Ներքին տնտեսական | Factor.TV

Եվրախորհրդարանը կողմ քվեարկեց հայկական ապրանքների համար ժամանակավոր մաքսային արտոնություններին․ ՏԵՍԱՆՅՈՒԹ

Անահիտ Խաչատրյան — Tue, 15 Sep 2026 10:53:33 +0000

Եվրոպական խորհրդարանը 583 «կողմ», 49 «դեմ» և 39 «ձեռնպահ» ձայների հարաբերակցությամբ ընդունեց հայկական արտադրանքի նկատմամբ կիրառելի առևտրային ազատականացման ժամանակավոր միջոցառումները (Autonomous Trade Measures)։ Ինչպես նախագծի քննարկման մյուս փուլերում, այս անգամ էլ առարկություններ չհնչեցին։

Օրենսդրական նախաձեռնությամբ նախատեսվում է կասեցնել կամ զրոյացնել ԵՄ մուտք գործող մի շարք հայկական ապրանքների նկատմամբ կիրառվող արժեքային մաքսատուրքերը։

ԵՄ-ն ազատականացնում է Հայաստանից արտահանման շուրջ 80%-ը

«Հանձնաժողովի առաջարկը նախատեսում է Հայաստանից Եվրոպական Միություն ներմուծվող ապրանքների համար ժամանակավոր և բացառիկ ինքնավար առևտրային միջոցների տրամադրում՝ երկու տարվա ժամկետով։ Եթե Հանձնաժողովը գտնի, որ այդ երկամյա ժամկետից հետո դրանց երկարաձգումը հիմնավորված է՝ հաշվի առնելով տվյալ պահին ստեղծված իրավիճակը, այն կձգտի համապատասխան առաջարկ ներկայացնել Եվրոպական խորհրդարանին և Խորհրդին՝ ոչ ուշ, քան կանոնակարգի կիրառման ավարտից վեց ամիս առաջ»,- քվեարկությունից առաջ հայտարարեց Եվրահանձնակատար Մագնուս Բրունները։

Հիշեցնենք, որ Եվրահանձնաժողովն այս նախաձեռնությամբ հանդես էր եկել հուլիսին՝ Ռուսաստանի կողմից հայկական ապրանքների (մասնավորապես՝ գյուղատնտեսական և ձկնամթերքի) նկատմամբ սահմանված արտահանման սահմանափակումներից հետո։

Եվրահանձնաժողովն ակնկալում է, որ արտոնյալ ռեժիմը հայկական ընկերություններին հնարավորություն կտա ավելի մրցունակ պայմաններով մուտք գործել եվրոպական շուկա, վերաուղղորդել արտահանման մի մասը և նվազեցնել կախվածությունը ռուսական շուկայից։ Առաջարկը դիտարկվում է նաև որպես ԵՄ–Հայաստան Համապարփակ և ընդլայնված գործընկերության համաձայնագրի (CEPA) տնտեսական բաղադրիչի գործնական քայլ։

Հայկական ապրանքների համար նախատեսվող արտոնությունները երկու տարի ժամկետով են և անվերապահ չեն։ Եթե Հայաստանը չկատարի համաձայնեցված պահանջները կամ հայկական ներմուծման աճը խաթարի ԵՄ շուկան, Եվրահանձնաժողովը կարող է ժամանակավորապես՝ ամբողջությամբ կամ մասնակիորեն, կասեցնել ռեժիմը։

Արտոնություններից օգտվելու համար հայկական արտադրանքը պետք է համապատասխանի ԵՄ ծագման կանոններին և մաքսային ընթացակարգերին։ Հայաստանը պետք է նաև ապահովի վարչական համագործակցություն ԵՄ մարմինների հետ՝ ապրանքների ծագման ստուգման ու հնարավոր խարդախությունների կանխման համար։

ԵԽ Միջազգային առևտրի հանձնաժողովը կողմ քվեարկեց Հայաստանին արտոնություններ տալու նախագծին․ ՏԵՍԱՆՅՈՒԹ

Կանոնակարգը նախատեսում է նաև, որ Հայաստանը չպետք է նոր մաքսատուրքեր կամ անհիմն առևտրային սահմանափակումներ կիրառի ԵՄ-ից ներմուծվող ապրանքների նկատմամբ։ Բացի այդ, արտոնյալ ռեժիմի պահպանման համար կարևոր են ժողովրդավարության, մարդու իրավունքների, օրենքի գերակայության և հիմնարար ազատությունների վերաբերյալ Համապարփակ և ընդլայնված գործընկերության համաձայնագիր համաձայնագրի (CEPA) պարտավորությունները։

