13.05.2026 | 23:30
Ադրբեջանը հիշատակվում է Պենտագոնի կողմից հրապարակված չբացահայտված թռչող օբյեկտների ֆայլերում
Ադրբեջանում դատարանը ռուս ծրագրավորողին 4 տարվա ազատազրկման է դատապարտել
Քաղաքականություն
22.04.2026 | 19:53
Ադրբեջանում Ալեքսանդր Վայսերոն ազատազրկման է դատապարտվել փողերի լվացման մեղադրանքով։ Գործը քննվել է Բաքվի ծանր հանցագործությունների դատարանում։ Ադրբեջանական լրատվամիջոցների հաղորդմամբ՝ պետական մեղադրող Թուրալ Յագուբովը մեղադրյալի համար հինգ տարվա ազատազրկում էր պահանջել։
Դատարանը, սակայն, որոշել է Ալեքսանդր Վայսերոյին դատապարտել չորս տարվա ազատազրկման։
Ըստ հետաքննության՝ նա գործել է որպես անձանց խմբի մաս՝ նախնական դավադրության շրջանակում, և լվացել է խոշոր չափի գումար։ Այն ձեռք է բերվել երկրից դուրս գործող անօրինական խաղատների, վիճակախաղերի և այլ խաղատների կայքերի միջոցով։
Գումարի աղբյուրը թաքցնելու համար մեղադրյալն այն մաս-մաս փոխանցել է տարբեր անձանց տրամադրված բանկային քարտերին։ Լվացված ընդհանուր գումարը կազմել է 727,024.40 մանաթ (շուրջ 427 հազար դոլար)։
Վայսերոն ձերբակալվել, ապա կալանավորվել էր այս տարվա մարտին։ Նրան մեղադրանք է առաջադրվել Ադրբեջանի Քրեական օրենսգրքի 193-1.3.2 հոդվածով (հանցավոր ճանապարհով ձեռք բերված գույքի լվացում):
Ալեքսանդր Վայսերոն Եկատերինբուրգից ձեռնարկատեր և ծրագրավորող է, որն Ադրբեջան է ժամանել որպես զբոսաշրջիկ 2025 թվականի հունիսին, հայտնում է նրա ընտանիքը։ Նա և մի շարք ռուսներ ձերբակալվել էին Բաքվում 2025 թվականի հուլիսի 1-ին՝ Ռուսաստանի և Ադրբեջանի միջև դիվանագիտական հակամարտության ֆոնին։ Դրանից կարճ ժամանակ առաջ ԱԴԾ-ն Եկատերինբուրգում ադրբեջանական սփյուռքի դեմ ռեյդ էր իրականացրել, որի արդյունքում երկու մարդ էր զոհվել։
Թարգմանությունը՝ Էմմա Չոբանյանի
