14.02.2026 | 20:05
«Տոտենհեմը» նոր գլխավոր մարզիչ ունի
Հույս ունենք, որ նոր տարին լավ նորություններով կսկսվի․ Վահան Կոստանյան
Քաղաքականություն
30.12.2025 | 13:46
«Եթե հայ-թուրքական սահմանը երրորդ երկրների քաղաքացիների, դիվանագիտական անձնագիր ունեցողների համար հունվարի 1-ից բացվեր, ապա արդեն հայտարարած կլինեինք, բայց մենք լիահույս ենք, որ այս ուղղությամբ դրական զարգացումներ կլինեն արդեն շուտով»,-այս մասին Factor TV-ի հետ զրույցում հայտնեց արտաքին գործերի նախարարի տեղակալ Վահան Կոստանյանը։
Նրա խոսքով՝ դինամիկան խոսում է դրական զարգացումների մասին, որոնք սպասվում են Հայաստան-Թուրքիա հարաբերությունների կոնտեքստում։
«Հայկական կողմը շատ ավելի վաղուց էր պատրաստ, ենթակառուցվածքային առումով նաև, համապատասխան մաքսատան շենքի կառուցմամբ և այլն։ Դեռ ամիսներ առաջ պատրաստ էր։ Դեռ տարուց ավելի, ես կասեի, գործարկելու այս պայմանավորվածությունները։ Եվ հույս ունենք, որ նոր տարին լավ նորություններով կսկսվի։ Այս պահի դրությամբ չունենք ինդիկացիա, որ հունվարի 1-ին հենց տեղի կունենան այդ բացումները»,-նշեց Կոստանյանը։
Փոխնախարարը հիշեցրել է՝ Հայաստանը պատրաստ է բացել ցամաքային անցակետերը թուրքական և ադրբեջանական բեռնատարների համար, որպեսզի Հայաստանի միջոցով նաև երկու հարևանները առևտուր իրականացնեն։ Առաջարկը մնում է ուժի մեջ․ «Ակնհայտ է, որ տարածաշրջանում զարգացումներ են տեղի ունենում, այդ թվում նաև ապաշրջափակման կոնտեքստում։ Եվ հույս ունենք, որ այս պատկերը կամբողջանա նաև Թուրքիայի մասնակցությամբ ապաշրջափակման գործընթացին, որը էականորեն դրական ազդեցություն կունենա ընդհանուր տարածաշրջանի դինամիկայի և փոխկապակցվածությունների ստեղծման վրա։ Իսկ ինչքան շատ լինեն այս փոխկապակցվածությունները, այնքան ավելի կամրապնդվի ստեղծված խաղաղությունը տարածաշրջանում»։
Կոստանյանի խոսքով՝ վերջին շրջանում հայկական կողմը թուրքական կողմի հետ առավելապես կենտրոնացած է Կարս-Գյումրի երկաթգծի ենթակառուցվածքների ֆիզիկական վերագործարկման, վերակառուցման վրա։ Փոխնախարարը նշում է, որ թուրքական կողմը արդեն իսկ սկսել է որոշակի աշխատանքներ իրականացնել սահմանի իրենց հատվածում։
Հարցազրույցն ամբողջությամբ դիտեք այսօր Factor TV-ի յութուբյան ալիքում։