Խորհրդարանի քվեարկությունից հետո փաստաթուղթը պետք է վերջնականապես հաստատվի ԵՄ Խորհրդի կողմից։ Այն ԵՄ պաշտոնական տեղեկագրում հրապարակվելուց հետո ուժի մեջ կմտնի հաջորդ օրը, և այդ պահից համապատասխան հայկական ապրանքների համար կսկսի գործել դեպի եվրոպական շուկա արտոնյալ մուտքի ռեժիմը։

Կարինե Ասատրյան

Բրյուսել

ԿԲ նախագահ Մարտին Գալստյանի ասուլիսը. ՈՒՂԻՂ

Անահիտ Խաչատրյան — Tue, 15 Sep 2026 10:11:47 +0000

Մեկնարկել է Կենտրոնական բանկի նախագահ Մարտին Գալստյանի ասուլիսը։

Վաշինգտոնում հայկական բրենդիի համտեսի երեկո է անցկացվել

Անահիտ Խաչատրյան — Tue, 15 Sep 2026 09:33:30 +0000

ԱՄՆ-ում ՀՀ դեսպանությունը Վաշինգտոնի «Նեդս» ակումբում կազմակերպել է հայկական բրենդիի համտեսի երեկո, որի ընթացքում ներկայացվել են դրա պատմությունը, արտադրության ավանդույթներն ու առանձնահատկությունները։ Միջոցառմանը քննարկվել են նաև հայկական բրենդիի նկատմամբ հետաքրքրությունն ու նոր շուկաներում դրա հնարավորությունները։

«ԱՄՆ-ում ՀՀ դեսպանությունը Վաշինգտոնի «Նեդս» ակումբում կազմակերպել է հայկական բրենդիի համտեսի երեկո՝ նվիրված դրա պատմությանը, արտադրության ավանդույթներին և առանձնահատկություններին:

Միջոցառմանը բացման խոսքով հանդես է եկել ԱՄՆ-ում ՀՀ դեսպան Նարեկ Մկրտչյանը։ Գործարար Կարեն Մեյմարյանը ներկայացրել է հայկական բրենդիի պատմությունն ու արտադրության առանձնահատկությունները, ինչպես նաև համտեսի համար ընտրված տեսակները։

Երեկոն նաև հնարավորություն է տվել քննարկել հայկական բրենդիի նկատմամբ հետաքրքրությունն ու դրա համար նոր շուկաների ներուժը։

Միջոցառմանը ներկա են գտնվել ամերիկյան քաղաքական, դիվանագիտական, ակադեմիական և գործարար շրջանակների ներկայացուցիչներ»,- ասված է ԱՄՆ-ում ՀՀ դեսպանության տարածած հաղորդագրությունում։

Հիշեցնենք, որ Հայաստանը «կոնյակ» անվանումից հրաժարվելու պարտավորությունը ստանձնել է Եվրամիության հետ 2017-ին ստորագրված CEPA-ով, քանի որ «Cognac»-ը ԵՄ-ում պաշտպանված ֆրանսիական աշխարհագրական նշում է։

ԿԲ-ն բարձրացրել է քաղաքականության տոկոսադրույքը՝ սահմանելով 6.75%

Անահիտ Խաչատրյան — Tue, 15 Sep 2026 08:45:03 +0000

Հայաստանի կենտրոնական բանկի խորհուրդը սեպտեմբերի 15-ի նիստում որոշել է քաղաքականության տոկոսադրույքը բարձրացնել 0.25 տոկոսային կետով՝ սահմանելով 6.75%։ Լոմբարդային ռեպոյի տոկոսադրույքը սահմանվել է 8.25%, իսկ բանկերից ներգրավվող միջոցների տոկոսադրույքը՝ 5.25%։ ԿԲ նախագահ Մարտին Գալստյանի մամուլի ասուլիսը տեղի կունենա ժամը 14։00-ին։

«Սեպտեմբերի 15-ին տեղի է ունեցել Հայաստանի Հանրապետության կենտրոնական բանկի խորհրդի նիստ, որի ժամանակ որոշվել է՝

