28.09.2026 | 23:18
Հայաստանի մի շարք հասցեներում էլեկտրաէներգիայի անջատումներ կլինեն
Firebird-ի նախագծի մի մասը ֆինանսավորեցին Հայաստանի երկու կենսաթոշակային հիմնադրամներ․ ԿԲ նախագահ․ ՏԵՍԱՆՅՈՒԹ
Տնտեսություն
05.05.2026 | 11:55
Ազգային ժողովում այսօր Կենտրոնական բանկի նախագահ Մարտին Գալստյանը, պատասխանելով պատգամավոր Արծվիկ Մինասյանի հարցերին, անդրադարձավ Հայաստանի ֆինանսական համակարգի կարևոր ցուցանիշներին՝ կենսաթոշակային ակտիվներից մինչև վարկերի տոկոսադրույքներ։
Մարտին Գալստյանը հայտնեց, որ կուտակային կենսաթոշակային ֆոնդերի միջոցներն արդեն գերազանցել են 1 տրիլիոն դրամը, որի առնվազն 60%-ը ներդրված է հենց Հայաստանում։ Նա ընդգծեց, որ օրենսդրական փոփոխությունների շնորհիվ ֆոնդերն այժմ կարող են իրենց միջոցների 10%-ն ուղղել տնտեսության իրական հատվածին։ Որպես օրինակ ԿԲ նախագահը նշեց «Firebird» նախագիծը, որը ֆինանսավորվել է հայաստանյան երկու կենսաթոշակային հիմնադրամների կողմից։
Անդրադառնալով կապիտալի շուկային՝ Գալստյանը նշեց, որ վերջին տարիներին նկատվում է կորպորատիվ պարտատոմսերի թողարկման ծավալների էական աճ։ Սակայն, ըստ նրա, համակարգում առկա է պարադոքսալ իրավիճակ․ «Թե՛ բանկերն ունեն բավականին մեծ միջոցներ, թե՛ կենսաթոշակային հիմնադրամները։ Փող շատ կա, բայց մենք իրական պրոյեկտների կարիք ունենք»։
ԿԲ նախագահի խոսքով՝ հիմնական խնդիրը ոչ թե ֆինանսավորման բացակայությունն է, այլ բիզնեսի կողմից որակյալ և շահութաբեր ծրագրերի պակասը։
Պատգամավորի դիտարկմանը, թե վարկային տոկոսադրույքները շարունակում են մնալ բարձր, Մարտին Գալստյանը պարզաբանեց, որ վերջին երեք տարում վարկային պորտֆելը տարեկան 20%-ով աճել է։
Մանրամասները՝ տեսանյութում։
