07.06.2026 | 14:59
Սիմոնյանը՝ դստեր, Ծառուկյանը՝ թոռան հետ, իսկ Մարուքյանին երեխայի հետ քվեախցիկ մտնել չթույլատրեցին․ ի՞նչ է ասում օրենքը
Մահացել է «Տանը մենակ» ֆիլմում մոր դերակատար Քեթրին Օ’Հարան
Մշակույթ
31.01.2026 | 11:55
Դերասանուհի Քեթրին Օ’Հարան, որը հայտնի էր «Տանը մենակ» ֆիլմում Քևինի մոր և «Շիտի առվակը» ֆիլմում Մոյրա Ռոուզի կատակերգական դերերով, մահացել է 71 տարեկանում․ գրում է euronews-ը։
Կանադայում ծնված կատակերգուն մահացել է իր տանը՝ Լոս Անջելեսում, «կարճատև հիվանդությունից հետո», ասվում է նրա գործակալության՝ Creative Artists Agency-ի ուրբաթ օրը հրապարակված հայտարարության մեջ։ Նրա մահվան հանգամանքների մասին այլ մանրամասներ չեն հաղորդվել։
Օ’Հարայի կարիերան սկսվել է 1970-ականներին Տորոնտոյում գտնվող «Second City» իմպրովիզացիոն կատակերգական շոուում։ Այնտեղ նա սկսել է աշխատել Յուջին Լևիի հետ, որի հետ համագործակցել է ողջ կյանքի ընթացքում։
Լևին նրա խաղընկերն էր «Շիտի առվակը» սերիալում, և նրանք միասին հայտնվել են SCTV սկետչ շոուում, որը նպաստել է այլ կատակերգուների, ինչպիսիք են Մարտին Շորթը, Անդրեա Մարտինը, Ջոն Քենդին և Ռիք Մորանիսը, կարիերայի մեկնարկին։
1990 թվականին էկրան բարձրացավ Քրիս Կոլումբուսի «Տանը մենակ» ֆիլմը, որտեղ Օ’Հարան մարմնավորեց Քեյթ Մաքքալիսթերին՝ գլխավոր հերոս Քևինի մորը։ Դերասանուհին նույն կերպարին վերադարձավ նաև 1992 թվականի շարունակությունում։
Գրեթե 50-ամյա կարիերայի ընթացքում Քեթրին Օ’Հարան արժանացել է բազմաթիվ մրցանակների, այդ թվում՝ երկու «Էմմի»-ի և «Ոսկե գլոբուս»-ի։
Թարգմանությունը՝ Անահիտ Խաչատրյանի
