«Ինչի՞ եղբայրս կամ հայրս գնան պատերազմ, վարժական հավաքի, իսկ մեկը, ում չի հետաքրքրում ՀՀ-ն, չգնա»․ ՏԵՍԱՆՅՈՒԹ

«Մարդիկ չգիտես ինչու մտածում են, որ երկրի պաշտպանությունը դրված է միայն ինչ-որ խումբ մարդկանց վրա, հիմնականում այդ խումբ մարդիկ սոցիալապես ամենախոցելի մարդիկ են կամ Հայաստանում մշտապես բնակվող։ Ես չգիտեմ ինչի է այդպես, որ իմ եղբայրը կամ հայրը պետք է գնա պատերազմ, հետո էլ նորից այդ պատերազմից երկու ամիս հետո վարժական հավաքների, իսկ ինչ-որ մեկը, ում չի հետաքրքրում Հայաստանի հետ ինչ կլինի, ինքը չգնա վարժական հավաքների»,- հրավիրված հանրային քննարկման ժամանակ ասաց ՔՊ խմբակցության պատգամավոր Թագուհի Ղազարյանը։

Հիշեցնենք՝ խորհրդարանական ընտրություններից օրեր առաջ այլ երկրից, հիմնականում ՌԴ-ից Հայաստան էին գալիս ՀՀ քաղաքացիություն ունեցող անձինք, որոնց մի մասը նշում էր, որ եկել է ընտրություններին մասնակցելու և կրկին հետ վերադառնալու համար։ Նրանց մի մասին 25-օրյա վարժական հավաքներին մասնակցելու ծանուցագրեր են ուղարկվել։ Այս երևույթը վրդովմունք էր առաջացրել ինչպես ընդդիմության, այնպես էլ քաղհասարակության որոշ մասի մոտ. նրանք պնդում էին, որ պետք չէ վարժական հավաքներն օգտագործել որպես «պատժիչ գործիք»։

Իշխող ուժը, սակայն, այլ կարծիք ունի։ «Ես կարծում եմ, որ այդ մեծ հայրենասիրությունը, որից մղված մարդիկ գալիս են Հայաստան կատարելու Հայաստանի ճակատագրի վերաբերյալ որոշում, պետք է դրսևորվի նաև պարտավորությունների միջոցով։ Եվ ես կարծում եմ, որ լավ առիթ է՝ եկել են Հայաստան, թող գնան մոտիկից հայրենիքը սիրեն, հետո կվերադառնան իրենց հիմնական բնակության վայրը»։

Մանրամասները՝ տեսանյութում։