Բարձրացնել քաղաքականության տոկոսադրույքը՝ սահմանելով 6․75%
Հայաստանի Հանրապետության կենտրոնական բանկի կողմից տրամադրվող լոմբարդային ռեպոյի տոկոսադրույքը` 8.25%,
Հայաստանի Հանրապետության կենտրոնական բանկի կողմից բանկերից ներգրավվող միջոցների տոկոսադրույքը` 5.25%»,- ասված է ԿԲ-ի տարածած հաղորդագրությունում։

Ազգային ժողովի նիստը՝ ՈՒՂԻՂ

Անահիտ Խաչատրյան — Tue, 15 Sep 2026 06:00:07 +0000

Շարունակվում են նախօրեին մեկնարկած ԱԺ հերթական քառօրյայի աշխատանքները։

Արտարժույթների փոխարժեքները՝ սեպտեմբերի 15-ի դրությամբ

Անահիտ Խաչատրյան — Tue, 15 Sep 2026 05:45:52 +0000

Ներկայացնում ենք Հայաստանի փոխանակման կետերի կողմից գնվող և վաճառվող արտարժույթների փոխարժեքները սեպտեմբերի 15-ի դրությամբ՝ ըստ rate.am-ի:

Ամերիկյան մեկ դոլարը գնվում է 361 դրամ փոխարժեքով, վաճառվում՝ 364 դրամ փոխարժեքով:

Մեկ եվրոն գնվում է 417 դրամ փոխարժեքով, վաճառվում՝ 421 դրամ փոխարժեքով:

Մեկ ռուսական ռուբլին գնվում է 4,12 դրամ փոխարժեքով, վաճառվում՝ 4,20 դրամ փոխարժեքով։

Երևանում մեկնարկել է կայուն տրանսպորտային միջանցքներին նվիրված աշխատաժողով

editor4 — Mon, 14 Sep 2026 15:44:22 +0000

Սեպտեմբերի 14-ին ՀՀ արտաքին գործերի և միջազգային առևտրի նախարարության և ՄԱԿ-ի Ասիայի և Խաղաղօվկիանոսյան տարածաշրջանի տնտեսական և սոցիալական հանձնաժողովի (ESCAP) համագործակցությամբ Երևանում մեկնարկել է «Կայուն տրանսպորտային միջանցքների խթանումը՝ միջտարածաշրջանային և ներտարածաշրջանային փոխկապակցվածության ամրապնդման նպատակով» խորագիրը կրող կարողությունների զարգացման երկօրյա աշխատաժողով։ Այս մասին տեղեկացնում են նախարարությունից։

«Աշխատաժողովը նպատակ ունի խթանել քաղաքական երկխոսությունը, փորձի և գիտելիքի փոխանակումը, ինչպես նաև կարողությունների զարգացումը՝ Հարավային Կովկասի, Հյուսիսային և Կենտրոնական Ասիայի տարածաշրջանում և դրանից դուրս կայուն տրանսպորտային երթուղիների զարգացման և առանցքային միջազգային տրանսպորտային միջանցքներով Արևելք–Արևմուտք կապակցվածության ամրապնդման ուղղությամբ։

Աշխատաժողովի բացմանը ելույթով հանդես է եկել ՀՀ արտաքին գործերի և միջազգային առևտրի նախարարի տեղակալ Վահան Կոստանյանը։

Երկօրյա միջոցառման ընթացքում քննարկվելու են կայուն տրանսպորտային միջանցքների զարգացման առանցքային ուղղությունները: Մասնակիցները հնարավորություն կունենան իրականացնելու փորձի փոխանակում, քննարկելու տրանսպորտային միջանցքների զարգացման ընդհանուր մարտահրավերները և դիտարկելու դրանց արդյունավետությունը, դիմակայունությունն ու կայունությունը բարձրացնելու գործնական մոտեցումները։

Աշխատաժողովին մասնակցում են անդամ երկրների կառավարությունների ներկայացուցիչներ, ինչպես նաև տրանսպորտային օպերատորներ, մասնավոր հատվածի, գիտական շրջանակների, միջազգային կազմակերպությունների, զարգացման գործընկերների և ոլորտի այլ շահագրգիռ ներկայացուցիչներ»,- ասվում է հաղորդագրությունում։

Հայաստանն ու Իրանը «Պարզեցված մաքսային միջանցքի» մասին արձանագրություն են ստորագրել

