Դիմել եմ ՌԴ դեսպանատուն պարզաբանում ստանալու համար. Նարեկ Կարապետյանը` ՌԴ քաղաքացի լինելը հերքում է․ ՏԵՍԱՆՅՈՒԹ

Նարեկ Կարապետյանն այսօր՝ մայիսի 20-ին, Factor TV-ի լրագրողի հարցին ի պատասխան շարունակեց պնդել, որ ՀՀ քաղաքացիությունից բացի այլ քաղաքացիություն երբեք չի ունեցել․ «Իրավաբանները դիմել են ՌԴ դեսպանատուն, ամենայն հավանականությամբ, որպեսզի պատասխան տրվի»։

Լրագրողի հարցին՝ «Մոսպրոմեքսպլուատացիա» ՍՊ ընկերությունում նա բաժնետե՞ր է, թե՞ ոչ, Կարապետյանն արձագանքեց․ «Չգիտեմ՝ ինչ ընկերության մասին է խոսքը, բայց կարող եք վստահ լինել՝ ընկերության բաժնետեր ես կարող եմ լինել, բայց ՀՀ-ից բացի այլ երկրի քաղաքացիություն չեմ ունեցել»։

«Մոսպրոմեքսպլուատացիա»-ի վերաբերյալ Կարապետյանը նշեց՝ ծանոթ ընկերություն է, նշեց՝ մի քանի ընկերություններում բաժնետեր է, այդ թվում՝ այս մեկում։

Առավոտյան Քննչական կոմիտեն հաղորդագրություն տարածեց, ըստ որի, ԱԺ պատգամավորի թեկնածու, «Ուժեղ Հայաստան» կուսակցության ցուցակի առաջին համար Նարեկ Կարապետյանը թաքցրել է օտար պետության քաղաքացիություն ունենալու մասին տեղեկությունը, ինչի հիմքով ՀՀ ՆԳՆ-ն հանցագործության մասին հաղորդում է ներկայացրել Քննչական կոմիտե։

Կարապետյանի ՌԴ քաղաքացի լինելու մասին տեղեկություններ սկսվեցին շրջանառվել մայիսի 19-ին, ԱԺ նախագահ Ալեն Սիմոնյանը Ռուսաստանի իրավաբանական անձանց միասնական պետական ​​գրանցամատյանից փաստաթղթեր է հանրայնացրել։ Դրանք վերաբերում էին «Մոսպրոմեքսպլուատացիա» սահմանափակ պատասխանատվությամբ ընկերությանը։ Սքրինշոթում երևում է, որ Նարեկ Կարենի Կարապետյանը նշված ընկերության բաժնետեր է, ունի ՌԴ քաղաքացիություն։

Մանրամասները՝ տեսանյութում։