Բաքվի վերաքննիչ դատարանում քննարկվել են Արցախի ռազմաքաղաքական ղեկավարների միջնորդությունները

Բաքվի վերաքննիչ դատարանում հունիսի 2-ին սկսվել է Արցախի ռազմաքաղաքական ղեկավարների և այլ պաշտոնյաների շինծու գործերով դատավճիռների դեմ վերաքննիչ բողոքների քննությունը, հայտնում են ադրբեջանական լրատվամիջոցները։

Նշվում է, որ Բաքվի վերաքննիչ դատարանի դատավոր Էլմար Ռահիմովի նախագահությամբ և դատավորներ Էմին Մեհդիևի և Մեհրիբան Գարաևայի  մասնակցությամբ տեղի ունեցած ​նիստին մասնակցել են, այսպես կոչված, տուժողները և պետական ​​մեղադրողները՝ Գլխավոր դատախազության պետական  մեղադրանքների աջակցության վարչության պետ Աբբաս Աբբասլին, և նույն վարչության դատախազներ Անար Ալեքբերովը և Սևինջ Գասիմովան։

Նախագահող դատավորը բողոքների վերաբերյալ հայ գերիների դիրքորոշումներին ծանոթանալուց հետո հայտարարել է, որ նրանց միջնորդությունները կքննարկվեն հաջորդ փուլում՝ համաձայն օրենքի պահանջների: Նրանք մի շարք միջնորդություններ են ներկայացրել՝ կապված իրենց վերաքննիչ բողոքներում մի շարք պարզաբանումների, դատական ​​նիստին Ադրբեջանի մարդու իրավունքների հանձնակատարի գրասենյակի ներկայացուցչի մասնակցության, վկաների հարցաքննության և այլ հարցերի վերաբերյալ։

Մեկնաբանելով միջնորդությունները՝ պետական ​​մեղադրող Սևինջ Գասիմովան նշել է, որ օմբուդսմենի գրասենյակի ներկայացուցիչը ներկա դատավարության կողմ չէ։ Այս հաստատության ներկայացուցիչը կարող է հանրային հիմունքներով մասնակցել բաց դատական ​​նիստերին։ Օրենքի համաձայն, որպեսզի վերաքննիչ փուլում ընդունվեն նոր ապացույցներ, նախկինում դրանք ներկայացնելու անհնարինության պատճառները պետք է հիմնավորվեն:

Նշվել է, թե նոր վկաների հարցաքննելու միջնորդություն ներկայացնելիս պետք է տրամադրվեն նրանց կոնկրետ անձնական տվյալները։ Մեղադրանքի կողմը նաև նշել է, թե ապացույցների անհիմն հավաքագրումը չպետք է հանգեցնի դատավարության հետաձգման։ Հետևաբար, պետական ​​մեղադրողը խնդրել է դատարանին չբավարարել ներկայացված միջնորդությունները՝ ավելորդ ձգձգումներից խուսափելու համար։

Դատական ​​նիստի ընթացքում նաև ընդգծվել է, որ միջնորդություններից մեկը վերաբերում է դատական ​​նիստերի արձանագրություններին և գործի նյութերին էլեկտրոնային ձևաչափով հասանելիությանը:

Դրանից հետո դատավորների կազմը հեռացել է  խորհրդակցական սենյակ: Դահլիճ վերադառնալուց հետո հրապարակվել են  որոշումները, որոնց համաձայն՝ պաշտպանության կողմի միջնորդությունները մասնակիորեն են  բավարարվել։

Վերաքննիչ բողոքի քննությունը կշարունակվի հունիսի 9-ին։

Թարգմանությունը՝ Էմմա Չոբանյանի