Անահիտ Խաչատրյան — Mon, 14 Sep 2026 11:18:48 +0000

ՊԵԿ նախագահ Էդուարդ Հակոբյանի՝ Իրան կատարած այցի ընթացքում Հայաստանի և Իրանի միջև ստորագրվել է ապրանքների ու տրանսպորտային միջոցների վերաբերյալ նախնական տեղեկատվության փոխանակման՝ «Պարզեցված մաքսային միջանցքի» մասին արձանագրություն։ Կողմերը պայմանավորվել են նաև երկարաձգել Մեղրի–Նորդուզ սահմանային դարպասի համատեղ օգտագործման համաձայնագրի գործողության ժամկետը և աշխատել սահմանային թողունակության բարձրացման ուղղությամբ։

«Պետական եկամուտների կոմիտեի նախագահ Էդուարդ Հակոբյանի գլխավորած պատվիրակությունն աշխատանքային այցով եղել է Իրանի Իսլամական Հանրապետությունում։

Այցի շրջանակում ՊԵԿ նախագահ Էդուարդ Հակոբյանը հանդիպում է ունեցել ԻԻՀ տնտեսական հարցերի և ֆինանսների փոխնախարար, մաքսային ծառայության ղեկավար Ֆորուդ Ասգարիի գլխավորած պատվիրակության հետ։

Հանդիպմանն երկու ընդգծվել են վերջին շրջանում համագործակցության ամրապնդմանն ուղղված քայլերը և կարևորել տարբեր հարցերի շուրջ առաջիկայում առավել սերտ համագործակցելու անհրաժեշտությունը։ Քննարկվել են երկու երկրների միջև միջսահմանային առևտրային հոսքերի և հսկողական գործառնությունների դյուրացմանն ուղղված երկկողմ հետաքրքրության մի շարք հարցեր։ Մասնավորապես, կարևորելով նախնական տվյալների կանոնավոր փոխանակումը՝ որպես փոխադարձ առևտրի դյուրացման և անվտանգության ապահովման կաևոր գործիք՝ կողմերը նախանշել են համակարգի հնարավորինս վաղ գործարկման համար անհրաժեշտ քայլերը։ Անդրադարձ է կատարվել նաև կողմերի միջև լիազորված տնտեսական օպերատորների փոխճանաչմանն ուղղված աշխատանքներին ու վերջնական պայմանավորվածության հասնելու քայլերին։ Հանդիպման արդյունքում համաձայնություն է ձեռքբերվել Մեղրի-Նուրդուզ սահմանային դարպասի համատեղ օգտագործման մասին համաձայնագրի գործողության ժամկետի երկարաձգման հարցի շուրջ։ Քննարկվել են նաև սահմանային թողունակության ծավալների մշտադիտարկման և այդ ծավալների բարձրացմանն ուղղված մեխանիզմների ներդրման հարցեր։
Այցի շրջանակում ՊԵԿ պատվիրակությունը շրջայց է կատարել նաև Նորդուզի անցման կետում, որտեղ ներկայացվել է ԻԻՀ ձեռքբերումները՝ մաքսային համակարգի թվայնացման շրջանակում ։ Քննարկվել են նաև փոխադարձ հետաքրքրություն ներկայացնող այլ հարցեր։

ՊԵԿ նախագահ Էդուարդ Հակոբյանը նշել է, որ Հայաստանն այսօր վճռականորեն շարժվում է տարածաշրջանային զարգացման, կայունության և փոխկապակցվածության ընդլայնման ճանապարհով։ ՊԵԿ նախագահն ընդգծել է, որ տարածաշրջանային մարտահրավերներին դիմակայելու և համատեղ բարգավաճման հասնելու լավագույն ուղին փոխադարձ վստահության վրա հիմնված ջանքերի համատեղումն է։ «Այս համատեքստում կարևոր է նաև երկու երկրների՝ որպես տարածաշրջանային կարևոր լոգիստիկ հանգույցների կայացմանը փոխադարձաբար նպաստելու անհրաժեշտությունը։ Այս փոխադարձ զարգացումն ու սերտ համագործակցությունը կարևոր նշանակություն ունեն երկկողմ տնտեսական աճի և տարածաշրջանային կայուն զարգացման համար»,–նշել է Էդուարդ Հակոբյանը։

