56․2 մլն դրամի նվիրատվություն․ ինչ է հայտարարագրել «Ուժեղ Հայաստան»-ի ցուցակի առաջին համարը

Առաջիկա խորհրդարանական ընտրությունների մասնակից ուժերի ներկայացուցիչները Կենտրոնական ընտրական հանձնաժողով են ներկայացրել իրենց գույքի և եկամուտների հայտարարագրերը՝ 2026-ի ապրիլի 1-ի դրությամբ։ Factor.am–ն ուսումնասիրել է դրանք և առանձնացրել է քաղաքական ուժերի ցուցակների առաջին համարների ունեցվածքը։

«Ուժեղ Հայաստան» դաշինքի ցուցակը գլխավորող Նարեկ Կարապետյանը 56․2 մլն դրամ նվիրատվություն է ստացել Արթուր Հովագիմյանից։ Վերջինս Նարեկի աներորդին է և Կարապետյանների բիզնեսների մասնակից։ «Տաշիր կապիտալ» ՓԲԸ-ից Նարեկ Կարապետյանը վերջին 1 տարում ընդամենը 675 հազար դրամ աշխատավարձ է ստացել, թեև 2018-ից ընկերության գլխավոր տնօրեն է։

Կարապետյանը հայտարարագրել է 16․6 մլն դրամ, 1․8 մլն դոլար, 2․1 մլն եվրո դրամական միջոցներ։ Նրան են պատկանում «Տաշիր Ագրո» ՓԲԸ-ի 100%, «Սյունէներգաշին» ՓԲԸ-ի 98․8%, «Թի Թաուեր» ՓԲԸ-ի 50% բաժնեմասերը։

ԿԸՀ ներկայացրած հայտարարագրում, ի տարբերություն Կոռուպցիայի կանխարգելման հանձնաժողով ներկայացրած հայտարարագրի, Կարապետյանը 1 անշարժ գույք պակաս է ներկայացրել․ նա չի նշել Երևանի Արաբկիրում իր առանձնատունը, միայն նշել է ունեցած 15 գույքը՝ 1 բնակելի տուն Լեռնահովիտում, 1 բնակարան Մոսկվայում (128․4 քմ), 12 հողամաս Տաշիրում (ընդհանուր 3․8 հա), 1 հողամաս Երևանի Վահագնի թաղամասում (0․4 հա)։

Նա ունի 2 ավտոմեքենա՝ Toyota Camry (2025-ի արտադրության) և Mercedes-Benz Maybach (2021-ի արտադրության)։

Գայանե Խաչատրյան