Ըստ Խզմալյանի՝ դաշինքի հիմնական նպատակը ներկա և նախկին իշխանությունների դեմ պայքարելն է, քանի որ երկուսին էլ դիտարկում է որպես Հայաստանը «գաղութային» վիճակի մեջ պահող ուժեր։

«Այն, որ մենք դեմ ենք այդ երկու ուժերին, դա բնական է, մենք դա երբեք չենք թաքցնում, և ասել «բոլորին դեմ»՝ դա նշանակում է՝ մենք դեմ ենք ներկա և նախկին ուժերին, որոնք համաձայն են՝ մեկը, նախկինները, որ Հայաստանը մնա, փաստորեն, ռուսական գաղութ, մյուսը՝ ներկաները, փաստորեն համաձայնվում են դրան, բայց ավելացնում են դրան, ըստ մեզ, մեր տեսակետից, նաև Թուրքիայից և Ադրբեջանից կախումը»,- ասում է նա։

Խզմալյանը Հայաստանի ներկա իրավիճակը նկարագրում է որպես գոյութենական խաչմերուկ. «Հայաստանը գտնվում է հիմա Եվրոպայի, Եվրասիայի և Ասիայի, չէի ասի, խաչմերուկում, այսպես, և բոլոր կողմերը ձգտում են ձգել, քաշել Երևանը դեպի Հայաստանը, իրենց ուղղությամբ… Հյուսիսից մեզ սպասում է հին գաղութը, հարավից և արևելքից մեզ փաստորեն դեպի Ասիա են քաշում, և դա արդեն շատ թանկ նստեց՝ 20 թվականի պատերազմը և 23 թվականի Արցախի հայաթափումը»։

Անդրադառնալով արևմտամետ ուժերի հետ միավորվելու ձախողմանը՝ Խզմալյանը նշել է, որ իրենց նախաձեռնած «Եվրոդաշինք» ստեղծելու կոչերը մերժվել են․ «Մենք դիմել ենք բոլորին… Մենք փաստորեն ստացանք մերժում։ Հիմնական պատճառը… «մենք համաձայն չենք ձեր մոտեցումներին, հատկապես արտաքին քաղաքականության հարցում»։ Այսինքն, այն ուժերը, որոնք երկու տարի առաջ միավորվեցին, ընդունեցին իշխանության տեսակետը, արտաքին քաղաքական մոտեցումները, որը մեզ համար անընդունելի է»։

Նրա խոսքով՝ ներկա իշխանության քայլերը դեպի Եվրոպա իրական բովանդակություն չունեն և ընդամենը բեմադրություն են։ 

«Ես ասում եմ, որ Նիկոլ Փաշինյանը և նրա կառավարությունը, նրա կուսակցությունը տանում են Հայաստանին վրացական «երազանքի» ճանապարհով, և ես ասում եմ, որ դա մեր դեպքում կդառնա հայկական մղձավանջ, որովհետև Վրաստանին հիմա չի սպառնում վտանգ ֆիզիկական չգոյության»,- նշում է կուսակցության ղեկավարը։

Խզմալյանը ՌԴ նախագահ Վլադիմիր Պուտինի և վարչապետ Նիկոլ Փաշինյանի վերջին հանդիպումը որակել է որպես «բեմադրություն», որի նպատակը երկու կողմերի ներքին լսարաններին ուղերձներ հղելն էր․ «Դա բեմադրություն է, որի ընթացքում Պուտինը բեմադրեց իր ժողովրդի համար, որ տեսեք՝ մենք կարողանում ենք դեռևս մեր տարածքում, նախկին խորհրդային տարածքում, հարցեր լուծել։ Փաշինյանն էլ ցույց տվեց իր ազգին, որ մենք, տեսեք, մի մաս ենք, վիզ չենք ծռում, ծնկաչոք չենք գալիս, բայց իմաստը դրա ո՞րն է»։

Խոսելով գործարար Սամվել Կարապետյանի դերակատարության մասին, որը հայտարարել էր Ռուսաստանի հետ հնարավոր տնտեսական պատերազմի մասին, Խզմալյանը նշել է․ «Մտրակել, ճնշել Փաշինյանին Պուտինի հրահանգով դեպի Ռուսաստան։ Ահա այս տարբեր ուղղություններով դեմոկրատական ընդդիմությունը և գաղութային ընդդիմությունը, որը նույնպես առկա է, ձգում է իշխանություններին։ Եվ ո՞ւմ է փաստորեն իշխանությունը ենթարկվում այս պարագայում, դուք տեսնում եք»։

Չնայած այս ամենին, ըստ Խզմալյանի՝ Եվրոպան շարունակում է պայքարել Հայաստանի համար, ինչի վկայությունն է Եվրոպական քաղաքական համայնքի գագաթնաժողովը Երևանում անցկացնելու որոշումը։ Նա ընդգծել է, որ իշխանությունները պարտավոր են ստեղծել իրական անվտանգային երաշխիքներ՝ գնալով ոչ թե իր բնորոշմամբ՝ Ալիևի հետ կասկածելի գործարքների, այլ Եվրամիության հետ ռազմաքաղաքական դաշինքի։

Հարցազրույցն ամբողջությամբ՝ տեսանյութում։

Ռոբերտ Անանյան

Անդրադառնալով հարցին, թե արդյոք իշխանությունն ունի փաստեր՝ ապացուցելու արտաքին միջամտության փորձերը, պատգամավորը նշել է․ «Սա թեմա է, որը քննարկվում է, ես կասեի՝ արդեն տարիներ շարունակ, երբ որ մենք ասում ենք՝ հիբրիդային հարձակումների ենք ենթարկվում, ընդհանուր առմամբ, երկիրն է ենթարկվում հիբրիդային հարձակումների, և ընդդիմությունն այսպես փորձում է ընդդիմանալ և ասել, որ մենք փաստեր չունենք»։

Որպես ապատեղեկատվական արշավի կոնկրետ օրինակ՝ Բադալյանը մատնանշել է կենսաթոշակների և ապահովագրության շուրջ տարածվող լուրերը․ «Դրանցից ամենավառը և ցայտունը, և որ իրապես զայրացնում է, այն է, որ գրեթե բոլորին կարողացել են համոզել, որ հունիսի 7-ից հետո այլևս առողջության ապահովագրությունը չի լինելու, և թոշակները, որ բարձրացվել են 10 հազար դրամով, իջնելու են այն նախնական վիճակին, այսինքն՝ մինչև 2018-ը, որ մենք սկսեցինք աստիճանաբար բարձրացնել»։

Ըստ նրա, արտաքին միջամտության ամենացայտուն ապացույցը ՌԴ նախագահ Վլադիմիր Պուտինի հայտարարությունն էր՝ կապված ռուսական անձնագիր ունեցող քաղաքացիների ընտրություններին մասնակցության հետ։