Հանդիպման ավարտին ստորագրվել է Հայաստանի Հանրապետության և Իրանի Իսլամական Հանրապետության տարածքներով տեղափոխվող ապրանքների և տրանսպորտային միջոցների վերաբերյալ նախնական տեղեկատվության փոխանակման կազմակերպման («Պարզեցված մաքսային միջանցք») մասին արձանագրությունը, որի հիմնական նպատակն արտաքին տնտեսական գործունեության օրինապահ մասնակիցների համար առավել բարենպաստ պայմանների ստեղծումն է և մաքսային հսկողության և ձևակերպումների հետ կապված ընթացակարգերի արագացումը։

Կողմերը ստորագրել են նաև հանդիպման շրջանակում ձեռք բերված պայմանավորվածությունների մասին արձանագրություն»,- ասված է ՊԵԿ-ի տարածած հաղորդագրությունում։

Անընդունելի է․ չեմ կարող քանդել տալ տասնամյակների ինքնակամները, բայց ձեր աչքի առաջ նորերը հայտնվեն․ Ավինյան․ ՏԵՍԱՆՅՈՒԹ

Անահիտ Խաչատրյան — Mon, 14 Sep 2026 08:19:00 +0000

Երևանի քաղաքապետ Տիգրան Ավինյանը վարչական շրջանների ղեկավարներին զգուշացրեց՝ նոր ինքնակամ շինությունների հայտնվելու դեպքում պատասխանատվությունը կրելու են նաև իրենք։

Երևանի քաղաքապետարանի գործակարգավարական նիստում ներկայացվեց մայրաքաղաքում ապօրինի կրպակների և առանց թույլտվության տեղադրված գովազդային վահանակների ապամոնտաժման վերաբերյալ հաշվետվությունը։

Զեկույցի համաձայն՝ հաշվետու ժամանակահատվածում Երևանի վարչական տարածքում ապամոնտաժվել է 783 գովազդ, որից 49-ը՝ ցանցային, 734-ը՝ վահանակ։ Ապամոնտաժվել է նաև մեկ վագոն-տնակ և մեկ կրպակ՝ Աջափնյակ վարչական շրջանում, մեկ կրպակ՝ Էրեբունիում, և երկու կրպակ՝ Նոր Նորքում։

Նախորդ ժամանակահատվածի համեմատ՝ ապամոնտաժված գովազդների թիվն ավելացել է 137-ով։ Ավինյանը, սակայն, խնդրահարույց համարեց վարչական շրջաններում նոր ինքնակամ շինությունների հայտնվելը։

«Ուզում եմ հիշեցնել մեր վարչական շրջանների ղեկավարներին, որ դա առաջին հերթին իրենց պատասխանատվությունն է և իրենց անձնակազմերի պատասխանատվությունը»,- ասաց քաղաքապետը։

Ավինյանի խոսքով՝ խնդիր է, երբ քաղաքապետարանի համապատասխան վարչությունները շրջայցերի ընթացքում հայտնաբերում են նոր կառուցված ինքնակամ շինություններ։

«Ես կարծում եմ՝ այդտեղ մենք ունենք շատ խորքային խնդիր, որը կարող է նաև որոշակիորեն ադմինիստրատիվ փոփոխությունների և ռեֆորմների շրջանակներում շատ լուրջ հիմք հանդիսանալ խորքային փոփոխությունների»,- նշեց նա։

Քաղաքապետը նաև հայտարարեց, որ այսուհետ յուրաքանչյուր նման արձանագրում խնդիր է լինելու տվյալ վարչական շրջանի ղեկավարի համար։

«Ես չեմ կարող այս մի ձեռքով բոլոր հատվածներում քանդել տալ տասնամյակների ինքնակամ շինությունները, ու ձեր աչքի առաջ նորերը հայտնվեն․ դա անընդունելի է, անընդունելի»,- հայտարարեց Երևանի քաղաքապետը։

Մանրամասները՝ տեսանյութում։

Արփի Հակոբյան

«Փարքինգի նոր տրամաբանություն քննարկեք, որ ինչ-որ միջին մակարդակի չինովնիկներ սև փող չաշխատեն»․ Ավինյան. ՏԵՍԱՆՅՈՒԹ

