Սաուդյան Արաբիայում «որոնում» են Կրիշտիանու Ռոնալդուին․ ԼՈՒՍԱՆԿԱՐ

Սաուդյան Արաբիայի տարբեր քաղաքների փողոցներում հայտնվել են հեգնական հայտարարություններ «Ալ Նասրի» պորտուգալացի հարձակվող Կրիշտիանու Ռոնալդուի անհետացման մասին, հաղորդում է The Touchline-ը։

Պորտուգալիայի հավաքականի ավագի լուսանկարով հայտարարության տեքստում նշված է հետևյալը․ «40-ամյա տղամարդ, որը ստիպված է անմխիթար լաց լինել, մինչ ընտանիքը նրան որոնում է»։

«Ոսկե գնդակի» 5-ակի դափնեկրին քննադատել է Սաուդյան Արաբիայում հայտնի հաղորդավար Վալիդ Ալ-Ֆարաջը, որը սոցցանցերում գրել է հետևյալը․ «Նա պետք է իմանա իր տեղը։ Սա Սաուդյան Արաբիան է, ոչ թե «Ռոնալդու Արաբիան»։ Նա այստեղ վարձու աշխատող է։ Նա ստանում է հսկայական աշխատավարձ, որը Եվրոպայում երբեք չի ունեցել։ Նա պետք է հարգի լիգան կամ հեռանա»։

Ավելի վաղ լուրեր էին շրջանառվում, որ Ռոնալդուն մտադիր է հեռանալ սաուդյան ակումբից։ Նա արդեն բոյկոտել է «Ալ Նասրի» նախորդ հանդիպումն ու բաց թողել մարզումը։

40-ամյա ֆուտբոլիստը դժգոհ է ակումբում տիրող իրավիճակից ու Սաուդյան Արաբիայի պետական ներդրումային հիմնադրամի որոշումներից։ Ռոնալդուն կարծում է, որ հիմնադրամն ավելի շատ է օգնում «Ալ Նասրի» մրցակիցներին ու կատարում մեծ ներդրումներ։

Կրիշտիանու Ռոնալդուն 2023 թվականից է խաղում «Ալ Նասրում», որի հետ պայմանագիր ունի մինչև 2027 թվականը։ Սաուդյան Արաբիայի ընթացիկ առաջնությունում հարձակվողը 18 խաղում դարձել է 17 գոլի հեղինակ և 2-3-րդ տեղերն է բաժանում ռմբարկուների ցուցակում՝ մեկ գոլ զիջելով առաջատար Այվան Թոնիին («Ալ Ահլի»)։