02.11.2024 | 14:03
ՀՀ ոստիկանությունը քաղաքական պատվեր է կատարում․ Հ․ Ավետիսյանը դիմեց Ոստիկանությանը և ԱՄՆ դեսպանին․ ՏԵՍԱՆՅՈՒԹ
ՔՊ խոսնակը պարզաբանում է աղմուկ հանած միջադեպը. Գևորգ Աճեմյանի թեկնածությունը հաստատված չի եղել
Քաղաքականություն
15.11.2018 | 19:59
«Քաղաքացիական պայմանագիր» կուսակցության արդեն նախկին անդամ Գևորգ Աճեմյանի թեկնածությունը հաստատված չի եղել: Factor.am-ի հետ զրույցում հայտարարեց «Քաղաքացիական պայմանագիր» կուսակցության մամուլի խոսնակ Վահան Կոստանյանը՝ արձագանքելով երեկ ՔՊ շարքերը լքելու մասին Աճեմյանի հայտարարությանը:
Երեկ կուսակցության շարքերը լքելու մասին Գևորգ Աճեմյանը հայտարարեց այն բանից հետո, երբ հրապարակվեց «Իմ քայլը» դաշինքի նախընտրական ցուցակը: Ավելի ուշ, ուղիղ հեռարձակմամբ, Գևորգ Աճեմյանը փորձեց բացատրել, թե ինչով է պայմանավորված իր որոշումը: Նրա պատմելով՝ կուսակցության վարչության փոխնախագահ Սուրեն Պապիկյանը ֆեյսբուքյան նամակագրությամբ հաստատել է ռեյտինգային ընտրակարգով իր առաջադրումը, իսկ հետո պարզվել է, որ իր թեկնածությունը հաստատված չէ:
«Հաստատված է եղել այն, որ իր թեկնածությունը քննարկվելու է, քննարկման արդյունքում պետք է հաստատվեր»,- մեզ հետ զրույցում պարզաբանեց Վահան Կոստանյանը՝ ընդգծելով, որ նախկին կուսակցի կողմից տեղեկատվությունը ներկայացված է եղել ոչ ամբողջական:
Գևորգ Աճեմյանը, որն ի դեպ, հեղափոխությունից հետո նշանակվել էր ՀՀ վարչապետի աշխատակազմի գործերի կառավարիչ, աշխատանքից ազատվեց «Աշտարակ կաթ» ընկերության շուրջ ստեղծված աղմկահարույց պատմության հետևանքով:
Հիշեցնենք՝ Գևորգ Աճեմյանը պաշտոնավարման ընթացքում կառավարությունում հանդիպել էր «Աշտարակ կաթ» ընկերության ներկայացուցիչներին, հորդորել և սպառնացել, որ ընկերությունը փոխանցեն նախկին տիրոջը՝ Աշոտ Ափոյանին։ Կառավարությունից, ըստ էության, չէին հերքել, որ Աճեմյանի ազատման պատճառը նշված միջադեպն է եղել:
Այսօր արդեն ՔՊ-ն լքած Գևորգ Աճեմյանը կուսակցությանը մեղադրում է իր հանդեպ կանխակալ վերաբերմունք ցուցաբերելու մեջ: Ըստ Աճեմյանի՝ նրա թեկնածությունը չեն հաստատել, որպեսզի Շենգավիթ, Մալաթիա-Սեբաստիա վարչական շրջաններն ընդգրկող ընտրատարածքում որոշ ՔՊ-ականների մրցակից չլինի: Խոսքը վերաբերում է առաջին փոխվարչապետի պաշտոնակատար Արարատ Միրզոյանին, ԿԳ նախարարի պաշտոնակատար Արայիկ Հարությունյանին, Բնապահպանության նախարարի պաշտոնակատար Էրիկ Գրիգորյանին և ԱԺ «Ելք» խմբակցության պատգամավոր Հրաչյա Հակոբյանին:
«Կուսակցությունն այդ ընտրատարածքում ունի 14 ռեյտինգային թեկնածու և նրանցից որևէ մեկին նախապատվություն չի տալիս, այսինքն՝ բոլորին մի աչքով է նայում: Որևէ մեկի նկատմամբ կանխակալ վերաբերմունք չկա»,- հակադարձելով Գևորգ Աճեմյանի պնդումներին՝ վստահեցրեց ՔՊ խոսնակը:
