ԲՀԿ-ն դիմելու է վերահաշվարկի և չի բացառում ընտրությունների արդյունքների բողոքարկումը

«Բարգավաճ Հայաստան» կուսակցության նախընտրական շտաբը հայտարարում է, որ ԿԸՀ կայքում կուսակցության ստացած քվեների թվի փոփոխությունների ֆոնին դիմելու է վերահաշվարկի և օգտագործելու է իրավական բոլոր գործիքները։ ԲՀԿ-ից նշում են, որ վերջնականացնում են այն ընտրատեղամասերի ցանկը, որտեղ պահանջելու են վերահաշվարկ, և չեն բացառում նաև ընտրությունների արդյունքների բողոքարկումը։

«Նախորդ օրվա երեկոյից ականատես ենք լինում «Բարգավաճ Հայաստան» կուսակցության ստացած քվեների հետ կապված տարատեսակ թվաբանական աճպարարությունների։ Քվեների հաշվարկի ընթացքում ԿԸՀ կայքում արտացոլվում էր մեկ թիվ, իսկ յուրաքանչյուր հաջորդ թարմացման հետ հայտնվում էր այլ թիվ, ընդ որում՝ նվազած։

Այս պահին «Բարգավաճ Հայաստան» կուսակցության նախընտրական շտաբը հայտարարում է, որ դիմելու է վերահաշվարկի համար, օգտագործելու է իրավական բոլոր գործիքակազմերը և հետամուտ է լինելու ընտրախախտումների բացահայտմանը։

Ներկայումս վերջնականացվում են այն ընտրատեղամասերը, որոնցում պահանջվելու է վերահաշվարկ, ինչպես նաև քննարկվում են առանձին որոշումներ և գործողություններ բողոքարկելու հիմքերը։
Ընդ որում, նշվածը որևէ կերպ չի բացառում նաև ընտրությունների արդյունքների բողոքարկումը՝ հաշվի առնելով ընտրախախտումների այն հսկայական ծավալը, որին ականատես ենք եղել ամբողջ ընտրական գործընթացում»,- ասված է հաղորդագրությունում։

Հիշեցնենք, որ ԿԸՀ-ն ներկայացրել է ԱԺ ընտրությունների նախնական տվյալները, ըստ որի՝ «Քաղաքացիական պայմանագիր» կուսակցությունը հավաքել է  49.825 %, «Ուժեղ Հայաստան»-ը՝ 23.281 %, «Հայաստան» դաշինքը՝ 9.934 %, «Բարգավաճ Հայաստան» կուսակցությունը՝ 3.996 %։ Եվ ըստ այդմ՝ ԲՀԿ-ն չի հաղթահարում կուսակցության համար նախատեսված 4 տոկոսի շեմը։