Արցախի դրոշը կրկին հեռացվել է Ֆրանսիայի հրապարակից․ ՏԵՍԱՆՅՈՒԹ

Factor TV-ն առավոտյան արձանագրել է, որ Երևանի Ֆրանսիայի հրապարակից Արցախի դրոշը հեռացված է։ Համացանցում ավելի վաղ տեսանյութ էր տարածվել, որում երևում է դրոշը հեռացնելու պահը։

Հիշեցնենք, որ Արցախի դրոշը տեղադրվել էր 2022 թվականի ապրիլին` իշխանափոխության պահանջով փողոց դուրս եկած «Դիմադրության» շարժման անդամների կողմից։ Այն տևական ժամանակ դրված էր հրապարակում և հեռացվել էր հունիսի 20-ին, իսկ երեկ՝ հունիսի 23-ի առավոտյան արձանագրել էինք, որ ինչ-որ մեկն այն նորից տեղադրել է։

Մինչ այս մի քանի միջադեպ էր տեղի ունեցել հրապարակում տեղադրված դրոշի շուրջ։ 2022 թվականին ԱԺԲ անդամներն այն ներկել էին` նմանեցնելով ՀՀ դրոշին, ինչը կոնֆլիկտի պատճառ էր դարձել ԱԺԲ-ի և ՀՅԴ անդամների միջև։ Ի վերջո՝ Դաշնակցության ներկայացուցիչները ներկված դրոշը փոխարինել էին Արցախի դրոշով։

Վարչապետը Արցախի սիմվոլիկայի օգտագործումը խնդրահարույց է համարել։ Նիկոլ Փաշինյանը ԱԺ-ում Արցախի դրոշների առկայությունը ընդդիմադիրների սեղաններին գնահատել էր որպես պատերազմի վերսկսման սպառնալիք։

«Մենք Ղարաբաղի շարժումը չպետք է շարունակենք։ Ղարաբաղի դրոշների առկայությունը մեր երկրների խորհրդարանում պատերազմի սպառնալիք է։ Ես արդեն ասել եմ այդ խոսույթները 300 հազար ադրբեջանցիների և այլն, մեք ոնց ենք փակում։ Մենք ասում ենք՝ այն էլ չկա, այն էլ չկա։ Երբ դրոշը մարդիկ դնում են այս սեղանին, իրանք դրանով բացում են, սադրում են այդ խոսակցությունը։ Ու հետո դժվար է որոշել` ով առաջինը ինչ ասաց, ով հետո ինչ ասաց», – նշել էր Փաշինյանը։

Անի Թամրազյան