«Մեկ այլ երկրի ղեկավար որոշում է, որ պիտի միջամտի մեր երկրի գործերին և դա անում է անթաքույց և ուղիղ եթերում, և ասում է, որ պիտի թույլ տաք, որ ռուսական անձնագիր ունեցող մեր ընկերները մասնակցեն ընտրություններին։ Ի՞նչ ապացույց եք դուք ուզում, ես ուզում եմ հասկանալ։ Սրանից ավելի մեծ ապացույց․․․ Այսինքն՝ դա պլան Բ-ն էր։ Այն բոլոր տարբերակները չաշխատեցին, չաշխատեցին, չաշխատեցին, և հիմա արդեն եկել է ժամանակը ավելի բացահայտ և ավելի ակնհայտ մենամարտի», – ասել է պատգամավորը։

Խոսելով գործարար Սամվել Կարապետյանի հայտարարության մասին, թե Փաշինյանի վերընտրվելու դեպքում Ռուսաստանի հետ տնտեսական պատերազմ է սպասվում, Բադալյանը կտրուկ է արձագանքել․ «Ուզում եմ տեղեկացնել Սամվել Կարապետյանին, որ մենք ռուսերեն շատ լավ հասկանում ենք և նրա թարգմանության կարիքը չկա։ Հեչ պետք չի կրկնել Օվերչուկին, Զախարովային, Վլադիմիր Պուտինին, որովհետև եթե մեզ կարիք կա ինչ-որ բան լսելու, ապա մենք լսում ենք դրանք առաջին ձեռքերից»։

Լուսինե Բադալյանը վստահեցրել է, որ իշխանությունը հավատարիմ է մնալու ազատ և արդար ընտրություններ անցկացնելու սկզբունքին և պատրաստ է դիմակայելու բոլոր մարտահրավերներին, այդ թվում՝ ապօրինի ֆինանսավորմանը։ «Սա մեզ համար, բազմիցս խոսել ենք այս մասին, սկզբունքային հարց է եղել հետհեղափոխական Հայաստանում՝ բերել նոր մշակույթ, այն է՝ ազատ, արդար, թափանցիկ ընտրություններ, անկախ նրանից, ով կհաղթի»։

Նա նաև նշել է, որ իրավապահ համակարգը տեղյակ է հնարավոր բոլոր սցենարներից․ «Իրավապահ համակարգը հրաշալի գիտի այդ բոլոր սցենարների մասին։ Երբ որ մենք խոսում էինք հիբրիդային պատերազմի և դրան դիմակայելու գործիքների մասին․․․ բնականաբար, մենք ունենք, այդ բոլոր հավանական սցենարների մասին տեղեկություններ՝ ինչ կարող է լինել, ինչքան կանխիկ գումար կարող է մտնել, ինչքան փոխանցում կարող է լինել, ում, ինչ ձև, ընտրակաշառքի ինչ նոր, ավելի հետաքրքիր մեխանիզմներ ի հայտ կգան, դրանք կգործարկվեն և այլն»։

Ի պատասխան Ռուսաստանի կողմից հնարավոր տնտեսական ճնշումների (մասնավորապես՝ գազի գնի բարձրացման) մասին հարցին, Բադալյանը հավաստիացրել է․ «Եթե Աստված մի արասցե նման սցենար դառնա իրականություն, Հայաստանի Հանրապետության քաղաքացին, վստահ եղեք, որ դրանից շատ չի տուժի, այսինքն՝ իր մաշկի վրա այդ փոփոխությունը չի զգա, և հետևաբար որևէ մտահոգվելու կամ անհանգստանալու բան չկա»։

Եզրափակելով խոսքը՝ իշխանական պատգամավորը ներկա իրավիճակը որակել է որպես վճռորոշ փուլ Հայաստանի համար։

«Իմ խորին համոզմամբ, սա վերջին մարտն է։ Սա վերջին մարտն է, որովհետև մեր ժողովուրդը այս ընթացքում այնքան հասունացավ, այնքան բան տեսավ, այնքան ապատեղեկատվություն տեսավ իր կյանքի ընթացքում, և արդեն շատ զգոն է, շատ ավելի խորքն է տեսնում այս բոլոր խնդիրների, և էլ իմաստ էլ չունի այդ պատերազմը մեր ժողովրդի հետ շարունակելու։ Ես կարծում եմ՝ այս վերջին մարտը շատ թեժ է լինելու, բայց այնուամենայնիվ վերջինը»։

Հարցազրույցն ամբողջությամբ՝ տեսանյութում։

Ռոբերտ Անանյան

Պատասխանելով հարցին, թե ինչու է դաշինք կազմել հայհոյախոսությամբ հայտնի և հետախուզման մեջ գտնվող անձի հետ, Հայրիկյանը նշել է, որ իրենց առաջնահերթությունը ոչ թե անձերն են, այլ «Բացարձակ ժողովրդավարության» սահմանադրական նախագծի ընդունումը։

«Առաջարկը մենք արել ենք քաղաքական հանրությանը՝ ամբողջ ուժգնությամբ, ասելով, որ եթե մարդիկ սիրում են հայրենիքը, բնականաբար այդ հայրենիքը հայրենիք պահող ժողովրդին, և նրանք, վերլուծելով պատմությունը, եկել են նույն եզրակացության, որ մեր ձախողումները սկսվեցին Սահմանադրության այս խուժան տարբերակը… ընդունելուց հետո, ապա մենք պատրաստ ենք դա համարել առաջնահերթություն։ Մենք նրանց հետ կարող ենք դաշինք կազմել»,- ասում է նա։

Ըստ նրա՝ այս առաջարկին արձագանքել է միայն Վարդան Ղուկասյանի թիմը՝ ի դեմս նրա շտաբի պետ Լևոն Բաղդասարյանի․ «Նրա շտաբի պետը մեր հայտարարությունը կարդալուց հետո դիմել է մեզ՝ ասելով, որ իրենք էլ են ընդունում, որ Սահմանադրության մեր նախագիծը շատ կարևոր բան է… Իրենք ասել են՝ «Մենք միանում ենք այդ առաջարկին»։ Այդ դեպքում ես եմ կանգնել փակուղու առաջ»։

Հայրիկյանը կտրուկ է գնահատել մյուս քաղաքական ուժերի պահվածքը՝ նշելով. «Պարզվեց, որ հայ քաղական դաշտում ամենաբարձր մակարդակ ունեցող քաղաքական ուժը՝ բարձր ազգային, ժողովրդավարական, մարդկային, պարզվեց, որ ունի «ԴՕԿ» կուսակցությունը։ Մյուսները… պարզվեց՝ ամենալավ տղան Վարդան Ղուկասյանն է՝ քաղաքական դաշտում։ Մյուսները պոռոտախոսներ են և իրենք իրենց են սիրում, ազգին չեն սիրում»։

