Կանադայի դպրոցներից մեկում զանգվածային հրաձգության հետևանքով 10 մարդ է զոհվել, ավելի քան 25 վիրավոր կա

Կանադայի Բրիտանական Կոլումբիա շրջանի Թամբլեր Ռիջ քաղաքի ավագ դպրոցում տեղի ունեցած կրակոցների հետևանքով զոհվել է առնվազն 10 մարդ, այդ թվում՝ մի կին, որին ոստիկանությունը համարում է կրակողը։ Եվս երկու մարդու դիակ է հայտնաբերվել միջադեպի հետ ենթադրաբար կապված տանը, հայտնել են Կանադայի իշխանությունները, գրում է France 24-ը։

Կանադայի ոստիկանությունը հայտնել է, որ միջադեպի հետևանքով վիրավորվել է ավելի քան 25 մարդ, երկուսի կյանքին վտանգ է սպառնում։ Ոստիկանության պետ Քեն Ֆլոյդը լրագրողներին ասել է, որ քննիչները պարզել են կրակողի ինքնությունը, բայց չեն հրապարակում նրա անունը, և որ կասկածյալի դրդապատճառները մնում են անհայտ։

«Մենք դեռևս չենք կարող հասկանալ, թե ինչու կամ ինչը կարող էր այս ողբերգության պատճառ դառնալ»,- ասել է Ֆլոյդը։

Նա հավելել է, որ ոստիկանությունը դեռևս հետաքննում է, թե ինչպես են զոհերը կապված կրակողի հետ։

Դպրոցում հրաձգությունները հազվադեպ են Կանադայում։ Թամբլեր Ռիջ քաղաքը, որն ունի շուրջ 2400 բնակչություն, գտնվում է Վանկուվերից ավելի քան 1000 կիլոմետր հյուսիս՝ Ալբերտայի հետ սահմանի մոտ։

«Կրակոցներին արձագանքելու նախնական փուլում ոստիկանությունը մտել է դպրոց՝ սպառնալիքը գտնելու համար։ Խուզարկության ընթացքում ոստիկանները հայտնաբերել են մի քանի զոհերի։ Կրակողը համարվող անձը նույնպես հայտնաբերվել է մահացած՝ ինքնավնասվածքով»,- ասվում է ոստիկանության հայտարարության մեջ։

Կանադայի վարչապետ Մարկ Քարնին ցավակցություններ է հայտնել զոհվածների ընտանիքներին և ընկերներին։ Միաժամանակ, Քարնին չեղարկել է Գերմանիա կատարելիք այցը։

Շրջանային կառավարության կայքում Թամբլեր Ռիջի միջնակարգ դպրոցը նշված է որպես 7-ից 12-րդ դասարանների 175 աշակերտ ունեցող դպրոց։

Թարգմանությունը՝ Էմմա Չոբանյանի