Պապիկյանի ցուցադրած բունկերը կդիմանա առաջին հարվածին, բայց հրետանու, հրթիռի հարվածի դիմադրել ունակ չեն․ Վովա Վարդանով․ ՏԵՍԱՆՅՈՒԹ

«Ողջ մնալու արվեստ» կազմակերպության ղեկավար Վովա Վարդանովը Factor TV-ի հետ զրույցում անդրադարձել է Հայաստանի ռազմական գնումներին, բանակի մարտունակությանը և ռազմարդյունաբերության խնդիրներին։ Նա համոզված է, որ Հանրապետության հրապարակում զինտեխնիկայի ցուցադրությունը «թոզ փչոցի» է՝ հանրությանը հանգստացնելու համար։

Նիկոլ Փաշինյանի հայտարարությանը, թե մայիսի 28-ին Հանրապետության հրապարակում կցուցադրվեն Հայաստանի ձեռք բերած զինատեսակները՝ որպես հաշվետվություն հանրությանը, «Ողջ մնալու արվեստ» կազմակերպության ղեկավար Վովա Վարդանովը թերահավատորեն է վերաբերվում։

«Դա հենց թոզ փչոցի է։ Դա մարդկանց հանգստացնելու ձևերից մեկն է», – ասում է նա։

Վարդանովի խոսքով, ինչքան թույլ է բանակը, այնքան շատ զենք է ուզում ցուցադրել։ Նա զուգահեռներ է տանում երրորդ նախագահի օրոք տեղի ունեցած զորահանդեսների հետ և նշում, որ այժմ նույնը պատրաստվում է անել գործող իշխանությունը։ «Մենք այդ վիճակից պիտի դուրս գանք, թույլ վիճակից պիտի դառնանք ուժեղ»,- ընդգծում է նա։

Անդրադառնալով վերջին տարիների ռազմական գնումներին, Վարդանովը հիշեցնում է «Իսկանդեր» հրթիռային համալիրների ձեռքբերումը՝ կասկածի տակ դնելով դրանց արդյունավետությունը 2020 թվականի պատերազմի ժամանակ։ 

«20 թվականին մեզ շատ օգնե՞ց դա։ Ինչքան գիտեմ՝ ոչ։ Ես էլ գիտեմ, որ ոչ։ Ընդհանրապես չօգնեց։ Հլը հարց է՝ օգնե՞ց, թե՞ խանգարեց։ Հետագայում խանգարեց»,- նշում է նա՝ հավելելով, որ դա նաև վնասեց դաշնակցային հարաբերությունները։

Չնայած Հնդկաստանից և այլ երկրներից զենքի գնումներին, որոնք, ըստ ՊՆ-ի, գերազանցել են նախորդ տարիների ծավալները, Վարդանովը խնդիրը տեսնում է ոչ թե զենքի քանակի, այլ բանակի կառուցվածքի և մտածելակերպի մեջ։

«Խնդիրը կառուցվածքային է, խնդիրը սովետական մտածելակերպ ունենալու մեջ է՝ շարքայինից մինչև գլխավոր հրամանատար։ Սաղ սովետական, հետամնաց մտածելակերպի մեջ է։ Շատ հետամնաց մտածելակերպ ունի մեր ռազմաքաղաքական վերնախավը և ռազմական վերնախավը»,- պնդում է նա։

Նրա կարծիքով, բարեփոխումները, ինչպիսիք են շարային պատրաստության կրճատումը և կրակային պատրաստության ավելացումը, բավարար չեն։ Որպես օրինակ՝ նա բերում է 2022 թվականի սեպտեմբերյան մարտերի վիճակագրությունը, որտեղ զոհերի և վիրավորների հարաբերակցությունը խիստ անհամաչափ է եղել՝ ի վնաս հայկական կողմի։

«Մեր մոտ զոհվածները 208-ն էին, որքան հիշում եմ, 168 վիրավորով։ Մոտ 60 զոհված, 40 վիրավոր։ Դա բուժպատրաստություն չիմանալու հետևանք է։ Զինվորը չի կարողանում ինքն իրեն արյան հոսքը կանգնեցնի»,- մտահոգություն է հայտնում «Ողջ մնալու արվեստ»-ի ղեկավարը։ 

Վարդանովը նշում է, որ Հայաստանի ռազմարդյունաբերությունը ծանր վիճակում է, թեև վերջին շրջանում որոշակի դրական տեղաշարժ կա։ Նրա խոսքով, կան տեղական ընկերություններ, որոնք ունեն հակադրոնային համակարգերի, հարվածային ԱԹՍ-ների և հրետանային համակարգերի հաջողված մշակումներ, սակայն Պաշտպանության նախարարությունը դրանք չի գնում՝ նախապատվությունը տալով թանկարժեք ներկրվող զինատեսակներին։

«Քաղաքական որոշումն ավելի կարևոր է, քան ռազմական անհրաժեշտությունը։ Ռազմական անհրաժեշտությունը պիտի թելադրող լինի», – եզրափակում է նա։

Հարցազրույցն ամբողջությամբ՝ տեսանյութում։

Ռոբերտ Անանյան