Ինչ վերաբերում է դաշինքի վարչապետի թեկնածուի հարցին, Հայրիկյանը նշել է, որ դա երկրորդական է։

«Դա արդեն ճնճղուկի որս չի, արդեն դառնում է, ասենք, աղվեսի որս։ Ինձ չի հետաքրքրում։ ԱԻՄ-ն ունի մեկ գերխնդիր՝ ինչպես անել, որ 3-6 ամսվա ընթացքում Հայաստանն ունենա նոր, կարգին Սահմանադրություն, և դրանով գնա առանձին ընտրությունների՝ վարչապետին առանձին, Ազգային ժողովին՝ առանձին։ Դա է մեր խնդիրը»,- ասել է նա։

Հարցին՝ արդյո՞ք իրենց չի խանգարի այն հանգամանքը, որ Ղուկասյանն ԱՄՆ բանտում է, Հայրիկյանը պատասխանել է. «Ես կարծում եմ, որ դա այն հարցն է, որը շատ ավելի փոքր հարց է, քան «Բացարձակ ժողովրդավարության» կարևորությունը հասկանալը և աջակցելը։ Դրա վրա ուշադրություն պետք չէ դարձնել, դա մանրուք է, մանրուք»։

«Ազգային ինքնորոշում» միավորման առաջնորդը նշել է, որ իրենց առաջարկած համակարգում իշխանության տերը դառնում է քաղաքացին, և սա է այն գերնպատակը, որի շուրջ համախմբվել են։ Նա նաև ընդգծել է, որ անձամբ Վարդան Ղուկասյանի հետ չի շփվել, և բանակցությունները վարվել են նրա թիմի հետ։

Հարցազրույցն ամբողջությամբ՝ տեսանյութում։

Ռոբերտ Անանյան

Անդրադառնալով ՌԴ դեսպանի հետ հանդիպմանը և հնչող մեկնաբանություններին, թե արդյո՞ք քննարկվել է ռուսամետ ուժերի գրանցման հարցը, ԿԸՀ նախագահը հերքեց նման քննարկումների առկայությունը։

«Այս ընթացքում մի այնպիսի շաբաթ չկա, որ մեկ կամ երկու դեսպանի կամ միջազգային կազմակերպության ներկայացուցիչների հետ չհանդիպեմ։ Ես հավաստիացնում եմ՝ ոչ միայն ՌԴ դեսպանը, այլ մնացած բոլոր դեսպանները կամ այլ միջազգային գործընկերները, երբ գալիս են Կենտրոնական ընտրական հանձնաժողով, որևէ մեկն իրեն թույլ չի տալիս Կենտրոնական ընտրական հանձնաժողովում ինչ-որ քաղաքական հարց կամ ընտրություններից դուրս հարց բարձրացնել»,- նշեց նա։

Խոսելով «Հանրապետություն» կուսակցության նախագահ Արամ Սարգսյանի պահանջի մասին՝ չգրանցել Սամվել Կարապետյանի ուժին՝ վկայակոչելով նրա կապիտալի արտաքին ծագումը, Վահագն Հովակիմյանը պարզաբանեց օրենսդրական կարգավորումները։

«Կուսակցության ֆինանսական ծագումը պետք է լինի բացառապես Հայաստանի Հանրապետության քաղաքացիների նվիրատվությունների հաշվին։ Եվ մեկ քաղաքացին տարվա ընթացքում կուսակցությանը կարող է նվիրաբերել 10 միլիոն դրամ։ Եթե որևէ քաղաքացի կփորձի, ոչ նաև ուրիշի անունով օգտագործելով, այսինքն՝ ինքը ունի, ենթադրենք, 20 միլիոն դրամ, բայց 10 միլիոնից ավել չի կարող ինքը նվիրաբերել, կփորձի այդ մյուս 10 միլիոնը ուրիշի անվամբ նվիրաբերել, նա կատարած կլինի քրեորեն պատժելի հանցագործություն։ Եթե կոնկրետ անձը, եթե ՀՀ քաղաքացի է, կարող է 10 միլիոն դրամ նվիրաբերել, վերջ»,- ընդգծեց ԿԸՀ նախագահը։

Մեկնաբանելով պաշտոնյաների և ընդդիմադիրների կողմից իրականացվող հանդիպումները, որոնք ընկալվում են որպես վաղաժամ քարոզարշավ, Հովակիմյանը նշեց, որ օրենքի սահմանափակումները վերաբերում են միայն պաշտոնական քարոզարշավի շրջանին։

«Մեր օրենսդրությունը սահմանափակումները քարոզարշավի այդ մեկամսյա համար է դրել։ Մեր օրենսդրության ամբողջ տրամաբանությունը կայանում է նրանում, որ քաղաքական ուժերը չորս տարի տասնմեկ ամիս ազատ են քարոզչություն իրականացնելու։ Շատ վատ է, որ մեր քաղաքական ուժերը ընտրություններից ամիսներ առաջ են սկսում ակտիվ քարոզչություն ծավալել։ Քաղաքական գործչի համար չկա որևէ հրապարակային գործողություն, որը քարոզչական տոն չունենա։ Եկեք դա արձանագրենք, որովհետև քաղաքական գործիչը, եթե նույնիսկ իր անձնական տիրույթում, բայց դա հրապարակվում է, էլի քարոզչական է»,- ասաց պաշտոնյան։

Վահագն Հովակիմյանը ներկայացրեց նաև ընտրական օրենսդրության նոր փոփոխությունները, մասնավորապես, այն դեպքի համար, երբ խորհրդարան պետք է անցնի երրորդ քաղաքական ուժը։ Ի տարբերություն 2021 թվականի, երբ մանդատ էր ստանում առավելագույն ձայն հավաքած ուժը, այժմ կգործի այլ սկզբունք։

«Ներկայիս օրենսդրությունն ասում է, որ այն կուսակցությունը կամ դաշինքը, որն ավելի մոտ է շեմին, իր անցողիկ շեմին։ Այսինքն, կարող է իրավիճակ ստեղծվել, որ, օրինակ, 3,95% ձայն հավաքած կուսակցությունը, 7,9% ձայն հավաքած կուսակցությունից առաջ անցնի»,- նշեց ԿԸՀ նախագահը։

Խոսելով ընտրացուցակներից այն քաղաքացիներին հանելու մասին, ովքեր 10 և ավելի տարի Հայաստանում չեն, ԿԸՀ նախագահը պարզաբանեց, որ հիմքը ոչ թե ֆիզիկական ներկայությունն է, այլ անձը հաստատող փաստաթղթի վավերականությունը․ «Որպեսզի մեր քաղաքացին բնակչության պետական ռեգիստրից տեղափոխվի ընտրողների ցուցակ, ինքը պիտի ունենա ուժի մեջ անձը հաստատող փաստաթուղթ։ Մեր բոլոր անձը հաստատող փաստաթղթերի վավերականության ժամկետը 10 տարի է։ Նշանակում է՝ 10 տարին լրացել է, մի հատ էլ վեց ամիս է անցել՝ 10 տարի վեց ամիս անցել է, և ինքը իր անձը հաստատող փաստաթուղթը չի թարմացրել»։

