06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
ՌԴ-ում հետախուզում են հայտարարել Երևանում սպանված չեչեն Այշատ Բայմուրադովայի մահվան մեջ կասկածվողների նկատմամբ
Հասարակություն
10.04.2026 | 11:26
Ռուսաստանի ՆԳՆ-ի հետախուզվողների ցուցակում ավելացվել են Կարինա Իմինովայի և Սաիդ-Խամզատ Բայսարովի տվյալները, որոնք, ենթադրաբար, ներգրավված են եղել Երևանում չեչեն Այշատ Բայմուրադովայի սպանության մեջ, հաղորդում է СК SOS ճգնաժամային խումբը, գրում է Current time-ը։
Չի նշվում ո՛չ հոդվածը, որով նրանք հետախուզվում են, ո՛չ էլ հայտարարության ամսաթիվը։ Իմինովայի գործում նշված է երկու քաղաքացիություն, մինչդեռ նմանատիպ տեղեկություններ Բայսարովի վերաբերյալ բացակայում են։ Իմինովան առանձին նշված է որպես անհետ կորած, ինչը կարող է վկայել նրա մտերիմների կողմից զուգահեռ որոնումների մասին, նշել են իրավապաշտպանները։
Հայաստանը կասկածյալների նկատմամբ հետախուզում էր հայտարարել դեռևս 2025 թվականի նոյեմբերին, իսկ դեկտեմբերին հարցումներ էր ուղարկել Ինտերպոլ և Ռուսաստան, սակայն մինչև 2026 թվականի փետրվարը Ռուսաստանից որևէ պատասխան չի ստացվել։
Ըստ հրապարակման՝ Բայմուրադովան իրավապաշտպաններից օգնություն էր խնդրել 2024 թվականի հունվարին՝ հայտարարելով ընտանեկան բռնության մասին: Բայմուրադովայի ծանոթները պատմել են, որ նրա հայրը նախկինում ծառայել է չեչենական անվտանգության ուժերում, և մասնավոր զրույցներում նա բացահայտել է, որ իր տատիկն Ախմատ Կադիրովի՝ Չեչնիայի առաջին նախագահի և հանրապետության ներկայիս ղեկավար Ռամզան Կադիրովի հոր զարմուհին է: Հյուսիսային Կովկասի բնակիչների հետ աշխատող առնվազն երկու անկախ ճգնաժամային խմբեր՝ СК SOS-ը և «Մարեմ»-ը, օգնել են երիտասարդ կնոջ տարհանմանը:
Հայաստան փախչելուց հետո Այշատը սոցիալական ցանցերում գրառումներ էր անում, որոնցում քննադատում էր Կադիրովի ռեժիմը, Չեչնիայի հայրիշխանական համակարգը, տեղի տղամարդկանց և իսլամը, նա չէր թաքցնում իր գտնվելու վայրը։ Նրա մարմինը՝ բազմաթիվ վնասվածքներով, հայտնաբերվել է Երևանի բնակարաններից մեկում 2025 թվականի հոկտեմբերի 19-ին։
ՀՀ ոստիկանությունը պարզել է, որ սպանության գիշերը երկու անձ՝ Կարինա Իմինովան և չեչեն Սաիդ-Խամզատ Բայսարովը, դուրս են եկել այն բնակարանից, որտեղ հայտնաբերվել է մարմինը։ Երկուսն էլ նույն օրը լքել էին Հայաստանը։
Ըստ Meduza-ի՝ Խամզատ Բայսարովը գործարար Ռուսլան Բայսարովի զարմիկն է, որը Չեչնիայի առաջնորդ Ռամզան Կադիրովի ընկերն է։ Նա դատապարտվել էր ահաբեկչության ֆինանսավորման համար, սակայն բոլոր մեղադրանքները հանվել էին 2019 թվականին։
Թարգմանությունը՝ Էմմա Չոբանյանի
