03.08.2026 | 23:30
Տաթև-Լծեն ավտոճանապարհին բեռնատարը դուրս է եկել երթևեկելի հատվածից և բախվել հողաթմբին
Բաքվում տեղի է ունեցել Արցախի ռազմաքաղաքական ղեկավարների վերաքննիչ բողոքների գործով դատական նիստը
27.05.2026 | 11:02
Բաքվի վերաքննիչ դատարանում մայիսի 26-ին սկսվել են Արցախի նախկին ռազմաքաղաքական ղեկավարների և այլ պաշտոնյաների շինծու գործերով դատավճիռների դեմ վերաքննիչ բողոքի նախնական լսումները։ Այս մասին գրում են ադրբեջանական լրատվամիջոցները։
Հաղորդվում է, որ Բաքվի վերաքննիչ դատարանում դատավոր Էլմար Ռահիմովի նախագահությամբ և դատավորներ Էմին Մեհդիևի և Մեհրիբան Գարաևայի մասնակցությամբ նիստում քրեական գործով անցնող «յուրաքանչյուր անձի տրամադրվել են թարգմանիչներ իրենց հասկանալի լեզուներով՝ հայերեն և ռուսերեն, ինչպես նաև փաստաբաններ՝ նրանց պաշտպանությունն ապահովելու համար»։
Նշվում է, որ նիստի ընթացքում մասնակիցներին ներկայացվել են դատարանի կազմը և թարգմանիչները, պարզաբանվել հայ գերիների անձնական տվյալները, բացատրվել նրանց դատավարական իրավունքներն ու պարտականությունները։
Կողմերը հայտարարել են, թե դատարանի կազմի և թարգմանիչների վերաբերյալ առարկություններ չունեն։
Պետական մեղադրանքը պաշտպանող դատախազ Անար Ալեքպերովը հայտարարել է, որ վերաքննիչ բողոքները ներկայացվել են քրեական դատավարության օրենսդրության պահանջներին համապատասխան։ Մեղադրող կողմը պնդում է, որ վերաքննիչ վարույթ սկսելու համար օրենքով սահմանված դատավարական պայմանները բավարարվել են, և գործը կարող է նշանակվել դատաքննության՝ առանց լրացուցիչ ապացույցներ ներկայացնելու անհրաժեշտության։
Ներկայացված միջնորդությունները քննարկելուց, ինչպես նաև այդ միջնորդությունների վերաբերյալ կողմերի դիրքորոշումները քննելուց հետո դատարանը հեռացել է խորհրդակցական սենյակ։
Հաղորդվում է, որ դատաքննությունը տեղի կունենա հունիսի 2-ին՝ առանց քննություն անցկացնելու կամ լրացուցիչ ապացույցներ հետազոտելու։
Թարգմանությունը՝ Էմմա Չոբանյանի