Առաջադրումների վերջնաժամկետը ապրիլի 23-ն է, սակայն ԿԸՀ նախագահը կանխատեսում է, որ, ըստ ձևավորված ավանդույթի, հիմնական հայտերը կներկայացվեն վերջին օրը։ 

«Ենթադրում եմ, որ մինչ այդ շատ քիչ առաջադրում կունենանք»,- եզրափակեց նա։

Հարցազրույցն ամբողջությամբ՝ տեսանյութում։

Ռոբերտ Անանյան

Անդրադառնալով Միջազգային հանրապետական ինստիտուտի հարցմանը, որի համաձայն՝ իրենց դաշինքը 4% վարկանիշ ունի, Արթուր Խաչատրյանը խորը թերահավատություն հայտնեց։

«Սոցիոլոգիան ազնիվ գիտություն է, և անազնիվ մանիպուլյացիաներն անարգանք են գիտության նկատմամբ, այլ ոչ թե քաղաքական ինչ-որ խնդիրներ և ոչ միայն քաղաքական մանր խնդիրներ լուծելու համար։ Հիմա Միջազգային հանրապետական ինստիտուտը, իհարկե, գեղեցիկ է հնչում, բայց եկեք ընդունենք, որ Թրամփը չի արել, էլի, այդ հարցումները։ Այսինքն՝ դա նշանակում է, որ ես 4%-ի նկատմամբ առլեցուն եմ խորը սկեպտիցիզմով։ Վստահությունս այդ 4% թվի նկատմամբ շատ ցածր է և ձգտում է զրոյի»,- ասաց նա։

Խոսելով այն մասին, թե ինչո՞ւ է նվազել իրենց վարկանիշը 2021 թվականի 21%-ի համեմատ, և ինչպե՞ս են պատրաստվում համոզել հիասթափված ընտրողներին, Խաչատրյանը նշեց. «Ընդունենք մի բան, որ փողոցով իշխանություն փոխելը ոչ թե պրակտիկա է, այլ բացառություն։ Մեր ընտրազանգվածի մի էական մաս իրոք կարծում էր, որ մենք կհավաքենք մեծամասնություն և կկարողանանք փոխել իշխանությունը։ Մեծամասնություն չկազմեցինք Ազգային ժողովում, մի քանի փորձ արվեց։ Մենք կարծում եմ, որ կարող ենք։ Մենք ասելով՝ այստեղ ի նկատի ունեմ հավաքական ընդդիմությանը, որովհետև որևէ մի քաղաքական ուժ, կարծում եմ, չի կարողանա, բայց հավաքական ընդդիմությունը կարող է։ Մեր մրցակցային առավելություններից մեկն այն է, որ մենք ունեցել ենք փորձ»։

Պատգամավորը չբացառեց, որ իրենց ընտրողների մի մասի «միգրացիա» է տեղի ունեցել դեպի Սամվել Կարապետյանի նոր քաղաքական ուժը։

Միաժամանակ, Արթուր Խաչատրյանը բացատրեց, թե ինչու իրենք չեն միավորվել Սամվել Կարապետյանի ուժի հետ մեկ դաշինքի շուրջ։

«Ընդհանրապես դաշինք կազմելու տրամաբանությունն ինչո՞ւմ է։ Երբ կա սիներգետիկ լուծում։ Ավելի պարզ ասած՝ եթե մեկին գումարած մեկ հավասար է երկուսի, որևէ իմաստ չկա։ Եթե երկու ուժերը գումարես իրար և կստանաս գոնե 850,000 ձայն, այդ դեպքում իմաստ ունի դաշինք կազմելը։ Հիմա, մեր գնահատականով, այդ երկուսի միավորումը լրացուցիչ ինչ-որ մի բան չէր տալու։ Հետո արդեն՝ ընտրություններից հետո, դա դառնում է իրար հետ աշխատելը, դա արդեն կենսական խնդիր է դառնում»,- ասաց նա։

Մեկնաբանելով տեսակետը, թե ՀՀ երկրորդ նախագահ Ռոբերտ Քոչարյանի մասնակցությունն ընտրություններին «նվեր է» Նիկոլ Փաշինյանին, քանի որ կրկնվելու է 2021 թվականի սցենարը, Խաչատրյանը կտրուկ մերժեց այդ պնդումը։

«Այդ պնդումն իրականության հետ բացարձակապես որևէ առնչություն չունի։ Իր [Սամվել Ֆարմանյանի] և էլի մի քանի, չգիտեմ, նախկին թե ներկայիս կուսակցության անդամների իրենց գնահատականներն իրականության հետ որևէ առերս չունեն։ Դա, այսպես կոչված, սոփեստություն է, երբ դու վերցնում ես մի հատ կեղծ թեզ և քո ամբողջ տեսությունը կառուցում ես այդ կեղծ թեզի վրա»,- հայտարարեց Խաչատրյանը։

Ինչ վերաբերում է հարցին, թե ինչու Ռոբերտ Քոչարյանը, ի տարբերություն իշխանության ներկայացուցիչների, հաճախ չի երևում փողոցներում՝ ժողովրդի հետ շփվելիս, պատգամավորը պատասխանեց. «Վերջին անգամ «Հայաստան» դաշինքի ներկայացուցիչները Կոտայքում էին և ունեցել են հանդիպում։ Եվ, ի տարբերություն, օրինակ, շատ այլոց հանդիպումների, face control չեն անցնում այդ հանդիպումների մասնակիցները։ Իսկ Փաշինյանին ես էլի եմ ասում, միգուցե, շառից-փորձանքից հեռու, ճիշտ կանի՝ ինքն էլ մնա իր գրասենյակում, որովհետև, էլի եմ ասում, նայեք իր վերջին 10 բեմելները. միշտ մի վնաս է տալիս։ Պարոն Քոչարյանն այդպիսի էժանագին բաներ չի անում, դա սուտ է և կեղծիք»։

Նա նաև սուր քննադատեց Նիկոլ Փաշինյանի վարքագիծը. «Եթե դու ութը տարի է՝ վարչապետ ես, և հանկարծ քո վարքագիծը փոփոխում ես ընտրություններից երեք ամիս առաջ, ակնհայտ է, չէ՞, որ դա կեղծ վարքագիծ է։ Քո իրական վարքագիծը փողոց փակեք, որ ինքը անցնի… Նիկոլ Փաշինյանը կյանքում քանի՞ անգամ է գնացել ինչ-որ մի հատ կնոջ ասել՝ գիտե՞ք, ծանր է ձեր պայուսակը, տվեք տանեմ տուն։ Մարդ գցեց իր… շարասյան տակը, սպանեց երիտասարդ կնոջը, հղի կնոջը, չկանգնեցին նույնիսկ։ Հիմա, տեսեք, վա՜յ, այսպես, վեր է կենում, տանում է, էլի»։

