Չկողմնորոշված ընտրողների մոտ ՔՊ-ն առաջատար է մնում․ ArmES-ի նոր հետազոտությունը

«Հայաստանն ընթանում է ճի՞շտ, թե՞ սխալ ուղղությամբ»․ այս հարցին են պատասխանել ArmES-ի («Հայաստանի ընտրական համակարգի ուսումնասիրության կենտրոն») կողմից իրականացված ընտրողների վարքագծի ուսումնասիրության մասնակիցները։

EVN report-ը հրապարակել է 2026 թվականի խորհրդարանական ընտրություններին ընդառաջ անցկացված հետազոտության չորրորդ փուլի արդյունքները։ Հետազոտության համաձայն՝ մայիսին հարցվածների 46,7 տոկոսը նշել է, որ Հայաստանը շարժվում է ճիշտ ուղղությամբ, մինչդեռ 29,6 տոկոսի կարծիքով՝ երկիրը սխալ ճանապարհով է ընթանում։ Ապրիլին նույն ցուցանիշները կազմել էին համապատասխանաբար 44 և 30,9 տոկոս։

Այսպիսով, մեկ ամսվա ընթացքում «ճիշտ ուղղությամբ» պատասխանների մասնաբաժինը աճել է 2,7 տոկոսային կետով, իսկ բացասական գնահատականները՝ նվազել 1,3 կետով։

Դրական փոփոխություն է արձանագրվել նաև վարչապետ Նիկոլ Փաշինյանի գործունեության գնահատականներում։ Եթե ապրիլին նրա աշխատանքը դրական էր գնահատել հարցվածների 49 տոկոսը, ապա մայիսին այդ ցուցանիշը հասել է 52,9 տոկոսի։ Միևնույն ժամանակ բացասական գնահատականները նվազել են՝ 33,7 տոկոսից հասնելով 32 տոկոսի։

Հետազոտության հեղինակների գնահատմամբ՝ աճը հիմնականում պայմանավորված է «առավելապես դրական» պատասխանների ավելացմամբ։ Չկողմնորոշված ընտրողների շրջանում էական տեղաշարժեր չեն արձանագրվել։

Մայիսին նրանց 41,4 տոկոսը դրական է գնահատել վարչապետի գործունեությունը, ինչը գրեթե նույնն է, ինչ ապրիլին գրանցված 41 տոկոսը։ Բացասական գնահատականները, սակայն, փոքր-ինչ աճել են՝ 31,5 տոկոսից հասնելով 32,7 տոկոսի։

Հետազոտության հեղինակները առանձնացնում են մի քանի կարևոր միտումներ։ Նախ՝ չկողմնորոշված ընտրողների գրեթե կեսը՝ 49,3 տոկոսը, հակված է «Քաղաքացիական պայմանագիր» կուսակցությանը ընտրել։ Բացի այդ, հարցվածների 57,6 տոկոսը վստահություն է հայտնել, որ կառավարությունը կկազմակերպի ազատ և արդար ընտրություններ։

Միաժամանակ արձանագրվել է «ԹՐԻՓՓ» նախագծի վերաբերյալ հանրային ընկալումների բարելավում, իսկ քաղաքական ուժերի շարքում փոքր աճ է գրանցել «Ուժեղ Հայաստան»-ը, մինչդեռ «Հայաստան» դաշինքի աջակցությունը մնացել է գրեթե անփոփոխ։

ArmES-ը նշում է, որ ինչպես նախորդ փուլերում, այս հետազոտության ընթացքում ևս կիրառվել է հատուկ մեթոդաբանություն՝ առանձնացնելու չկողմնորոշված ընտրողների նախասիրությունները։ Վերջիններիս մասնաբաժինը հետազոտության վերջնական տվյալներով կազմում է ընտրազանգվածի շուրջ 37 տոկոսը։

Միևնույն ժամանակ, ընդդիմադիր դաշտում ուժերի մասնատվածությունը շարունակում է խնդիրներ ստեղծել առաջատար ուժերի համար։ Հարցման տվյալներով՝ թե՛ «Հայաստան» դաշինքը, թե՛ «Բարգավաճ Հայաստան» կուսակցությունը դեռևս չեն հաղթահարում խորհրդարան անցնելու համար անհրաժեշտ շեմը, թեև «Բարգավաճ Հայաստան»-ը ավելի մոտ է այդ ցուցանիշին։ Ընդդիմադիր ուժերից միայն «Ուժեղ Հայաստանն» է հաղթահարում անհրաժեշտ շեմը։

Մնացած 16 կուսակցությունները մնում են ցածր դիրքում․ դրանցից ոչ մեկը չի գերազանցում 2 տոկոսը, ինչը զգալիորեն ցածր է խորհրդարան անցնելու համար պահանջվող նվազագույն շեմից։

Ամբողջական հետազոտությունը՝ այստեղ։

Անի Թամրազյան