10.10.2026 | 18:18
ԶՈՒ ԳՇ պետն այցելել է մի շարք զորամասեր
AP-ն հաղորդում է Վենեսուելայից ՌԴ դիվանագետների ընտանիքների տարհանման մասին․ Մոսկվան հերքում է
Քաղաքականություն
23.12.2025 | 20:44
Ռուսաստանի արտաքին գործերի նախարարությունը սկսել է դիվանագետների ընտանիքների տարհանումը Վենեսուելայից, հաղորդում է Associated Press-ը՝ հղում անելով եվրոպական հետախուզության պաշտոնյային, գրում է Meduza-ն։
Աղբյուրի խոսքով՝ կանանց և երեխաների տարհանումը սկսվել է ուրբաթ՝ դեկտեմբերի 19-ին։
Դեկտեմբերի 22-ի երեկոյան Ռուսաստանի արտաքին գործերի նախարարության Telegram ալիքում հայտնվել է գրառում, որում պնդվում էր, որ AP-ի տեղեկատվությունը դեսպանատան տարհանման մասին կեղծ է։ Այն ներառում էր Վենեսուելայում Ռուսաստանի դեսպանատան գրառման հղում՝ Կարակասում գտնվող դիվանագիտական ներկայացուցչությունում երկրում բնակվող ՌԴ քաղաքացիների երեխաների համար կազմակերպված Նոր տարվա երեկույթի մասին։
Իր հերթին, Վենեսուելայի արտաքին գործերի նախարար Իվան Հիլը հայտարարել է, որ հեռախոսազրույց է ունեցել Ռուսաստանի ԱԳ նախարար Սերգեյ Լավրովի հետ, որն իր աջակցությունն է հայտնել Վենեսուելային՝ ի պատասխան ԱՄՆ նախագահ Դոնալդ Թրամփի կողմից նավթատար լցանավերի շրջափակման։
«Ռուսաստանի արտաքին գործերի նախարարը հաստատել է, որ Ռուսաստանը Վենեսուելային կտրամադրի համապարփակ օգնություն և աջակցություն շրջափակմանը հակազդելու հարցում՝ արտահայտելով իր լիակատար աջակցությունը ՄԱԿ-ի Անվտանգության խորհրդում ձեռնարկված գործողություններին»,- ասվում է Հիլի հայտարարության մեջ։
Աշնան սկզբին ԱՄՆ-ն իր ամենաժամանակակից ավիակիրը՝ USS Gerald Ford-ը, ականակիրների և կործանիչների հետ միասին տեղակայել է Կարիբյան ավազանում, և սեպտեմբերից ի վեր հարվածներ է հասցնում, ենթադրաբար, թմրանյութեր տեղափոխող նավերին։ Թրամփի վարչակազմը Նիկոլաս Մադուրոյին չի ճանաչում որպես Վենեսուելայի օրինական նախագահ և երկրի կառավարությանը մեղադրում է թմրանյութերի ապօրինի շրջանառության դեմ պայքարի անբավարար ջանքերի համար։ Դեկտեմբերի 17-ին Թրամփը հայտարարել էր, որ հրամայել է շրջափակել Վենեսուելան և այդ երկրից մեկնող պատժամիջոցների տակ գտնվող բոլոր նավթատար լցանավերը։
Սեպտեմբերի սկզբին CNN-ը հաղորդել էր, որ Թրամփը քննարկում է Վենեսուելայում թմրամիջոցների կարտելների դեմ հարվածներ հասցնելու հարցը։ Սակայն նոյեմբերի կեսերի դրությամբ՝ Թրամփը դեռևս չի որոշել՝ ցամաքային գործողություն իրականացնե՞լ Վենեսուելայում, թե՞ ոչ։
Թարգմանությունը՝ Էմմա Չոբանյանի
