Բաքուն առաջարկել է «3+3» ձևաչափով հանդիպումը նախ անցկացնել Ադրբեջանում, հետո՝ Հայաստանում

Ադրբեջանն առաջարկել է, որ «3+3» տարածաշրջանային ձևաչափի հերթական հանդիպումը նախ անցկացվի Ադրբեջանում, դրանից հետո արդեն՝ Հայաստանում։ Այս մասին Բաքվում Իրանի ԱԳ նախարար Աբբաս Արաղչիի հետ համատեղ մամուլի ասուլիսում ասել է Ադրբեջանի արտաքին գործերի նախարար Ջեյհուն Բայրամովը, փոխանցում են տեղական լրատվամիջոցները։

«Այս ձևաչափով արդեն երեք հանդիպում է տեղի ունեցել՝ Ռուսաստանում, Իրանում և Թուրքիայում 2024 թվականին։ Թուրքիայում կայացած հանդիպման ավարտին ադրբեջանական կողմը առաջարկեց հաջորդ հանդիպումն անցկացնել Ադրբեջանում։ Մենք հայտարարեցինք, որ Ադրբեջանում հանդիպումից հետո կհամաձայնվենք հաջորդ հանդիպումն անցկացնել Հայաստանում։ Ցավոք, այդ ժամանակ հայկական կողմը չհամաձայնվեց այս հաջորդականությանը։ Այնուամենայնիվ, մենք կարծում ենք, որ այսօր այլ միջավայր է։ Հայկական և ադրբեջանական պատվիրակություններն արդեն մասնակցում են միմյանց տարածքներում անցկացվող հանդիպումներին։ Հաշվի առնելով այս և այլ գործոններ՝ մենք կարծում ենք, որ այս պահին Հայաստանը որևէ պատճառ չունի մերժելու Ադրբեջանի կողմից 2024 թվականին հնչեցված առաջարկը։ Մեր առաջարկը վավեր է»,- հայտարարել է Բայրամովը։

Իրանի արտաքին գործերի նախարար Աբբաս Արաղչին, իր հերթին, հայտարարել է, որ «3+3» տարածաշրջանային համագործակցության ձևաչափը կարևոր դեր է խաղում Հարավային Կովկասում խաղաղության և կայունության ապահովման գործում։ Իրանցի դիվանագետի խոսքով՝ Ադրբեջանի և Իրանի միջև համագործակցությունը կշարունակի ամրապնդվել ապագայում։

«Այսօր ես և իմ ադրբեջանցի գործընկերն առարկայական բանակցություններ անցկացրինք Հարավային Կովկասի տարածաշրջանի և 3+3 ձևաչափի վերաբերյալ։ Այս ձևաչափը կարևոր դեր է խաղում տարածաշրջանում խաղաղության և կայունության ամրապնդման գործում»,- հավելել է նա։

Արաղչին նաև ընդգծել է, որ Իրանը հետաքրքրված է Ադրբեջանի հետ հարաբերությունները պահպանելու ամենաբարձր մակարդակով։

Թարգմանությունը՝ Էմմա Չոբանյանի