ԵՄ-ն պատժամիջոցներ է սահմանել ՌԴ գլխավոր դատախազի և Պուտինի «հոգևոր հայր» մետրոպոլիտ Տիխոնի նկատմամբ

ԵՄ-ն պատժամիջոցներ է սահմանել Ռուսաստանի գլխավոր դատախազ Ալեքսանդր Գուցանի և Սիմֆերոպոլի ու Ղրիմի մետրոպոլիտ Տիխոնի (աշխարհիկ անունը՝ Գեորգի Շևկունով) նկատմամբ, որին լրատվամիջոցները անվանում են նախագահ Վլադիմիր Պուտինի «հոգևոր հայր», գրում է Current time-ը։

Հաղորդվում է, որ սահմանափակումներ են կիրառվել հետևյալ անձանց նկատմամբ․

• Գերագույն դատարանի դատավոր Օլեգ Նեֆեդով (նա գոյություն չունեցող «միջազգային ԼԳԲՏ շարժումը» և «միջազգային սատանիզմի շարժումը» հայտարարել է «ծայրահեղական», ինչպես նաև ամերիկյան ՖԲԿ իրավաբանական անձը և «Ռուսաստանի հակապատերազմական կոմիտեն» անվանել «ահաբեկչական»);
• Ալեքսանդր Սաբաև, Օմսկի հիվանդանոցի սուր թունավորումների բաժանմունքի վարիչ և Օմսկի մարզի ու Սիբիրյան դաշնային շրջանի գլխավոր թունաբան (նա աշխատել է այն հիվանդանոցում, որտեղ հոսպիտալացվել էր Ալեքսեյ Նավալնին մինչև Գերմանիա տարհանվելը);
• Ալեքսանդր Մուրախովսկի,  նա Օմսկի թիվ 1 շտապ օգնության հիվանդանոցի նախկին գլխավոր բժիշկն է;
• Նավալնիի թունավորմանը մասնակցած և քաղաքական գործչին հետևելու մեջ ներգրավված ԱԴԾ աշխատակիցներ՝ Օլեգ Տայակին, Վալերի Սուխարև, Ալեքսեյ Կրիվոշչեկով, Միխայիլ Շվեց և Վասիլի Կալաշնիկով;
• ՆԳՆ Սանկտ Պետերբուրգի վարչության պետ Ռոման Պլուգին (նա ցուցակում ընդգրկվել էր Սանկտ Պետերբուրգում փողոցային երաժիշտների և ցուցարարների ձերբակալության պատճառով);
• նախկին օմբուդսմեն և փաստաբան Պավել Աստախով։

Պատժամիջոցների ենթարկված իրավաբանական անձանց թվում են NtechLab-ը՝ մշակութային նախաձեռնությունների նախագահական հիմնադրամը, ինչպես նաև «Լուկօյլ»-ի և «Գազպրոմնեֆտ»-ի նավագնացության կազմակերպությունները։

Ընդհանուր առմամբ, Ռուսաստանից և այլ երկրներից ավելի քան 80 անհատ և կազմակերպություն է ավելացվել ԵՄ թարմացված ցուցակում։

ԵՄ-ն հայտարարել է, որ պատժամիջոցներն ուղղված են այն անհատներին և կազմակերպություններին, որոնք, Բրյուսելի կարծիքով, աջակցում են Ռուսաստանի կառավարությանը կամ նպաստում են նախկինում սահմանված սահմանափակումների շրջանցմանը։

Թարգմանությունը՝ Էմմա Չոբանյանի