Պատասխանելով հարցին, թե ինչու ՀՅԴ-ն սեփական շարքերից առաջնորդ չի առաջադրում, այլ դաշինքը գլխավորում է Ռոբերտ Քոչարյանը, Արթուր Խաչատրյանը նշեց, որ նպատակն ավելի բարձր է անձնական հավակնություններից։

«Մենք դեռ տարեսկզբին էինք ասում, որ ընտրություններում հաղթելու միակ տարբերակը մի քանի խոշոր ընդդիմադիր բլոկով մասնակցելն է։ Հիմա մեզ համար կարևորն այն չէ, Դաշնակցությունը նոր խորհրդարանում կունենա յոթ, թե՞ ինը մանդատ։ Մեր նպատակը Նիկոլ Փաշինյանին տուն ուղարկելն է և երկրում որակապես նոր ազգային իշխանություն ձևավորելը։ Եվ այստեղ ամբիցիաների խնդիր չի, նպատակը շատ ավելի բարձր է։ Մեր շանսերն ավելի շատ են Ռոբերտ Քոչարյանի հետ»,- ասաց ընդդիմադիր գործիչը։

Հարցազրույցն ամբողջությամբ՝ տեսանյութում։

Ռոբերտ Անանյան

Անդրադառնալով գործարար Սամվել Կարապետյանի տեսաուղերձին, որտեղ նա խոստանում է իշխանությունից հեռացնել «մեր ազգը խայտառակող» խմբակին, Լիլիթ Մինասյանը կասկած հայտնեց, որ տեքստը պատկանում է հենց Կարապետյանին։

«Համենայն դեպս, հասկանում եմ, որ տեքստային առումով և բովանդակային առումով այդ տեքստերը նա չի արտաբերում և չի կարող իր սեփական մտքով այդ նույն գաղափարները հանրությանը ներկայացնել, որովհետև հայերենի հետ ինչ-որ խնդիրներ ունի։ Ես կառաջարկեի, օրինակ, լավ էր արհեստական բանականությունը ամբողջությամբ խոսեր, կամ լավ էր գոնե ռուսերենով մարդը դիմի հանրությանը, որպեսզի իր միտքը լինի, ոչ թե այն մտքերը, որը նրան տալիս են։ Խայտառակությունը նրա անգրագիտությունն է և ընդհանրապես Հայաստանի Հանրապետության մասին գեթ մեկ բառ հայերեն չկարողանալ արտասանելը»,- հայտարարում է ՔՊ-ական պատգամավորը։

Ըստ նրա՝ ընդդիմության հանրահավաքներին մասնակցող մարդկանց թիվն ու կազմը վերջին հինգ տարում չի փոխվել։

«Այս վերջին հինգ տարիների ընթացքում ընդդիմության հանրահավաքների թվային պատկերը մշտապես եղել է այդ շրջանում։ Այսինքն՝ մեր հասարակության ընդդիմության շերտը մաշվեց-մաշվեց, եկավ-հասավ այս նույն թիվը, ինչը եղել է բոլոր ընդդիմադիր շարժումների հանրահավաքներին։ Այնտեղ տեսնում էինք հանրապետական դեմքերի, այնտեղ տեսնում էինք քոչարյանական դեմքերի, բոլոր այն մասնակիցներին, որոնք մշտապես գնացել են ընդդիմության ցույցերին»,- ասաց Մինասյանը։

Խոսելով ընդդիմադիր ուժերի հնարավոր կոնսոլիդացիայի մասին՝ Մինասյանը նշեց. «Խնդիրը ուրիշ բանի մեջ է, որ մենք ենք ասում, որ նրանք կոնսոլիդացիայի են գնացել, բայց նրանք շատ մեծ կամքով փորձում են հետ մնալ այդ մտքից։ Ախր դա ակնհայտ է, չէ՞, որ բոլոր ուժերն ունեն նույն ծրագրերը, ունեն նույն խոսույթը, անգամ տերմինները, նախադասությունները կազմում են նույն ձև, ոնց որ գրած-տված լինեն այդ «մետադիչկան» իրենց»։

Լիլիթ Մինասյանը մեկնաբանեց Սամվել Կարապետյանի հայտարարությունը, թե ՔՊ-ի վերընտրվելու դեպքում Ռուսաստանի հետ հուլիսին սպասվում է տնտեսական պատերազմ։

«Ես չեմ հասկանում, պարոն Կարապետյանը հուշո՞ւմ է Ռուսաստանի Դաշնությանը, որ կարելի է տնտեսական պատերազմ սկսել Հայաստանի հետ։ Հիմա եկեք հասկանանք՝ պարոն Կարապետյանն ո՞ւմ շահերն է պաշտպանում այստեղ։ Հայաստանի Հանրապետության ժողովրդի՞։ Սամվել Կարապետյանն այլ շահ չունի, քան Ռուսաստանի Դաշնությունից Հայաստանի Հանրապետության կախվածությունը խորացնելը և ավելի ու ավելի վասալի կարգավիճակ դարձնելը»,- հայտարարեց ՔՊ-ականը։

Պատգամավորը զուգահեռ անցկացրեց իշխանության և ընդդիմության կողմից հնչող «պատերազմի» թեզերի միջև։

«Մենք չենք ասում՝ մենք չընտրվենք՝ պատերազմ է լինելու։ Այս կոնֆիգուրացիայում մենք չընտրվենք՝ պատերազմ է լինելու։ Այս կոնֆիգուրացիան, որ դուք շեշտեցիք թվերը, հստակ մեր ընդդիմության ներկայացուցիչները, որոնք կարող են անցնել խորհրդարան։ Որովհետև այդ երեք ուժերը նույն ծրագիրն են առաջարկում և առաջարկում են խաղաղությունը արդեն իսկ հաստատված, մեր ունեցած որոշումներով և թղթերով ամրագրված խաղաղությունը ռևիզիայի ենթարկել։ Եթե այլ ուժեր լինեին մեր ընդդիմությունում, մենք նման թեզ չէինք կարող ասել»,- նշեց Լիլիթ Մինասյանը։

Հարցազրույցն ամբողջությամբ՝ տեսանյութում։

Ռոբերտ Անանյան

Անդրադառնալով հիմնական մրցակից ուժերին՝ Ռուբինյանը նշել է, որ նրանց թեկնածուների հարցում առկա է տարօրինակ իրավիճակ։

