Փաշինյանն Աննա Հակոբյանին գործուղում է Նյու Յորք

Փետրվարին Աննա Հակոբյանը հայտարարել էր, որ իր և վարչապետ Նիկոլ Փաշինյանի ամուսնությունն ավարտվել է, իսկ ինքը լքում է կառավարական առանձնատունը։ Մի քանի ամիս անց, սակայն, վարչապետի ստորագրած որոշմամբ նա գործուղվում է ԱՄՆ՝ որպես վարչապետի տիկին՝ մասնակցելու Առաջին տիկնանց համաշխարհային ակադեմիայի չորրորդ ամենամյա միջոցառմանը։

Վարչապետ Նիկոլ Փաշինյանի՝ հունիսի 11-ին ստորագրած որոշման մեջ նշվում է․ «Վարչապետի տիկին Աննա Հակոբյանին 2026 թվականի հունիսի 26-ից մինչև հուլիսի 4-ը ներառյալ գործուղել Ամերիկայի Միացյալ Նահանգներ՝ Նյու Յորք՝ Առաջին տիկնանց համաշխարհային ակադեմիայի (Global First Ladies Academy) չորրորդ ամենամյա միջոցառմանը մասնակցելու նպատակով»։

Որոշման համաձայն՝ գործուղման հետ կապված ծախսերը հոգալու է վարչապետի աշխատակազմը։ Մասնավորապես, օրապահիկը կտրամադրվի հունիսի 29-ից մինչև հուլիսի 3-ը ներառյալ՝ Նյու Յորքում գտնվելու օրերի համար, իսկ հուլիսի 4-ին՝ տարանցիկ վայրում՝ Վիեննայում։ Գիշերավարձը ևս նախատեսված է հունիսի 29-ից մինչև հուլիսի 3-ը ներառյալ՝ Նյու Յորքում։

Հիշեցնենք՝ փետրվարի 27-ին Աննա Հակոբյանը հայտարարել էր, որ իր և Նիկոլ Փաշինյանի ամուսնությունն ավարտվել է, և ինքը լքում է կառավարական առանձնատունը։ Դրանից հետո Փաշինյանն էլ հայտարարել էր, որ հարգանքով է վերաբերվում Հակոբյանի որոշմանը։ Սակայն ապրիլի 19-ին, երբ վարչապետը այցելել էր Գյումրի, նրան ուղեկցում էր Աննա Հակոբյանը։ Այդ հանգամանքը դարձավ նոր քննարկումների և ենթադրությունների առիթ՝ հատկապես այն բանից հետո, երբ նախկինում հայտարարվել էր նրանց ամուսնության ավարտի մասին։

Ապրիլի 23-ի կառավարությունում ճեպազրույցի ժամանակ լրագրողները Փաշինյանին հարցրել էին Հակոբյանի հետ հնարավոր միավորման մասին։ Վարչապետը պատասխանել էր, որ Հակոբյանի հայտարարությունից հետո ինքը նշել էր՝ հարգանքով է վերաբերվում այդ որոշմանը, բայց չէր ասել, թե հաշտ է դրա հետ։

«Եվ ես, բնականաբար, այդ տրամաբանությամբ նաև ջանքեր եմ գործադրել, որպեսզի Ձեր ասած իրադարձությունը տեղի ունենա, և ուրախ եմ, որ դա տեղի է ունենում, և ուրախ եմ, որ ևս մեկ շանս ունեմ, որպեսզի մեր ընտանիքը պահպանվի»,- ասել էր Փաշինյանը։

Այժմ, վարչապետի նոր որոշմամբ, Աննա Հակոբյանը գործուղվում է Նյու Յորք՝ մասնակցելու Առաջին տիկնանց համաշխարհային ակադեմիայի միջոցառմանը։ Որոշման մեջ նա ներկայացված է որպես «վարչապետի տիկին»։

Եվգենյա Համբարձումյան