«Ծանր սրտով ենք բաժանվել մեր գործընկերներից»․ՍԴ կազմը ոչ իրավազոր ճանաչելու միջնորդությունը մերժվեց․ ՏԵՍԱՆՅՈՒԹ

«Բարգավաճ Հայաստան» կուսակցության ներկայացուցիչ Արամ Օրբելյանի՝ ՍԴ կազմը ոչ իրավազոր ճանաչելու մասին միջնորդությունը մերժվեց։ Նշենք՝ փաստաբանը պնդում էր դատական կազմից հեռացված 2 դատավորներին՝ Վլադիմիր Վարդանյանին և Արտակ Զեյնալյանին մասնակից դարձնել գործի քննությանը։

Դատավոր Սեդա Սաֆարյանը նշեց, որ այդպիսին միջնորդություն դիտարկել չեն կարող, որովհետև դատավորի անհամատեղելիության հարցի քննարկումը ընթանում է «Սահմանադրական դատարանի մասին» օրենքի համատեքստում, և քննության համար որպես իրավասու սուբյեկտ պետք է հանդես գա դատավորը։

Դատավոր Էդգար Շաթիրյանը նշեց, որ Սահմանադրական դատարանի դատավորի համար մասնակցության անհնարինության ինստիտուտը չպետք է նախատեսվի կամ կիրառելի չպետք է լինի, այս պայմաններում առարկայազուրկ են դառնում նաև դատավորի վարքագծի կանոնների մեծ մասը․ «Նման պայմաններում ես, այնուամենայնիվ, այս պահի դրությամբ ձեր գաղափարը չեմ կիսում, թեպետ այն շատ հետաքրքիր է»։

Դատավոր Երվանդ Խունդկարյանը ասաց, որ դեմ է միջնորդությանը, որովհետև այն, ըստ էության, ենթադրում է արդեն իսկ կայացված աշխատակարգային որոշումների «վերացում»․ «Ես չեմ կարող կողմ քվեարկել այսպիսի միջնորդությանը, բայց նաև արձագանքեմ, որ որպես միջնորդություն մենք պարտավոր ենք այն քննարկել և դիրքորոշում արտահայտել»։

Դատարանի նախագահ Արման Դիլանյանի խոսքով՝ շատ ծանր սրտով են անհնարինություն հայտնել իրենց գործընկերներին, բայց կշեռքի վրա դրված էր հետևյալ հարցը՝ կամ քննում են գործը ոչ լիարժեք կազմով՝ դրանից բխող բոլոր դժվարություններով ու պատասխանատվությամբ, որ կրելու են արդեն 7 դատավորներ, այլ ոչ թե ինը, կամ մյուս կողմից՝ դատարանի լեգիտիմության հետ կապված մտահոգություններով։

«Դատարանը կարող է այս գործերը քննել, ընդհուպ եթե նույնիսկ հինգ դատավոր է մասնակցում քննությանը։ Այսինքն՝ որքան ձայն պահանջվում է այս տեսակի գործերով որոշում կայացնելու համար, այդքան դատավորի ներկայությունը արդեն բավարար է, որպեսզի ասենք՝ դատարան կա: Ես հուսով եմ՝ կարողացա ինչ-որ կերպ հասցնել դատարանի մտադրությունը և այն արժեքները, որ հետապնդել է դատարանը երկու դատավորի մասնակցության անհնարինությունը հայտնելով: Հիմա ես կդնեմ այդ հարցը քվեարկության: Հարգելի գործընկերներ, ովքե՞ր են կողմ բավարարելու միջնորդությունը, խնդրում եմ ձեռք բարձրացնել: Ոչ մի կողմ. միջնորդությունը չբավարարվեց»,- նշեց Դիլանյանը։

Մանրամասները՝ տեսանյութում։