Դիմելու ենք ՍԴ. Լիպարիտ Դրմեյան․ ՏԵՍԱՆՅՈՒԹ

Նրա խոսքով՝ կուսակցությունը դեռևս հունիսի 8-ին՝ ընտրությունների հաջորդ օրը, հայտարարել է, որ չի ընդունում ընտրությունների արդյունքները և անմիջապես սկսել է դրանց բողոքարկման գործընթացը։ «Մենք վիճարկել ենք ամբողջ Երևան քաղաքի բոլոր ընտրատարածքային ընտրատեղամասերում ընտրությունների արդյունքները, խնդրել ենք վերահաշվարկ իրականացնել»,- ասաց Դրմեյանը՝ նշելով, որ վերահաշվարկի դիմումներ են ներկայացվել ոչ միայն Երևանում, այլև մի շարք մարզային ընտրատարածքային ընտրական հանձնաժողովներ։

Նա հիշեցրեց, որ հետագայում «Ուժեղ Հայաստանը» և «Միասնական թևեր» կուսակցությունները դիմել են Կենտրոնական ընտրական հանձնաժողով՝ պահանջելով Ընտրական օրենսգրքի 101-րդ հոդվածի հիման վրա անվավեր ճանաչել Ազգային ժողովի ընտրությունները և նշանակել վերաքվեարկություն։

Դրմեյանի խոսքով՝ ԲՀԿ-ն ևս նման դիմում է ներկայացրել, սակայն այն չի քննարկվել ժամկետների հետ կապված խնդիրների պատճառով։ Անդրադառնալով հունիսի 14-ին ԿԸՀ-ի ընդունած որոշմանը՝ Դրմեյանն ասաց, որ կուսակցությունը չի ընդունում այն և համարում է ոչ իրավաչափ։

«Մենք երեկ հայտարարությամբ հանդես եկանք՝ չընդունելով այդ որոշումը, համարելով այն ոչ իրավաչափ՝ առնվազն մի շարք օրենսդրական խնդիրների և օրենքի պահանջներին հակասող լինելու հիմքով»,- նշեց նա։

Դրմեյանը շեշտեց, որ կուսակցությունը պարտավորված է պաշտպանել իրեն վստահած ընտրողների քվեները։

«Օրենքով չարգելված, իրավաչափ եղանակներով մենք գնալու ենք մինչև վերջ՝ պաշտպանելու այդ 33 հազար 537 քվեները։ Այդ թվում՝ դիմելու ենք Սահմանադրական դատարան»,- հայտարարեց նա։

Կուսակցության պատգամավորի թեկնածուն պնդեց, որ ընտրությունների արդյունքները չեն արտահայտում քաղաքացիների իրական կամքը, քանի որ, ըստ նրա, նախընտրական ողջ գործընթացում ընտրողների նկատմամբ կիրառվել են ճնշումներ և ազդեցության մեխանիզմներ։

«Մեր համոզմամբ՝ ընտրողները չեն կարողացել ազատ արտահայտել իրենց կամքը ընտրատեղամասերում։ Այսինքն՝ խախտվել է Սահմանադրությամբ պաշտպանվող ընտրության ազատությունը, ընտրությունները չեն եղել ազատ և հավասար»,- ասաց Դրմեյանը:

Նա նաև մեղադրեց իշխանություններին պետական և վարչական ռեսուրսների չարաշահման մեջ։ Նրա խոսքով՝ ընդդիմադիր ուժերը քարոզարշավի ընթացքում բազմաթիվ փաստեր և ապացույցներ են ներկայացրել ԿԸՀ-ին, սակայն դրանք պատշաճ գնահատականի չեն արժանացել։ Որպես օրինակ՝ նա հիշատակեց նախկինում հրապարակված ձայնագրությունները, որոնցում ուսումնական հաստատությունների ղեկավարներին հանձնարարություններ են տրվում մարդկանց հավաքագրել և մասնակցություն ապահովել իշխող «Քաղաքացիական պայմանագիր» կուսակցության միջոցառումներին։

«Այդ ձայնագրությունների վերաբերյալ մայիսի 18-ին հաղորդում ենք ներկայացրել գլխավոր դատախազություն, սակայն մինչ օրս որևէ արձագանք կամ տեղեկություն չունենք ընթացքի մասին»,- ասաց Դրմեյանը։

Նա նաև պնդեց, որ քարոզարշավի ընթացքում մի շարք համայնքներում ընդունվել են որոշումներ՝ քաղաքացիներին գույք, ֆինանսական աջակցություն կամ հարկային արտոնություններ տրամադրելու վերաբերյալ, և այդ քաղաքացիները հետագայում մասնակցել են քվեարկությանը։

Մանրամասները` տեսանյութում: