03.08.2026 | 21:48
SOCAR-ը ձեռք է բերել ճապոնական ITOCHU ընկերության բաժնեմասը Ազերի-Չիրագ-Գյունեշլի նախագծում
Կարելի՞ է քվեարկել ժամկետանց անձնագրով. պարզաբանում է Նելլի Դավթյանը
24.05.2026 | 13:20
«Եթե քաղաքացու անձը հաստատող փաստաթղթի ժամկետը լրացած է, կարող է նա մասնակցել ընտրություններին, թե ոչ։ Այս հարցի պատասխանը բաղկացած է երկու մասից՝ իրավիճակներ, երբ քաղաքացու անձը հաստատող փաստաթղթի ժամկետը լրացած է մինչև վեց ամսով, և իրավիճակներ, երբ քաղաքացու անձը հաստատող փաստաթղթի ժամկետը լրացած է ավելի քան վեց ամսով»,- հայտնում է ՆԳՆ միգրացիայի և քաղաքացիության ծառայության պետ Նելլի Դավթյանը։
«Առաջին պարագայում անձը կարող է մասնակցել ընտրություններին. նա պետք է գտնի իր անունը ցուցակներում և միանգամից քվեարկության օրը՝ հունիսի յոթին, ժամկետանց անձնագրով կարող է միանգամից մոտենալ ընտրատեղամաս և իրացնել իր ընտրելու իրավունքը։
Երկրորդ պարագայում անձը պետք է փոխանակի իր անձնագիրը, և դա պետք է անել արդեն այսօր: Փոխանակված անձնագրով անձը կարող է հանգիստ քվեարկել: Իսկ եթե դիմումը ներկայացրել է, սակայն մենք դեռևս չենք հասցրել անձնագիրը տպագրել և տրամադրել քաղաքացուն, ապա նրան տրամադրելու ենք հատուկ տեղեկանք, որով կրկին կարող է մասնակցել ընտրություններին:
Բայց այստեղ կա նաև երրորդ սցենար, երբ անձը ստացել է քաղաքացիություն և երբևէ դեռևս չի անձնագրավորվել. պետք է խնդրենք մինչև քվեարկության օրը անպայման հասցնել ձեռք բերել անձնագիր, որովհետև դա նախապայման է քվեարկությանը մասնակցելու համար»,-նշել է նա։