«Թվարկեցիք, չէ՞, երեք ընդդիմադիր ուժերի առաջին համարները։ Այդ երեքից միայն մեկն է հայտարարում, որ ինքը վարչապետի թեկնածու է։ Մյուս երկուսը վարչապետի թեկնածու չունեն։ Մեկը քաղաքագիտական աբսուրդի շրջանակներում, նկատի ունեմ՝ Ծառուկյանը, հայտարարում է, որ չորս-հինգ թեկնածու ունի, բայց անունները չի տա, որովհետև եթե տա, այդ մարդկանց վրա քրեական գործ կհարուցվի։ Այսինքն՝ նոր խոսք համաշխարհային քաղաքականության մեջ՝ թաքուն թեկնածուով են նրանք մասնակցում», – նշել է նա։

Խոսելով Սամվել Կարապետյանի հնարավոր թեկնածության մասին՝ Ռուբինյանը շեշտել է դրա իրավական անհնարինությունը՝ անկախ ընտրությունների արդյունքներից։ «Մյուսի դեպքում էլ հայտարարում են, որ ինչ-որ մեկն է թեկնածուն, բայց այդ ինչ-որ մեկը Ռուսաստանի և Կիպրոսի քաղաքացի է, չի հրաժարվել այդ քաղաքացիություններից, և աշխարհն էլ փուլ գա, չի կարող օգոստոսի 2-ին, իսկ ես հիշեցնում եմ՝ ներկայիս վարչապետի և Ազգային ժողովի ժամկետն ավարտվում է օգոստոսի 2-ին, և ըստ Սահմանադրության՝ հենց օգոստոսի 2-ին նախագահը պետք է նշանակի ձևավորված մեծամասնության կողմից ներկայացրած թեկնածուին։ Եվ աշխարհն էլ փուլ գա, 100 տոկոս էլ իրենք քվե ստանան, իրենց ասած մարդը՝ կալուգացին, չի կարող լինել վարչապետ»։

Ռուբինյանի գնահատմամբ՝ ընդդիմադիր ուժերը, թեև փորձում են ներկայանալ առանձին, իրականում փոխկապակցված են։ Նա նաև կասկածի տակ է դրել Սամվել Կարապետյանի անունից հրապարակվող տեքստերի ծագումնաբանությունը։ «Ես անկեղծ չգիտեմ, ես նույնիսկ վստահ չեմ, որ Սամվել Կարապետյանը հիմա գոյություն ունի, որովհետև իր գոյության որևէ ապացույց գոյություն չունի հիմա։ Կա արհեստական բանականությամբ վիդեո, կան իր անունից հայտարարվող ինչ-որ տեքստեր։ Կարող է գրում է, օրինակ, իսրայելցի գեներալը, կարող է գրում է Կալուգա քաղաքի հարկայինի պետի տեղակալը, կարող է սեքսի նախարարն է գրում, բայց ինքը չի գրում»։

ԱԺ փոխնախագահը պնդել է, որ ընդդիմության հաղթանակը կվտանգի խաղաղությունը։ «Երբ որ մենք ասում ենք, որ եթե նշյալ պատերազմի կուսակցությունը գա իշխանության, պատերազմ է լինելու, ինչի՞ ենք դա ասում։ Շատ պարզ պատճառով, որովհետև մենք լսում ենք՝ իրենք ինչ են ասում։ Իրենք ասում են՝ այս խաղաղությունը, այս օգոստոսի 8-ի խաղաղության հռչակագրով հաստատված խաղաղությունը, մեր դուրը չի գալիս։ Իրենք ասում են՝ մենք դրա բոլոր կոմպոնենտները գալու ենք ու վերանայենք»։

Նրա խոսքով՝ ընդդիմության առաջարկած «երաշխավորների» գաղափարը, ըստ էության, «տեր» ունենալու ձգտում է։ «Նրանց ասածը հետևյալն է՝ ո՞վ է մեր տերը, երաշխավոր է պետք։ Սրանով փաստվում է, որ երբ որ իրենք ասում են՝ մեզ պետք է երաշխավոր, իրենք նկատի ունեն, որ մեզ պետք է տեր»։

Ի պատասխան հարցին, թե ինչու են օլիգարխները շարունակում գործունեություն ծավալել քաղաքական դաշտում, Ռուբեն Ռուբինյանը պատասխանել է. «Հայաստանը ժողովրդավարական երկիր է։ Երբ որ երկիրը ժողովրդավարական է, դա նշանակում է, որ իշխանությունը չի որոշում՝ ով կլինի քաղաքականության մեջ, ով՝ ոչ։ Հայաստանի ժողովուրդն է որոշում, թե ով կարող է ունենալ… Եթե մարդիկ, մեր քաղաքացիները, չեն ուզում, որպեսզի այս օլիգարխները գան իշխանության կամ լինեն ընդդիմություն, դրա ձևը շատ հեշտ է՝ պետք է չընտրել իրենց»։

Նա նաև շեշտել է, որ ապօրինի գույքի բռնագանձման գործընթացները կապ չունեն ընտրություններին մասնակցելու իրավունքի հետ։ «Դատախազությունը Քոչարյանից և Քոչարյանի ընտանիքից չի պահանջում ապօրինի գույքը բռնագանձել, որպեսզի իրենց ռեսուրսները քչանան և իրենք ընտրություններին չմասնակցեն, որովհետև դա կլիներ անարդար մոտիվացիա։ Դատախազությունը Քոչարյանից պահանջում է այդ գույքը բռնագանձել, որովհետև դատախազությունը համարում է, և ես համաձայն եմ դատախազության հետ, որ Քոչարյանն ու իր ընտանիքը այդ 200 միլիոն դոլարը ձեռք են բերել ապօրինի կերպով»։

Ռուբինյանը հավելել է, որ 2018 թվականից ի վեր տարբեր դատավճիռներով և գործերով ՀՀ բյուջե է մուտքագրվել ավելի քան 700 միլիոն դոլար։

Հարցազրույցն ամբողջությամբ՝ տեսանյութում։

Ռոբերտ Անանյան

Անդրադառնալով վարչապետի թեկնածուի անունը չհրապարակելու պատճառներին՝ Սուրենյանցը նշել է, որ դա ոչ թե գաղտնապահության, այլ մարտավարության խնդիր է։

«Չէ, տարօրինակ լռություն չի, դա մարտավարության խնդիր է։ Հակառակ դեպքում այդ մասին կարող էինք ընդհանրապես չխոսել։ Ենթադրելի կլիներ այդ ժամանակ, որ առաջին համարը հենց ինքն էլ է հավակնություն ունենալու, բայց պարոն Ծառուկյանը այդ մասին ասել է։ Հաստատ մինչև ընտրելու պահը պարոն Ծառուկյանը այդ բացահայտումը կանի։ Այստեղ որևէ խնդիր չեմ տեսնում, մանավանդ, որ պարոն Ծառուկյանը իր առաջին համար լինելով՝ լեգալ քաղաքական պատասխանատվությունն ամբողջովին ստանձնել է», – ասել է նա։

