25.04.2026 | 11:33
Հռոմում կայացել է Հայոց ցեղասպանության 111-րդ տարելիցին նվիրված միջոցառում
Իրանը հայտարարել է, որ չի բանակցելու ԱՄՆ-ի հետ և սպառնացել ԱՄՆ-ի ու Իսրայելի հարվածներին աջակցողներին
Քաղաքականություն
04.03.2026 | 15:37
Իրանը մտադիր չէ բանակցել ԱՄՆ-ի հետ և կարող է շարունակել Մերձավոր Արևելքի պատերազմը այնքան ժամանակ, որքան անհրաժեշտ է, պետական հեռուստատեսության եթերում հայտարարել է Իրանի հանգուցյալ գերագույն առաջնորդ այաթոլլահ Ալի Խամենեիի ավագ օգնական Մոհամմադ Մոխբերը, գրում է France 24-ը։
Նա ասել է, որ Իրանը «չի վստահում ամերիկացիներին, և մենք որևէ հիմք չունենք նրանց հետ որևէ բանակցությունների համար»։
«Մենք կարող ենք շարունակել պատերազմն այնքան ժամանակ, որքան ուզում ենք»,- հավելել է նա։
Իրանի դատական համակարգի ղեկավար Ղոլամ Հոսեյնի Մոհսենի Էջեհեին էլ սպառնացել է «նրանց, ովքեր ասում կամ անում են որևէ բան»՝ ի պաշտպանություն իսրայելա-ամերիկյան ավիահարվածների, որոնք ուղղված են Իսլամական Հանրապետությանը։ Նշվում է, որ նրա խոսքերը բարձրացնում են ձերբակալվածների մահապատժի մեղադրանքների հավանականությունը։
«Յուրաքանչյուր ոք, ով ասում կամ անում է որևէ բան Ամերիկայի և սիոնիստական ռեժիմի կամքին համապատասխան, թշնամու կողմն է և պետք է վարվի հեղափոխական, իսլամական սկզբունքներին և պատերազմական պայմաններին համապատասխան»,- հավելել է նա։
Միաժամանակ, Իրանի արտաքին գործերի նախարար Աբբաս Արաղչին ԱՄՆ նախագահ Դոնալդ Թրամփին մեղադրել է Իրանի միջուկային բանակցություններում իր անիրատեսական սպասումները չբավարարելու մեջ։
«Երբ բարդ միջուկային բանակցությունները դիտակվում են որպես անշարժ գույքի գործարք, իսկ մեծ ստերը մթագնում են իրականությունը, անիրատեսական սպասումները երբեք չեն կարող իրականանալ։ Արդյո՞ւնքը։ Բանակցությունների սեղանը ռմբակոծվեց։ Թրամփը դավաճանեց դիվանագիտությանը և իրեն ընտրած ամերիկացիներին»,- հավելել է Արաղչին։
Թարգմանությունը՝ Էմմա Չոբանյանի
