Սարիկ Մինասյանի կողմից համացանցում հայհոյանքներ գրելու դեպքով վարույթ չի նախաձեռնվել

ՔՊ-ական Սարիկ Մինասյանի կողմից համացանցում հայհոյանքներ գրելու  դեպքի առթիվ Դատախազությունում վարույթ նախաձեռնելու վերաբերյալ տվյալներ չկան։ Այս մասին Factor TV-ի գրավոր հարցմանն ի պատասխասն հայտնել են Գլխավոր դատախազությունից:

Նշենք, որ Սարիկ Մինասյանը երկու օր առաջ համացանցում վեճի է բռնվել օգտատերերի հետ ու հայհոյանքներ գրել։ Դատախազության ձևավորած պրատիկայում հանրության ներկայությամբ հայհոյանքներ հնչեցնելը որակվում է որպես խուլիգանություն, ուստի փորձեցինք պարզել՝ արդյոք ուսումնասիրվել են Մինասյանի կողմից հնչեցրած արտահայտությունները՝ խուլիգանության հոդվածով քրեական վարույթ նախաձեռնելու հարցը լուծելու համար։ Ի պատասխան Դատախազությունից գրավոր հարցում էին պահանջել, որին պատասխանելով, փաստորեն, հայտնել են, որ դեպքի առթիվ վարույթ  առկա չէ։

Սարիկ Մինասյանն ավելի ուշ հանդես էր եկել հայտարարությամբ և ներողություն խնդրել։ «Սիրելի ընկերներ, նախ շնորհավորում եմ բոլորիս երեկվա աննախադեպ երթի և ստացված համերգի առիթով: Որոշ շրջանակներ չկարողանալով զսպել իրենց նախանձն ու անբարո վարքագիծը՝ ֆեյք օգտահաշիվներով գրոհեցին էջս, մեկնաբանություններում անպարկեշտ, վիրավորական գրառումներ անելով, թիրախավորելով ոչ միայն իմ անձը, այլ ընտանիքս, քաղաքական թիմիս։ Հայկական մտածելակերպին տուրք տալով` որպես արժանապատիվ տղամարդ, տրվեցի նպատակաուղղված սադրանքներին և որոշ ֆեյքերի պատասխանել եմ հայելային։ Որպես հանրային և քաղաքական գործիչ սխալ եմ թույլ տվել, որի համար հայցում եմ ձեր ներողամտությունը։ Նաև շնորհակալ եմ հարյուրավոր նամակների և մեկնաբանությունների համար, որտեղ դուք ձեր անկեղծ աջակցություն եք հայտնել։ Բոլորիս խնդրում եմ լինել զգոն մեր վարքագծում, ցուցաբերել սառնություն նման սադրանքների դեպքում։ Նաև հորդորում եմ` մարդկանց չթիրախավորել և չվիրավորել քաղաքական հայացքների համար։ Աստված բոլորիս օգնական»,- գրել էր Մինասյանը։

Արաքս Մամուլյան