Սուրենյանցը կտրականապես հերքել է Ռոբերտ Քոչարյանի հետ հնարավոր համագործակցության մասին շրջանառվող լուրերը՝ դրանք որակելով «արհեստական թեմա»։

«Միանշանակ, չէ՛։ Շատ հստակ է մեր դիրքորոշումը։ Թեկնածուն լինելու է մեր թիմից։ Իհարկե, եթե իմ անձնական կարծիքը հարցնեք, ես ամենալավ որակներն այդ առումով պարոն Ծառուկյանի մոտ եմ տեսնում, բայց պարոն Ծառուկյանն ինքը որոշում ունի վարչապետ չդառնալու։ Իսկ ընդհանրապես վարչապետի թեկնածու մեր թիմից դուրս մի՛ փնտրեք, չի լինելու։ Այդ Քոչարյանի թեման շատ արհեստական թեմա է։ Շատ, չափից դուրս արհեստական թեմա է, որովհետև, ամենայն հարգանքով երկրորդ նախագահի անձի նկատմամբ, ինքը այս պահին ընդդիմադիր եռյակում՝ այդ ֆավորիտների եռյակում, ամենևին էլ առաջատար դիրքում չի»։

Խոսելով ԲՀԿ ցուցակի բազմաշերտ լինելու և այնտեղ տարբեր ուժերի ներկայացուցիչների առկայության մասին՝ Սուրենյանցը նշել է, որ իրենց համախմբել է ծրագիրը և փոփոխությունների ձգտումը, ոչ թե ֆինանսական շահը․ «Կայուն էվոլյուցիոն փոփոխությունների ցանկությունն է։ Երևի այն բացառիկ կոնսոլիդացիոն կենտրոնն ենք, որի ցուցակի կազմավորումը բացարձակապես որևէ հրապարակային կամ այլ բնույթի աղմուկով չի ուղեկցվել։ Շատ խաղաղ այս ուժի քաղաքական համախոհների ցուցակը կազմվել է»։

Ի պատասխան դիտարկմանը, թե ԲՀԿ-ի շուրջ համախմբումը պայմանավորված է Գագիկ Ծառուկյանի ֆինանսական ռեսուրսներով, նա ասել է. «Ես ասում եմ՝ դա ամենահայտնի միֆերից մեկն է։ Հաստատ քսակի ընկերություն չի։ Վստահ եղեք, որ քաղաքական մտերմությունը նույնիսկ այդ առումով կաշկանդող է, որովհետև մարդկային հարաբերությունների դաշտում քաղաքականությունից դուրս պարոն Ծառուկյանից ավելի հեշտ կլինի օգնություն ակնկալելը»։

Սուրենյանցի խոսքով՝ օրենսդրությունը հստակ մեխանիզմներ է տալիս բիզնեսը և քաղաքականությունը տարանջատելու համար, և պարոն Ծառուկյանը միշտ հետևել է այդ կանոններին։

«Տեսեք, ախր մեր օրենսդրությունը դրա հստակ մեխանիզմը տալիս է։ Հավատարմագրային կառավարման ինստիտուտը, որը կա Հայաստանի Հանրապետության օրենսդրության մեջ, շատ հստակ կա։ Եթե այդ օրենսդրության տառն ու ոգին պահպանվում են, նման որևէ ռիսկ չի կարող առաջանալ։ Երբ որ, օրինակ, պարոն Ծառուկյանը պատգամավոր է եղել, միշտ հավատարմագրային կառավարման տակ է եղել իր բիզնեսը»։

Հարցազրույցն ամբողջությամբ՝ տեսանյութում։

Ռոբերտ Անանյան

Ըստ Շարմազանովի՝ չմասնակցելու որոշումը շատ դժվար է տրվել, և դրան նախորդել են երկուսուկես ամսվա ակտիվ քննարկումներ։ Նա ներկայացրեց կուսակցության նախագահ Սերժ Սարգսյանի հնչեցրած չորս հիմնական թեզերը, որոնք ընկած են որոշման հիմքում։

«Առաջինը՝ որպեսզի էլ ավելի չճեղքենք ընդդիմադիր դաշտը և նպաստենք համախմբմանը։ Երկրորդը՝ առաջնորդվում ենք կուսակցությունս հետ, բայց ազգիս համար սկզբունքով։ Մեզ համար մի քանի մանդատն ինքնանպատակ չէ, մեր նպատակն իշխանափոխությունն է, հետևաբար՝ Հանրապետականը նպաստելու է իշխանափոխությանը»,- պարզաբանեց Շարմազանովը։

Երրորդ պատճառը, նրա խոսքով, սոցիոլոգիական հարցումներն են, որոնք ցույց են տալիս, որ ՀՀԿ ընտրողների «ճնշող մեծամասնությունը» պատրաստ է քվեարկել ընդդիմադիր որևէ այլ ուժի օգտին։ Իսկ չորրորդ և ամենակարևոր կետը, ըստ Շարմազանովի, այն է, որ չմասնակցելը պայքարից հրաժարվել չի նշանակում։ «Ուղղակի չմասնակցելը, դա չպայքարել չէ։ Իսկ ես ասում եմ՝ չառաջադրվելը չմասնակցել չէ։ Հանրապետականը շատ հստակ կոչ է անում՝ գնացեք ընտրության, որ Նիկոլիզմը գնա, ակտիվ մասնակցություն ապահովվի, և գնան ու ձայն տան այն ուժերին, որոնք, իրենց կարծիքով, ընդդիմադիր են և ազգային-պետական»։

Հարցին, թե որ ուժերին պետք է ուղղորդվեն իրենց ձայները, Շարմազանովը նշեց, որ կոչ են անելու քվեարկել այն ուժերի օգտին, որոնք վստահաբար կհաղթահարեն 4%-ի շեմը, «որպեսզի ձայնը չփոշիանա»։ Նա ընդգծեց, որ ընդդիմադիր դաշտի առաջատարը «Ուժեղ Հայաստան» կուսակցությունն է՝ Սամվել Կարապետյանի գլխավորությամբ։ «Այսօր ընդդիմադիր ամենաառաջադեմ և ամենաբարձր վարկանիշային ուժը Սամվել Կարապետյանի ուժն է, և ընդդիմության լոկոմոտիվը Սամվել Կարապետյանի ուժն է։ Դա ընդունում են, կարծում եմ, ընդդիմադիր բոլոր խաղացողները»։

Խոսելով Սերժ Սարգսյանի՝ կուսակցության նախագահի պաշտոնում վերընտրվելու մասին՝ Շարմազանովը նշեց, որ դա կուսակցության որոշումն է, և ինքը նույնպես այդ դիրքորոշման կրողն է։ «Մեր կուսակցությունը և անձամբ ես, այո՛, կուսակցության նախագահ տեսնում ենք Սերժ Սարգսյանին, որովհետև Սերժ Սարգսյանն ունի բոլոր այն տվյալները, որպեսզի ինքը կարողանա ավելի արդյունավետ կառավարել կուսակցությունը»։