Անահիտ Խաչատրյան — Mon, 14 Sep 2026 07:45:07 +0000

Երևանում ապօրինի վճարովի ավտոկայանատեղերի կազմակերպման դեմ իրականացված միջոցառումների արդյունքում 80 անձ է բերման ենթարկվել ոստիկանության համապատասխան բաժիններ։ Այս մասին Երևանի քաղաքապետարանի գործակարգավարական նիստում զեկուցեց հասարակական կարգի պահպանության ծառայության պետի պաշտոնակատար Ավետ Բաբայանը։

Նրա խոսքով՝ 2026 թվականի հուլիսի 13-ից օգոստոսի 28-ն ընկած ժամանակահատվածում ծառայության և ՆԳՆ ոստիկանության գվարդիայի աշխատակիցները համատեղ միջոցառումներ են իրականացրել՝ Երևանում ոչ սահմանված վայրերում, օրենսդրության պահանջների խախտմամբ ծառայություններ մատուցելու դեպքերը հայտնաբերելու ուղղությամբ։ Արդյունքում՝ առանց համապատասխան իրավական հիմքերի վճարովի ավտոկայանատեղերի կազմակերպման համար 80 անձ է բերման ենթարկվել ոստիկանություն, իսկ ծառայության կողմից նրանց վերաբերյալ կազմվել են համապատասխան արձանագրություններ։

Զեկույցի համաձայն՝ միջոցառումները շարունակական բնույթ են կրում։ Քաղաքապետ Տիգրան Ավինյանն անդրադարձավ խնդրին՝ նշելով, որ իր մոտ ձևավորվել է կարծիք, թե պետական համակարգում կան անձինք, որոնք սպասարկում են այդ գործընթացը։

«Ես ունեմ արդեն ձևավորված կարծիք, որ մենք պետական համակարգում ունենք անձինք, որոնք այս գործընթացը սպասարկում են և որոշակի պաշտպանություն են փորձում տալ»,- ասաց Ավինյանը՝ ընդգծելով, որ պետք է շարունակաբար վերացնել այդ երևույթը քաղաքից։

Միաժամանակ քաղաքապետը առաջարկեց քննարկել Valet parking-ի նոր տրամաբանությունը՝ նման գործունեությունը օրինական դաշտ բերելու նպատակով։

«Ինչ-որ միջին մակարդակի չինովնիկներ էդտեղ սև փող չաշխատեն, այլ բերենք մի ինչ-որ տրամաբանության, որտեղ որ դա լինի օրինական գործունեություն»,- ասաց քաղաքապետը։

Նա հանձնարարեց տրանսպորտի և առևտրի վարչություններին երկու ամսվա ընթացքում ուսումնասիրել Valet parking-ի փորձը և ներկայացնել նախագիծ ու առաջարկներ։

Ավինյանի խոսքով՝ Երևանում փարկինգը աճող երթևեկության պայմաններում ամենամեծ խնդիրներից մեկն է։ Նա միաժամանակ նշեց, որ քաղաքի փոքր կենտրոնում ամենուրեք կայանատեղիների հասանելիությունը պարտադիր չէ, իսկ մի շարք փողոցներում կայանատեղիները պետք է ընդհանրապես դուրս բերվեն փողոցներից՝ երթևեկությանը չխոչընդոտելու համար։

Քաղաքապետը հանձնարարեց նաև ներկայացնել այն հատվածները, որտեղ թեք ավտոկայանումը դառնում է ուղիղ, ինչպես նաև այն վայրերը, որտեղ ավտոկայանումը վերանում է, և հանրությանը բացատրել նման փոփոխությունների պատճառները։

«Դա է մեր առաջնահերթությունը, տրանսպորտային, երթևեկության մեր խնդիրները պետք է լինեն մեր առաջնահերթությունը, և քաղաքապետարանը պետք է կենտրոնացած լինի այդ խնդիրների լուծման վրա»,- ասաց նա։

Նրա խոսքով՝ Երևանում երթևեկության խնդիրը գնալով սրվում է՝ նաև տնտեսական իրավիճակի և քաղաքում մարդատար ավտոմեքենաների թվի ավելացման հետևանքով։

Ավինյանը հանձնարարել է հանձնարարականների շարքում ներառել նաև խելացի լուսացույցների նախագիծը, երթևեկության կենտրոնի աշխատանքը, տեսախցիկների տեղադրման և տվյալների հավաքագրման ընթացքը։

Մանրամասները՝ տեսանյութում։

Արփի Հակոբյան