Գտնում եմ, որ ողջ ՀՀ-ում պետք է վերաքվեարկություն նշանակվի, անվավեր ճանաչվի այս ընտրությունը․ Օրբելյան․ ՏԵՍԱՆՅՈՒԹ

«Բարգավաճ Հայաստան» կուսակցության ներկայացուցիչ, փաստաբան Արամ Օրբելյանը հայտարարել է, որ Սահմանադրական դատարանը պետք է օգտվի իր լիազորությունից և անվավեր ճանաչի ընտրությունների արդյունքները ողջ Հայաստանի տարածքում։ Ըստ նրա՝ արձանագրված խախտումներն այնպիսին են, որ պետք է նշանակվի նոր վերաքվեարկություն։

Որպես այլընտրանքային տարբերակ՝ փաստաբանն առաջարկում է, որ ՍԴ-ն անվավեր ճանաչի ընտրության արդյունքները և սահմանի մանդատների բաշխման նոր կարգ։ Օրբելյանի պնդմամբ՝ մաթեմատիկական հաշվարկները ցույց են տալիս, որ ԲՀԿ-ն իրականում գերազանցում է 4%-ի շեմը։

«Ըստ էության, այլընտրանքային որոշման դեպքում կլինի այնպես, որ Սահմանադրական դատարանը կասի, որ ԲՀԿ-ն ստացավ «փոքր բրոնզը»։ Այսինքն՝ հաշվի առնելով այն թվերը, որոնք կան (ընդ որում՝ այս երկրորդ որոշումը կարող է կայացվել՝ արձանագրելով, որ Կենտրոնական ընտրական հանձնաժողովն իրավասություն չուներ անվավեր ճանաչել այդ տեղամասերում ընտրության արդյունքները, օրինակ՝ արձանագրելով 48.1 հոդվածի հակասահմանադրական մեկնաբանությունը կամ տալով դրան այլ մեկնաբանություն, դրա լույսի ներքո մեկնաբանելով և տալով դիրքորոշում, կամ անվավեր ճանաչելով այդ հաշվարկի կարգը, որտեղ անվավերները գումարվում են), եթե դրանք տեղի չեն ունենում, նշանակում է, որ Կենտրոնական ընտրական հանձնաժողովը սխալ որոշում է կայացրել. վերաքվեարկություն սահմանելու փոխարեն հաստատել է մանդատների բաշխման կարգ, իսկ այդ դեպքում ընդհանրապես անվավեր են ճանաչվում ընտրությունների արդյունքները»,- ասաց Օրբելյանը։

Մանրամասները՝ տեսանյութում։