Սամվել Կարապետյանի թիմակից Ալեքսան Ալեքսանյանն անցած տարեսկզբին ՔՊ-ին 2 մլն դրամի նվիրատվություն է արել 

«Քաղաքացիական պայմանագիր» կուսակցությունն անցած տարի մոտ 774․8 մլն դրամի մուտքեր է ունեցել, որից 6․7 մլն-ը ոչ դրամական միջոցներ են եղել, 234․7 մլն-ը՝ պետական ֆինանսավորում, 416․7 մլն-ը՝ նվիրատվություններ, 113․3 մլն-ը՝ անդամավճարներ։ Կոռուպցիայի կանխարգելման հանձնաժողովին ՔՊ-ի ներկայացրած տարեկան հաշվետվության համաձայն՝ կուսակցությունը 2025-ի ընթացքում ծախսել է մոտ 745․7 մլն դրամ։ Դրանից 6․7 մլն-ը՝ կրկին ոչ դրամական միջոցներ են, 255․5 մլն-ը՝ այլ ելքեր, այդ թվում՝ Գյումրու, Փարաքարի, Վաղարշապատի նախընտրական հիմնադրամի, աուդիտորական ծառայությունների, համաժողովների կազմակերպման վճարներ, ներկայացուցչական ծախսեր են։ Ծախսերից մոտ 179 մլն դրամը գույքի վարձակալության վճարներ են, մոտ 84 մլն-ը՝ հարկեր և տուրքեր, 12․9 մլն-ը՝ կոմունալ վճարներ։

Factor.am-ը, ուսումնասիրելով ՔՊ-ի հաշվետվությունը, նվիրատվություն կատարած անձանց մեջ հայնաբերեց խիստ ուշագրավ մի անուն։ Պարզվում է՝ անցած տարի մարտի 7-ին Ալեքսան Բենիամինի Ալեքսանյանը 2 մլն դրամ նվիրատվություն է կատարել իշխող ուժին։ Ալեքսանյանը ներկայիս «Ուժեղ Հայաստան» կուսակցության անդամ Ալեքսան Բենիամինի Ալեքսանյանն է։ Մինչև վերջերս նա «Ուժեղ Հայաստան»-ի քաղաքական խորհրդի անդամ էր։ Ըստ ընտրողների ռեգիստրի՝ Հայաստանում այդ անուն ազգանունով միայն 1 անձ կա։

Ալեքսանյանին են պատկանում «Մեր ձևով» ազգային արժեքների պահպանության ՀԿ-ն, «Արմատ մեդիա», «Թաունհաուս», «Ասսեթ Մենեջմենթ», «Ֆորտունա» ընկերությունները։

Նկատենք, որ այն ժամանակ, երբ Ալեքսանյանը կատարել է նվիրատվությունը, Սամվել Կարապետյանն ազատության մեջ էր և Հայաստանում քաղաքականությամբ զբաղվելու հայտ դեռևս չէր ներկայացրել։  

Հայտնի է, որ Ալեքսանյանը երկքաղաքացի է, և այդ պատճառով չի ընդգրկվել «Ուժեղ Հայաստանի» նախընտրական ցուցակում։  Ըստ «Կուսակցությունների մասին» ՀՀ օրենքի՝ կուսակցություններին նվիրատվություններ կատարելն արգելվում է օտարերկրյա քաղաքացիներին: Սակայն երկքաղաքացուն, որը  օտարերկրյա պետության հետ իրավական կապ ունեցող անձ է, օրենքը չի արգելում նվիրատվություններ կատարել։ 

Գայանե Խաչատրյան