միլիարդի ծրագիր։ Հայաստանը ինչքան էլ լավ չաշխատի, ֆիզիկական համագործակցությունը կարող է լինել 100 միլիոն, կես միլիարդ, մեկ միլիարդ, բայց 10 միլիարդ չի լինի։ Դուք գիտե՞ք, որ Ղազախստանն ունի CEPA համաձայնագիր, այնպիսին, որ մենք ունենք Եվրամիության հետ։ … Իսկ ինչո՞ւ Ռուսաստանը չի վախեցնում, չի սպառնում Ղազախստանին։ … Ուրեմն պատճառը շատ հասարակ է։ Հայաստանի ներսում կան ռուսամետ ուժեր։ Ադրբեջանում, Ղազախստանում այդպիսի բան չկա։ Ռուսաստանը մեզ վախեցնում է մի պատճառով, որ ներսում կան ուժեր, որոնք կարող են Ռուսաստանի շահերն առաջ տանել»։

Ըստ քաղաքագետի՝ Ռուսաստանի վերջին գործողությունները Հայաստանի նկատմամբ դավաճանություն են, որոնք պետք է պատասխան ստանան։

«Քանի որ Ռուսաստանը, չգիտես ինչու, դավաճանեց Հայաստանին, չգիտես ինչու, Ռուսաստանը պետք է պատժվի։ Ռուսաստանը պետք է պատժվի, քանի որ չկատարեց իր պարտականությունը։ Հիմա դուք կարող եք ասել՝ ինչպե՞ս ենք պատժում։ Մենք պատժում ենք։ Երբ որ Հայաստանը ՀԱՊԿ-ից դուրս է գալիս, Ռուսաստանն էլ չի լինի Հարավային Կովկասում անվտանգության հարցերով»։

Գրիգորյանը նաև հիշեցրեց 44-օրյա պատերազմի ընթացքում Ռուսաստանի դիրքորոշման մասին՝ պնդելով, որ Ղարաբաղի հանձնումը կոռուպցիոն գործարքի արդյունք էր, ինչի վկայությունն էր նաև Հայաստանի հակաօդային պաշտպանության համակարգի չգործելը։

«Պատերազմի ժամանակ մեծ գաղտնիք չի, որ հակաօդային համակարգը Հայաստանի չաշխատեց։ … Դա ի՞նչ է նշանակում։ Երկու բանալի է՝ մեկը Ռուսաստանի գեներալի ձեռքում է, մյուսը՝ Հայաստանի։ Նիկոլ Փաշինյանը, օրինակ, հրաման է տալիս մեր գեներալին՝ միացնել հակաօդայինը, որ պաշտպանի Հայաստանի օդը, Ռուսաստանի գեներալն ասում է՝ մենք օդում չենք տեսնում թշնամուն, ի՞նչ եք ուզում»,- եզրափակեց Ստեփան Գրիգորյանը։

Հարցազրույցն ամբողջությամբ՝ տեսանյութում։

Ռոբերտ Անանյան