Միջնորդներից որևէ մեկը չի ցանկանա պատասխանատվությունն իր վրա վերցնել, պատերազմի վերսկսման հավանականությունը մեծ է. քաղաքագետ

Ռուսաստանի և Ադրբեջանի նախագահների՝ այսօր սպասվող հանդիպումից հայկական կողմը որևէ ակնկալիք չպետք է ունենա: Այս մասին Factor.am-ի հետ զրույցում ընդգծեց քաղաքագետ Հրանտ Մելիք-Շահնազարյանը՝ շարունակելով՝ երկու երկրների ղեկավարների աշխատանքային հանդիպման ընթացքում ենթադրվում է, որ քննարկվելու են ռուս-ադրբեջանական հարաբերություններին առնչվող խնդիրներ:

Հիշեցնենք՝ Կրեմլի խոսնակ Դմիտրի Պեսկովն այսօր հայտնել է՝ երեկոյան Սոչիում Ռուսաստանի ղեկավարը կընդունի Ադրբեջանի նախագահ Իլհամ Ալիևին: Կրեմլի խոսնակը, սակայն, չի մանրամասնել, թե որն է նախագահների հանդիպման նպատակը և ինչ հարցերի է անդրադարձ կատարվելու:

«Ես վստահ եմ, որ Արցախի հիմնախնդիրը լինելու է օրակարգում, Ադրբեջանի նախագահը ցանկացած այլ երկրի ղեկավարի հետ հանդիպելիս խոսում է նաև արցախյան հակամարտության կարգավորման իրենց պատկերացումների մասին, վստահ եմ՝ Ռուսաստանի նախագահի հետ հատկապես այդ հարցը կքննարկվի, բայց Ռուսաստանի և Մինսկի խմբի համանախագահների դիրքորոշումը հայտնի է, և գործընթացում որևէ լուրջ փոփոխություն պետք չէ սպասել»,- կարծում է Մելիք-Շահնազարյանը:

Ի դեպ, օրերս ռուսական «Իզվեստիա»-ն գրել էր, որ Կրեմլը ձգտում է մինչև տարեվերջ կազմակերպել Հայաստանի և Ադրբեջանի նախագահների հանդիպում: Ըստ ռուսական լրատվամիջոցի՝ Մոսկվան այդ հարցում գլխավոր միջնորդ է դարձել, քանի որ ՄԽ մյուս համանախագահների փորձերը՝ նստեցնել կողմերին բանակցությունների սեղանի շուրջ, ձախողվել են: Պաշտոնական Մոսկվան, մինչդեռ, նախօրեին հերքեց «Իզվեստիա»-ի այս հրապարակումը:

Քաղաքագետը ևս կարծում է, որ Մոսկվան նման պատասխանատվություն չի ստանձնի: «Կարծում եմ՝ միջնորդներից որևէ մեկը չի ցանկանա պատասխանատվությունն իր վրա վերցնել: Բոլորը հասկանում են, որ քաղաքական լուծում հիմա չկա, խնդիրները շատ են, պատերազմի վերսկսման հավանականությունը` մեծ: Եվ այն կողմը, որը պատասխանատվություն կվերցնի իր վրա, ինչ-որ չափով կլինի նաև այդ գործընթացը տապալող կողմ, ուստի ո՛չ Ռուսաստանը, ո՛չ ԱՄՆ-ն, ո՛չ էլ Ֆրանսիան չեն ցանկանա ջութակի դեր խաղալ հիմա»,- շեշտեց քաղաքագետը` կարծիք հայտնելով, որ փակուղում գտնվող բանակցային գործընթացը վերսկսելու շանսեր կլինեն:

Շողիկ Գալստյան