ԵՐԵՎԱՆԻ ԺԱՄԱՆԱԿՈՎ. ՀՀԿ-ն գիտի ոնց թալանել, ուստի կկարողանա նաև որպես ընդդիմություն թալանի փորձերի դեմն առնել.Վահագ Ռաշ. ՏԵՍԱՆՅՈՒԹ

«Կարծում եմ՝ խորհրդարանական ընտրություններից հետո Ազգային ժողովում տեսնելու ենք բոլորովին այլ՝ «չաղտոտված» և «չհեղինակազրկված» դեմքերի: Հիմա բոլոր կուսակցություններին ձեռք է տալիս այդպիսի թեկնածուների առաջադրել, որպեսզի ժողովուրդն իրենց ձայն տա»,- Factor.am-ի հետ զրույցում նման տեսակետ է հայտնում երգիչ Վահագ Ռաշը:

Նրա համոզմամբ՝ խորհրդարանի լուծարումից բացի, լավ կլիներ նաև ընտրական օրենսգիրքը փոխվեր, քանի որ դրա ներկայիս տարբերակը օլիգարխներին լայն հնարավորություն է տալիս անցնել խորհրդարան՝ նույնիսկ առանց գումար բաժանելու:

«Այն համոզման եմ, որ խորհրդարանական ընտրությունները հանդարտ կընթանան. բոլորը պետք է խելոք պահեն իրենց, որպեսզի կարողանան ձայն հավաքել: Անշուշտ, դժվար պայքար է լինելու: Կարծում եմ, որ ՀՀԿ-ն առաջիկա ընտրություններում կհաղթահարի անցողիկի շեմը: Ի դեպ, վատ չի լինի. մեզ հենց հիմա պակասում է ընդդիմությունը: ՀՀԿ-ն բոլոր ծակուծուկերը լավ գիտի, գիտի՝ ոնց թալանել, ուստի կկարողանա նաև թալանի փորձերի դեմն առնել»,- տեսակետ է հայտնում մեր զրուցակիցը:

Նա անդրադառնում է նաև մշակութային թեմաների: Հարցին, թե ինչպես է պատահել, որ թավշյա հեղափոխության օրհներգը համարվող «Իմ քայլը» երգը, կարծես, մոռացվել է հանրության կողմից, իսկ ահա հեղափոխությանը նվիրված մի շարք 6∕8 չափի երգեր հնչում են ամենուր, երգիչը պատասխանեց. «Մշակույթի ոլորտում հեղափոխություն չի եղել, նույնիսկ իրավիճակն ավելի է վատացել: Եթե ՀՀԿ-ի միջոցառումներին ելույթ էին ունենում բարձր մակարդակի, կիրթ երգիչներ, հիմա նրանք ասպարեզից կորել են և իրենց տեղը զիջել 6∕8 չափի երգեր կատարողներին»:

Մանրամասները՝ տեսանյութում:

Աննա Բաբաջանյան