Անդրանիկ Քոչարյանը ներողություն է խնդրում

ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը ներողություն է խնդրել երեկ իր արած արտահայտության համար։

«Սիրելի’ հայրենակիցներ,

Ապրիլի 6-ին ԱԺ-ում ճեպազրույցի ժամանակ ՀՀ զինված ուժերում ավագ որդուս կողմից ծառայության չանցնելու մասին լրագրողի հարցին իմ պատասխանով նպատակ ունեի ընդգծել, թե Հայաստանի Հանրապետության օրենսդրությամբ որքան են արժևորվում կրթությունը և գիտական գործունեությամբ զբաղվելը, որ անձանց, ովքեր ունեն՝ պետությանն իրենց գիտական ներուժով ծառայելու պատրաստակամություն, տրված է նման հնարավորություն։

Իմ երկու որդիներից ավագն անցել է անհրաժեշտ կրթական բոլոր աստիճանները և զբաղվում է գիտությամբ, իսկ կրտսեր որդիս ծառայել է ՀՀ զինված ուժերում և մասնակցել 44-oրյա պատերազմին։

Ցավում եմ, որ պատասխանս տարակարծությունների և շահարկումների տեղիք է տվել, ինչի համար ներողություն եմ խնդրում»,- գրել է նա իր ֆեյսբուքյան էջում։

Հիշեցնենք՝ Քոչարյանը երեկ լրագրողների հետ ճեպազրույցում հայտարարել էր, որ իր որդի Լևոն Քոչարյանը չի ծառայել բանակում, քանի որ «բարձրակարգ տղա» է․ «Իմ տղան շատ բարձրակարգ է»։

Բացի սեփական որդուն որպես «բարձրակարգ» բնութագրելը, ԱԺ պաշտպանության հանձնաժողովը նախագահող Անդրանիկ Քոչարյանը այլ մանրամասներ չէր ներկայացրել, թե ինչու որդին զինվորական ծառայություն չի անցել։

Factor TV-ի ճշտող հարցին Քոչարյանը միայն իր տղայի գիտելիքների մասին էր ակնարկել․ «Դու, որ նրա գիտելիքների չափ ունենայիր, դու էլ չէիր ծառայի»։

Ուշագրավ է, որ իշխող թիմից երեկ առողջապահության նախարար Անահիտ Ավանեսյանն էր ափսոսանք հայտնել թիմակցի փոխարեն։ «Մեծ ցավ ապրեցի պարոն Անդրանիկ Քոչարյանի կողմից այսօր թույլ տված անզգույշ արտահայտության համար, և նորից պետք է ընդգծեմ՝ Հայոց բանակում ծառայում են մեր արժանավոր ու լուսավոր տղաները, ովքեր նախընտրում են իրենց պարտքը հայրենիքի առաջ տալ նաև մինչ իրենց ուսումնառությունը։ Բանակում ծառայելը պատիվ է և կյանքի մեծ դպրոց, որը այլ բանով չի փոխարինվի։ Բարի ծառայություն մեր բոլոր զինվորներին և հաջող ուսումնառություն մեր տղաներին․ նրանք բոլորը մեր երկրի հպարտությունն են։ Երկու զինվորի հպարտ մամա»,- երեկ ուշ երեկոյան գրել էր զինվորների մայր Անահիտ Ավանեսյանը, իսկ Անդրանիկ Քոչարյանը, փաստորեն, որոշել է քննադատություններին արձագանքել միայն այսօր առավոտյան։

Նարեկ Կիրակոսյան