Կարգալույծ հռչակված քահանաները եկեղեցու դեմ հայց են ներկայացրել. պահանջում են իրենց վերականգնել հոգևոր հովվի պաշտոնում

Կարգալույծ հռչակված քահանաներ Ստեփան Ասատրյանը (Տեր Արամ քահանա) և Արամայիս Թախմազյանը (Տեր Թադե քահանա) հայցադիմումներ են ներկայացրել ընդդեմ Հայաստանյայց առաքելական սուրբ եկեղեցու։ Նրանք պահանջում են անվավեր ճանաչել Ամենայն հայոց կաթողիկոս Գարեգին Բ-ի տնօրինությունները և իրենց վերականգնել հոգևոր հովվի պաշտոնում։

Մասնավորապես, Ստեփան Ասատրյանը պահանջում է անվավեր ճանաչել կաթողիկոսի 2025թ. հոկտեմբերի 21-ի տնօրինությունը իրեն կարգալույծ հռչակելու մասին և վերականգնել Սուրբ Հովհաննավանքի հոգևոր հովվի պաշտոնում, իսկ Արամայիս Թախմազյանը պահանջում է անվավեր ճանաչել կաթողիկոսի 2025թ. դեկտեմբերի 2-ի հայրապետական տնօրինությունը Թալինի տարածաշրջանի հոգևոր հովիվ Տ․ Թադե քահանա Թախմազյանին կարգալույծ հռչակելու մասին և որպես հետևանք իրեն  վերականգնել հոգևոր հովվի պաշտոնում:

Հայցադիմումները մակագրվել են Արմավիրի մարզի ընդհանուր իրավասության դատարանի դատավորներ Հովհաննես Մելքոնյանին և Սիմա Աբովյանին:

Հիշեցնենք՝ նախկին քահանաներն առաջիններից էին, որ միացել են վարչապետ Նիկոլ Փաշինյանի կողմից «եկեղեցու բարենորոգմանը», ինչից հետո կաթողիկոսի տնօրինությամբ նրանք կարգալույծ էին հռչակվել։

Ավելի վաղ, Հայաստանյաց առաքելական Սուրբ եկեղեցին էր երկու հայց ներկայացրել կարգալույծ հռչակված Ստեփան Ասատրյանի դեմ՝ դատարանից պահանջելով պարտավորեցնել նրան հետ վերադարձնել Արագածոտնի մարզի Աշտարակ համայնքի Օհանավան գյուղի, այդ թվում՝ եկեղեցու բանալիները, ինչպես նաև նրան հատկացված բնակարանը։

Ռոզա Վարդանյան