Եթե ՀՀ-ն շարունակի ԵՄ անդամակցության գործընթացը, ՌԴ-ն կդադարեցնի գազի ու նավթամթերքի մատակարարման համաձայնագիրը․ Զախարովա

Նոր սպառնալիք Մոսկվայից․ Ռուսաստանի ԱԳՆ պաշտոնական ներկայացուցիչ Մարիա Զախարովան ՌԻԱ Նովոստիի հետ զրույցում հայտարարել է, որ ռուսական կողմը տեղեկացրել է Երևանին՝ եթե ԵՄ-ին Հայաստանի անդամակցության գործընթացը շարունակվի, այն կկասեցնի կամ կչեղարկի գազի և նավթամթերքի մատակարարման վերաբերյալ համաձայնագիրը։

«2026 թվականի մայիսի 27-ին Հայաստանում ՌԴ դեսպանատունը պաշտոնապես հայկական կողմին է փոխանցել Ռուսաստանի Դաշնության էներգետիկայի նախարար Սերգեյ Ցիվիլևի՝ ՀՀ Տարածքային կառավարման և ենթակառուցվածքների նախարարությանը ուղղված նամակը, որում տեղեկացվում է, որ եթե ԵՄ-ին Հայաստանի անդամակցության գործընթացը շարունակվի, ռուսական կողմը կդադարեցնի կամ միակողմանիորեն կչեղարկի ՌԴ կառավարության և ՀՀ կառավարության միջև 2013 թվականի դեկտեմբերի 2-ի՝ ՀՀ բնական գազի, նավթամթերքի և չմշակված ադամանդների մատակարարման ոլորտում համագործակցության մասին համաձայնագիրը»,- նշել է նա։

Ավելի վաղ «Կոմերսանտը», հղում անելով Ռուսաստանի էներգետիկայի նախարար Սերգեյ Ցիվիլևի՝ Հայաստանի ՏԿԵ նախարարությանն ուղղված նամակին, հաղորդել էր, թե Ռուսաստանը կարող է կասեցնել կամ միակողմանիորեն դադարեցնել 2013 թվականի դեկտեմբերին հանրապետություն բնական գազի, նավթամթերքի և չմշակված ադամանդի մատակարարման վերաբերյալ համաձայնագիրը, եթե Երևանը շարունակի ԵՄ-ին անդամակցելու գործընթացը։

Ավելի ուշ ՀՀ Տարածքային կառավարման նախարարությունը հայտնել էր, որ  հայկական կողմը Ռուսաստանից որևէ  նման նամակ չի ստացել։

Թարգմանությունը՝ Էմմա Չոբանյանի