Շարմազանովը կտրականապես հերքեց, որ ՀՀԿ-ն ընտրություններին չի մասնակցում 4%-ի շեմը չհաղթահարելու մտավախությունից։ «Նման տվյալներ չենք ունեցել։ Բոլոր տվյալներով՝ ՀՀԿ-ն, ճիշտ աշխատանքի դեպքում, ոչ թե 4, այլ 4-ից ավելի տոկոս կհաղթահարեր»։

Նրա համոզմամբ՝ իշխանափոխությունը հնարավոր է ոչ միայն ընտրությունների, այլև փողոցային պայքարի միջոցով, որին ՀՀԿ-ն պատրաստվում է միանալ։ «Առանց փողոցային պայքարի հնարավոր չէ Նիկոլ Փաշինյանին հեռացնել։ Միայն ընտրությունները կամ զուգորդվի փողոցային պայքարով»։

Պատասխանելով ՀՀԿ-ի նախկին կառավարման տարիներին թույլ տված սխալների և կոռուպցիոն դրսևորումների մասին հարցին՝ Շարմազանովը հայտարարեց, որ կուսակցությունն իր համագումարում հրապարակային ընդունել է սխալները։ Սակայն, ըստ նրա, անհամեմատելի են նախկին և ներկա իրողությունները։ «Մինչև 18 թվականը մենք ունեցել ենք երկու հայկական պետություն՝ 42 հազար քառակուսի կիլոմետր։ Ներկան՝ Նիկոլիզմը, Արցախի ադրբեջանացումն է։ Նախկինը Շուշիի ազատագրումն է, ներկան՝ Հայաստանի ադրբեջանացումը»։

Իր խոսքում ՀՀԿ ներկայացուցիչը 2018 թվականի իշխանափոխությունը որակեց «դասական գունավոր հեղափոխություն», որն իրականացվել է «արևմտյան ուժերի և այլ աշխարհաքաղաքական կենտրոնների ներգրավվածությամբ»։ 

Հարցազրույցն ամբողջությամբ՝ տեսանյութում։

Ռոբերտ Անանյան

Անդրադառնալով «Ուժեղ Հայաստան»-ի հետ դաշինքի ձախողմանը՝ Խաչատրյանը նշեց, որ բանակցություններում կարող են լինել անհամաձայնություններ, սակայն շեշտեց. «Ինչպես արդեն նշել ենք՝ մեզանից անկախ պատճառներով։ Մենք առնվազն ջանք գործադրել ենք, հնարավոր բոլոր ջանքերը գործադրել ենք ոչ միայն այդ դաշինքի կայացման համար, այլև ընդհանրապես վերջին երկու տարվա ընթացքում Հայ ազգային կոնգրեսը իսկապես լրջագույն ջանքեր է գործադրել, որպեսզի ստեղծվի ընդդիմադիր լայն ճակատ»։

Ըստ նրա, այսօր Հայաստանում որևէ քաղաքական ուժ, այդ թվում՝ իշխանությունը, միայնակ խնդիր լուծելու ռեսուրս և հեղինակություն չունի։ Խաչատրյանը վստահեցրեց, որ չնայած դաշինքի չկայանալուն, համագործակցությունը ընդդիմադիր դաշտում կշարունակվի։

Ի պատասխան հարցին, թե արդյոք հնարավոր է այսպիսի մասնատված ընդդիմությամբ հեռացնել Նիկոլ Փաշինյանին, ՀԱԿ վարչության անդամը ներկայացրեց իր տեսլականը. «Եթե, օրինակ, ենթադրենք մեր համար հիմք վերցնենք GALLUP-ի այդ վերջին հրապարակած տվյալները, ես ընդամենը մի սցենար կարող եմ ասել, որը հնարավորություն տալիս է իշխանափոխություն ունենալու։ Այդ դեպքում մնում է երկրորդ փուլը։ Ըստ մեր սահմանադրության՝ առաջին երկու առավել շատ ձայն հավաքած ուժերը գնում են երկրորդ փուլ։ Եվ բնականաբար, երկրորդ փուլում, օրինակ, ամբողջ ընդդիմությունը պաշտպանելու է ընդդիմադիր ճակատը ներկայացնող թեկնածուին»։

Խաչատրյանը հերքեց այն տեսակետը, թե ՀԱԿ-ի առանձին մասնակցությունը կփոշիացնի ընդդիմության ձայները։ «Մենք այդքան վատատես չենք, որ 4%-ի շեմը չենք հաղթահարի։ Բնականաբար, նաև համեստ ենք և ռացիոնալ ենք, 40%-ից չենք խոսում, բայց 4%-ը մենք համարում ենք շատ իրատեսական։ Կերակրի մեջ աղի պարունակությունը շատ փոքր է, չէ՞, երբ որ դուք ափսեով ճաշը դնում եք, մի փոքր աղ եք չէ՞ գցում դրա մեջ։ Բայց առանց այդ աղի այդ կերակուրը անհամ է դառնում։ Մենք շատ կարևոր ենք համարում Կոնգրեսի մասնակցությունը նաև այն իմաստով, որ մի շարք կարևորագույն հարցերով միայն մենք կարող ենք խոսել»։

Նրա խոսքով՝ միայն ՀԱԿ-ն է, որ կարող է անկեղծորեն խոսել իշխանության խաղաղության օրակարգի կեղծ լինելու մասին, քանի որ մյուս ուժերին կարելի է հակադարձել իրենց իսկ անցյալով։ «Ռոբերտ Քոչարյանին հաջորդ օրը նույն հարցը կտան, չէ՞։ Բա եթե դուք խաղաղություն էիք ուզում, երբ 10 տարի նախագահ եք եղել, ինչի՞ այդ խաղաղությունը չի ստացվել ձեր կառավարման օրոք։ Բոլոր ուժերին, ում ուզում եք նայեք, բոլորը համարել են, որ Ղարաբաղի հարցը լուծված է, չկա այդպիսի հարց, և այլն, և այլն։ Միայն մենք ենք ու խոսել ենք միայն խաղաղության մասին»։

Խաչատրյանը նաև ընդգծեց, որ ՀԱԿ-ն իր քարոզարշավում հավատարիմ կմնա իր սկզբունքներին՝ խուսափելով բացասական վարկանիշի վրա խաղալուց և «կապիկություններից»։ «Մենք միշտ դրական ռեյտինգի վրա ենք աշխատել։ Գուցե նաև դա էլ է պատճառ, որ մենք ձայները մեր մաշել ենք, բայց ամեն դեպքում մենք քաղաքականության մեջ չենք ընդունում բացասական էֆեկտի վրա քվե հավաքելը»,- եզրափակեց նա։

Հարցազրույցն ամբողջությամբ՝ տեսանյութում։

Ռոբերտ Անանյան