10.01.2026 | 14:00
Արման Ծառուկյանը և Լենս Փալմերն անցկացրել են հայացքների մենամարտ․ ՏԵՍԱՆՅՈՒԹ
ԱՄՆ-ն մտադիր է ցամաքային գործողություն իրականացնել Մեքսիկայում
Քաղաքականություն
09.01.2026 | 13:49
ԱՄՆ նախագահ Դոնալդ Թրամփը հայտարարել է, որ Միացյալ Նահանգները շուտով կհարվածի թմրակարտելներին ցամաքում, գրում է The Hill-ը։
«Մենք սկսելու ենք պայքարել կարտելների դեմ տեղում։ Կարտելները վերահսկում են Մեքսիկան»,- ասել է Թրամփը Fox News-ի «Hannity» հաղորդման եթերում՝ առանց մանրամասնելու իր ծրագրերը։
Նրա մեկնաբանությունները հաջորդել են Կարիբյան ծովում և ջրային այլ տարածքներում, ենթադրաբար, թմրանյութեր տեղափոխող նավերի վրա ԱՄՆ-ի՝ մի քանի ամիս տևած ռազմական գործողություններին։ Սպիտակ տան և Պենտագոնի պաշտոնյաներն արդարացրել են մահացու հարվածները՝ նշելով, որ նավերից մեկին հարվածով ոչնչացրել են ահաբեկչական ճանաչված վենեսուելական «Տրեն դե Արագուա» խմբավորման անդամներին:
Թրամփի վարչակազմը շաբաթ ձերբակալել է Վենեսուելայի նախագահ Նիկոլաս Մադուրոյին և նրա կնոջը՝ Սիլիա Ֆլորեսին։ Երկուսն էլ տեղափոխվել են ԱՄՆ՝ թմրանյութերի ապօրինի շրջանառության մեղադրանքով դատարանի առջև կանգնելու։
ԱՄՆ զինված ուժերը նաև հարվածներ են հասցրել Վենեսուելայի հյուսիսային շրջանի ենթակառուցվածքներին՝ նախքան Մադուրոյի Կարակասում գտնվող նստավայրի վրա հարձակումը։ Բացի այդ, Թրամփի վարչակազմը փորձել է վերահսկողություն հաստատել Վենեսուելայի նավթարդյունաբերության նկատմամբ և հայտարարել, որ երկիրն ԱՄՆ-ին կտրամադրի 30-ից 50 միլիոն բարել նավթ։
«Միջամտությունը երբեք ժողովրդավարություն չի բերել, ոչ էլ երկարատև բարեկեցություն կամ կայունություն է ստեղծել։ Մենք կտրականապես մերժում ենք միջամտությունն այլ երկրների ներքին գործերին»,- անցյալ շաբաթ ասել էր Մեքսիկայի նախագահ Կլաուդիա Շեյնբաումը։
Թարգմանությունը՝ Էմմա Չոբանյանի
