ՌԴ հայկական գործարար խորհրդի փոխնախագահը ձերբակալվել է ընտրողներին ՀՀ անվճար տեղափոխելու խոստման գործով

Քննչական կոմիտեն հայտնում է, որ ՌԴ-ից Հայաստան ժամանած «ՌԴ հայկական գործարար խորհրդի» փոխնախագահ Ա.Գ.-ն տելեգրամյան ալիքով ՌԴ-ում բնակվող ՀՀ քաղաքացիներին խոստացել է անվճար տեղափոխել Հայաստան և հոգալ կազմակերպչական հարցերը՝ հունիսի 7-ի ԱԺ ընտրություններին նրանց մասնակցությունն ապահովելու նպատակով։ Նշված փաստական հանգամանքների հիմքով նա ձերբակալվել է և ներկայացվել նախաքննական մարմին։

«ՀՀ քննչական կոմիտեում ՀՀ ՆԳՆ ոստիկանությունից ստացված առերևույթ հանցանքի մասին հաղորդման առթիվ նախաձեռնված քրեական վարույթի նախաքննության ընթացքում պարզվել է, որ 2026 թվականի մայիսի 31-ին ՌԴ-ից ՀՀ ժամանած «ՌԴ հայկական գործարար խորհրդի» փոխնախագահ Ա.Գ.-ն տելեգրամյան ալիքով հրապարակային եղանակով՝ ՌԴ-ում ապրող ՀՀ քաղաքացիներին խոստացել է անվճար տեղափոխել ՀՀ և հոգալ տեղափոխման հետ կապված բոլոր կազմակերպչական հարցերը՝ հունիսի 7-ին ՀՀ-ում կայանալիք ԱԺ հերթական ընտրություններում նրանց մասնակցությունն ապահովելու նպատակով:

Նշված փաստական հանգամանքների հիման վրա Ա.Գ.-ն քննիչի որոշմամբ՝ ՆԳՆ ոստիկանության աշխատակիցների կողմից ձերբակալվել է և ներկայացվել նախաքննական մարմին:

Քրեական վարույթի նախաքննության շրջանակում իրականացվում են մի շարք վարութային և ապացուցողական այլ գործողություններ՝ հանցավոր սխեմայում ընդգրկված բոլոր անձանց հայտնաբերելու և նրանց պատասխանատվության ենթարկելու համար»,- ասված է հաղորդագրությունում։